ບັນລຸ​ຂໍ້​ຕົກລົງ​ກ່ຽວ​ກັບ​ຄະນະ​ກຳມະການ​ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ຊີ​ຣີ

270 23 ກ.ຍ. 2019 ຂ່າວຕ່າງປະເທດ
ບັນລຸ​ຂໍ້​ຕົກລົງ​ກ່ຽວ​ກັບ​ຄະນະ​ກຳມະການ​ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ຊີ​ຣີ

    ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່ ຂອງ​ອົງການ​ສະຫະ​ປະຊາ​ຊາດ (​ສປຊ) ຖະແຫຼງ​ເມື່ອ​ວັນ​ທີ 18 ກັນຍາ​ທີ່​ຜ່ານ​ມາ​ວ່າ ໄດ້​ບັນລຸ​ຂໍ້​ຕົກລົງ​ກ່ຽວ​ກັບ​ພາກສ່ວນ​ຄະນະ​ກຳມະການ​ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ຊີ​ຣີ​ແລ້ວ ຊຶ່ງ​ເປັນ​ບາດກ້າວ​ທີ່​ສຳຄັນ ເພື່ອ​ຫວັງ​ວ່າ​ຈະ​ຢຸດຕິ​ການ​ພິພາດ​ແກ່ຍາວ​ເປັນ​ເວລາ 8 ປີ​ກວ່າ​ທີ່​ຜ່ານ​ມາ ຢູ່​ໃນ​ຊີ​ຣີ.

   ທ່ານ ກູ​ເຕີ​ເຣ​​ສ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ​ວ່າ ທ່ານ ເຈ​ອີ ເປ​ເດີ​ເຊນ ທູດ​ພິເສດ​ຂອງ ​ສປຊ ກ່ຽວ​ກັບ​ບັນຫາ​ຊີ​ຣີ “ພວມ​ເຮັດ​ບັນດາ​ໜ້າ​ວຽກ​ສຸດ​ທ້າຍ ກັບ​ຝ່າຍ​ຕ່າງໆ​ທີ່​ກ່ຽວຂ້ອງ​ເຖິງ​ບັນດາ​ຂໍ້ຄວາມ​ທີ່​ຕ້ອງ​ໄດ້​ພິຈາລະນາ ແລະ ພວກ​ເຮົາ​ຫວັງ​ວ່າ ເລື່ອງ​ນີ້​ຈະ​ສຳເລັດ​ໃນ​ໄວໆ​ນີ້.”

    ເມື່ອ​ເດືອນ​ມັງກອນ ປີ 2018 ຝ່າຍ​ຕ່າງໆ​ທີ່​ເຂົ້າ​ຮ່ວມ​ໃນ​ກອງ​ປະຊຸມ​ສັນຕິພາບ​ຊີ​ຣີ ຊຶ່ງ​ຈັດ​ຂຶ້ນ​ໂດຍ​ຣັດ​ເຊຍ​ນັ້ນ ໄດ້​ລົງ​ນາມ​ຂໍ້​ຕົກລົງ​ສະບັບ​ໜຶ່ງ ກ່ຽວ​ກັບ​ການ​ສ້າງຕັ້ງ​ຄະນະ​ກຳມະການ​ໜຶ່ງ​ຂຶ້ນ​ມາ ຊຶ່ງ​ປະກອບ​ມີ​ສະມາຊິກ 150 ຄົນ ເພື່ອ​ຮ່າງ​ລັດ​ຖະ​ທຳ​ມະນູນ​ໃໝ່​ຂອງ​ຊີ​ຣີ. ນີ້​ຖື​ວ່າ​ເປັນ​ບາດກ້າວ​ທີ່​ສຳຄັນ ເພື່ອ​ກ້າວ​ໄປ​ສູ່​ການ​ເລືອກ​ຕັ້ງ ແລະ ວິທີ​ການ​ແກ້​ໄຂ​ໂດຍ​ທາງ​ການເມືອງ ໃຫ້​ແກ່​ການ​ພິພາດ​ຢູ່​ໃນ​ຊີ​ຣີ ຊຶ່ງ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ​ໄປ​ແລ້ວ​ປະມານ 400.000 ຄົນ.

    ຫຼັງ​ຈາກ​ທີ່​ບັນລຸ​ຂໍ້​ຕົກລົງ​ດັ່ງກ່າວ ລັດຖະບານ​ຊີ​ຣີ ແລະ ຝ່າຍ​ຄ້ານ ໄດ້​ນຳ​ເອົາ​ລາຍ​ຊື່​ສະມາຊິກ​ອອກ​ມາ 50 ຄົນ. ເຖິງ​ຢ່າງໃດ​ກໍ​ຕາມ ຕ້ອງ​ເສຍ​ເວລາ​ໄປ​ເກືອບ 20 ເດືອນ ເພື່ອ​ໃຫ້​ມີ​ຄວາມ​ເປັນ​ເອກະ​ພາບ​ກັນ​ໃນ​ບັນຊີ​ລາຍ​ຊື່​ນັ້ນ ຊຶ່ງ​ຕົ້ນຕໍ​ແມ່ນ​ຍ້ອນ​ການ​ຄັດຄ້ານ​ຈາກ​ຝ່າຍ​ລັດຖະບານ​ຊີ​ຣີ.

ຂ່າວທີ່ກ່ຽວຂ້ອງ