ດານ​ມາກ​ ສ້າງ​ກອງ​ທຶນ​ເພື່ອ​ຕ້ານ​ກັບ​ສະພາບ​ອາກາດ​ປ່ຽນ​ແປງ

   ເມື່ອ​ວັນ​ທີ 14 ກັນຍາ​ທີ່​ຜ່ານ​ມາ ປະຊາຊົນ​ດານ​ມາກ ໄດ້​ປະກອບ​ເງິນ​ໄດ້​ປະມານ 2,4 ລ້ານ​ເອີ​ໂຣ (ເທົ່າ​ກັບ​ປະມານ 2,6 ລ້ານ​ໂດ​ລາ​ສະຫະລັດ) ໃຫ້​ແກ່​ໂຄງການ​ປູກ​ຕົ້ນໄມ້​ສີຂຽວ ໂດຍ​ຜ່ານ​ລາຍການ​ໂທລະພາບ ເພື່ອ​ສ້າງ​ກອງ​ທຶນ​ເປັນ​ເທື່ອ​ທຳ​ອິດ​ໃນ​ໂລກ ໃຫ້​ແກ່​ການ​ຕ້ານ​ກັບ​ສະພາບ​ດິນ​ຟ້າ​ອາກາດ​ປ່ຽນແປງ.

    ຕາມ​ນັ້ນແລ້ວ ການ​ປະກອບສ່ວນ​ເງິນ 20 ໂກຣ​ເນີ​ດານ​ມາກ (ເທົ່າ​ກັບ​ປະມານ 3 ໂດ​ລາ​ສະຫະລັດ ຫຼື 2,7 ເອີ​ໂຣ) ໃດ ແມ່ນ​ຈະ​ປູກ​ຕົ້ນໄມ້​ຂຶ້ນ​ມາ​ໄດ້ 1 ຕົ້ນ ແລະ  20% ຂອງ​ຈຳນວນ​ເງິນ​ທີ່​ລະດົມ​ມາ​ໄດ້ ແມ່ນ​ຈະ​ຈັດ​ສັນ​ໃຫ້​ແກ່​ຄວາມ​ພະຍາຍາມ​ໃນ​ການ​ອະນຸລັກ​ປ່າໄມ້​ຢູ່​ໃນ​ດານ​ມາກ ແລະ ຢູ່​ຕ່າງປະເທດ.

    ເປົ້າ​ໝາຍ​ຂອງ​ລາຍການ​ທີ່​ອອກ​ອາກາດ​ຜ່ານ​ໂທລະພາບ​ຊ່ອງ TV2 ນັ້ນ ກໍ​ແມ່ນ​ການ​ລະດົມ​ເງິນ 20 ລ້ານ​ໂກຣ​ເນີ (ເທົ່າ​ກັບ​ປະມານ 3 ລ້ານ​ໂດ​ລາ​ສະຫະລັດ) ເພື່ອ​ປູກ​ຕົ້ນໄມ້​ສີຂຽວ 1 ລ້ານ​ຕົ້ນ ຢູ່​ໃນ​ດານ​ມາກ.

    ການ​ສຳ​ຫຼວດ​ຂອງ​ຄະນະ​ກຳມະການ​ເອີ​ຣົບ (EC) ທີ່​ໄດ້​ເປີດເຜີຍ​ເມື່ອ​ບໍ່​ດົນ​ມາ​ນີ້ ຊີ້​ໃຫ້​ເຫັນ​ວ່າ ປະຊາຊົນ​ດານ​ມາກ 83% ຖື​ວ່າການ​ປ່ຽນແປງ​ສະພາບ​ດິນ​ຟ້າ​ອາກາດ ເປັນ​ບັນຫາ​ທີ່ “ຮ້າຍ​ແຮງ​ເປັນ​ຢ່າງ​ຍິ່ງ.”

    ຄາດ​ວ່າ​ຕົ້ນໄມ້​ສີຂຽວ​ຈຳນວນ​ຫຼາຍ ຈະ​ໄດ້​ປູກ​ໃນ​ລະຫວ່າງ​ປະມານ​ແຕ່​ທ້າຍ​ເດືອນ​ຕຸລາ ຫາ​ທ້າຍ​ເດືອນ​ພະຈິກ​ໜ້າ​ນີ້ ຢູ່​ໃນ​ເຂດ​ຕ່າງໆ​ທີ່​ຂຶ້ນ​ກັບ​ສະພາ​ຂອງ​ນະຄອນ ລັດຖະບານ ແລະ ສະຖານທີ່​ອື່ນໆ ຢູ່​ໃນ​ດານ​ມາກ.