ຈີນ ປະກາດ​ປື້ມ​ປົກ​ຂາວ​ກ່ຽວ​ກັບ​ການ​ພັດ​ທະ​ນາ​ ແລະ ​ ສ້າງ​ຄວາມ​ກ້າວ​ໜ້າ​​ໃຫ້​ແກ່​ວຽກ​ງານ​ແມ່​ຍິງ​

166 23 ກ.ຍ. 2019 ຂ່າວຕ່າງປະເທດ
ຈີນ ປະກາດ​ປື້ມ​ປົກ​ຂາວ​ກ່ຽວ​ກັບ​ການ​ພັດ​ທະ​ນາ​ ແລະ ​ ສ້າງ​ຄວາມ​ກ້າວ​ໜ້າ​​ໃຫ້​ແກ່​ວຽກ​ງານ​ແມ່​ຍິງ​

    ວັນ​ທີ 19 ກັນຍາ​ນີ້ ຫ້ອງການ​ຖະແຫຼງ​ຂ່າວ​ຂອງ​ລັດຖະບານ​ຈີນ ໄດ້​ອອກ​ປື້ມ​ປົກ​ຂາວ “ຄວາມ​ສະເໝີພາບ ການ​ພັດທະນາ ແລະ ການ​ຊົມໃຊ້​ຮ່ວມ​ກັນ: ການ​ພັດທະນາ ແລະ ການ​ສ້າງ​ຄວາມ​ກ້າວໜ້າ​ໃຫ້​ແກ່​ວຽກ​ງານ​ແມ່ຍິງ ນັບ​ແຕ່​ສະຖາປະນາ​ສາທາລະນະ​ລັດ ປະຊາຊົນ​ຈີນ ຕະຫຼອດ​ໄລຍະ 70 ປີຜ່ານມາ”.

    ປື້ມ​ປົກ​ຂາວ​ດັ່ງກ່າວ ລະບຸ​ວ່າ ໃນ 70 ປີຜ່ານມາ ວຽກ​ງານ​ແມ່ຍິງ​ຂອງ​ຈີນ ໄດ້​ມີ​ການ​ພົວພັນ​ຢ່າງ​ແໜ້ນ​ແຟ້ນ ກັບ​ການ​ພັດທະນາ​ວຽກ​ງານ​ຂອງ​ພັກ-ລັດ ຢ່າງ​ສະເໝີ​ຕົ້ນ​ສະເໝີ​ປາຍ. ນັບ​ແຕ່​ກອງ​ປະຊຸມ​ໃຫຍ່​ຜູ້​ແທນ​ທົ່ວ​ປະເທດ​ຂອງ​ພັກ​ກອມ​ມູ​ນິດ​ຈີນ​ຄັ້ງ​ທີ 18 ເປັນຕົ້ນ​ມາ ພາຍ​ໃຕ້​ການ​ຊີ້​ນຳ​ຕາມ​ແນວ​ຄິດ​ສັງຄົມ​ນິຍົມ ທີ່​ມີ​ສີສັນ​ພິເສດ​ຂອງ​ຈີນ​ໃນ​ຍຸກ​ໃໝ່​ຂອງ​ທ່ານ ສີ​ຈິ້ນ​ຜິງ ແມ່ຍິງ​ໃນ​ປະເທດ​ຈີນ ຫຼາຍ​ຮ້ອຍ​ລ້ານ​ຄົນ ໄດ້​ປະຕິບັດ​ສິດ​ປະຊາທິປະໄຕ​ຕາມ​ກົດໝາຍ​ຢ່າງ​ສະເໝີພາບ ເຂົ້າ​ຮ່ວມ​ການ​ພັດທະນາ​ເສດຖະກິດ-ສັງຄົມ ຢ່າງ​ສະເໝີພາບ ແລະ ຊົມໃຊ້​ໝາກຜົນ​ດ້ານ​ການ​ພັດທະນາ ແລະ ປະຕິ​ຮູບ​ຢ່າງ​ສະເໝີພາບ. ວຽກ​ງານ​ແມ່ຍິງ​ຂອງ​ຈີນ ໄດ້​ຮັບ​ຜົນສຳເລັດ​ທີ່​ມີ​ລັກສະນະ​ປະຫວັດສາດ​ທີ່​ປະຈັກ​ຕາ​ຕໍ່​ຊາວ​ໂລກ.
     ປື້ມ​ປົກ​ຂາວ​ນັ້ນ​ຍັງ​ລະບຸ​ວ່າ ການ​ພັດທະນາ​ຂອງ​ຈີນ ໄດ້​ເຂົ້າ​ສູ່​ຍຸກ​ໃໝ່. ການ​ສົ່ງເສີມ​ຄວາມ​ສະເໝີພາບ​ລະຫວ່າງ​ຍິງ-ຊາຍ ກໍ​ຄື​ແມ່ຍິງ​ຢ່າງຮອບດ້ານ​ໃຫ້​ສູງ​ຂຶ້ນ​ກວ່າ​ເກົ່າ ເປັນ​ທັງ​ກາລະ​ໂອກາດ ແລະ ສິ່ງ​ທ້າ​ທາຍ. ຈີນ​ຈະ​ຢຶດ​ໝັ້ນ​ການ​ຮັບປະກັນ ແລະ ປັບປຸງ​ຊີວິດ​ການ​ເປັນ​ຢູ່​ຂອງ​ແມ່ຍິງ​ໃຫ້​ດີ​ຂຶ້ນ ແລະ ຊຸກຍູ້​ການ​ພັດທະນາ​ແມ່ຍິງ​ຢ່າງຮອບດ້ານ ໃນ​ຂະ​ບວນ​ການ​ພັດທະນາ​ຢ່າງ​ສະເໝີ​ຕົ້ນ​ສະເໝີ​ປາຍ​ຂອງ​ຕົນ​ນຳພາ​ແມ່ຍິງ​ຫຼາຍ​ຮ້ອຍ​ລ້ານ​ຄົນ ສ້າງ​ຜົນງານ​ທີ່​ດີເດັ່ນ​ໃນ​ການ​ບັນລຸ​ເປົ້າ​ໝາຍ​ສູ້​ຊົນ “ຮ້ອຍ​ປີ​ສອງ​ເຫດການ” ແລະ ຄວາມ​ໃຝ່ຝັນ​ທີ່​ຈະ​ຟື້ນ​ຟູ​ຄວາມ​ຈະເລີນ​ຮຸ່ງເຮືອງ​ອັນ​ຍິ່ງ​ໃຫຍ່​ຂອງ​ຊົນ​ຊາດ​ຈີນ ພາຍ​ໃຕ້​ທິດ​ຊີ້​ນຳ​ຕາມ​ແນວ​ຄິດ​ສັງຄົມ​ນິຍົມ​ທີ່​ມີ​ສີສັນ​ພິເສດ​ຂອງ​ຈີນ​ໃນ​ຍຸກ​ໃໝ່ ຂອງ​ທ່ານ​ສີ​ຈິ້ນ​ຜິງ.

 

ຂ່າວທີ່ກ່ຽວຂ້ອງ