ລັດ​ຖະ​ບານ​ກຳ​ປູ​ເຈຍ ​​ຈະ​ເປີດ​ໂຕ APP ການ​ທ່ອງ​ທ່ຽວ

99 24 ກ.ຍ. 2019 ຂ່າວຕ່າງປະເທດ
ລັດ​ຖະ​ບານ​ກຳ​ປູ​ເຈຍ ​​ຈະ​ເປີດ​ໂຕ APP ການ​ທ່ອງ​ທ່ຽວ

    ວັນ​ທີ 21 ກັນຍາ​ນີ້ ກະຊວງ​ການທ່ອງທ່ຽວ​ກຳປູເຈຍ ໄດ້​ຈັດ​ກອງ​ປະຊຸມ​ຂ່າວ​ຢູ່​ນະຄອນຫຼວງ​ບາງກອກ ຂອງ​ປະເທດ​ໄທ ໂດຍ​ທ່ານ ໂຊ​ເຄຼິກ​ຢາ ຮອງ​ລັດຖະມົນຕີ​ກະຊວງ​ການທ່ອງທ່ຽວ​ກຳປູເຈຍ​ຖະແຫຼງ​ໃນ​ໂອກາດ​ນີ້​ວ່າ ກຳປູເຈຍ​ຈະ​ເປີດ​ໂຕ APP ສຳລັບ​ການທ່ອງທ່ຽວ​ອັນ​ທຳ​ອິດ​ຂອງ​ລັດຖະບານ​ອອກ​ໃນ​ເດືອນ​ຕຸລາ​ປີ​ນີ້ ຊຶ່ງ APP ນີ້​ມີ​ຊື່ວ່າ Cambodia Tourist Assist (CTA) ເພື່ອ​ສະໜອງ​ຂໍ້​ມູນ​ຂ່າວສານ​ດ້ານ​ການທ່ອງທ່ຽວ ໃຫ້​ແກ່​ນັກ​ທ່ອງ​ທ່ຽວ​ໃນ​ໂລກ.

    ທ່ານ​ໂຊ​ເຄຼິກ​ຢາ ໃຫ້ການ​ແນະນຳ​ວ່າ APP ດັ່ງກ່າວ​ຈະ​ສະໜອງ​ຂໍ້​ມູນ​ຂ່າວສານ​ທຸກໆ​ດ້ານ​ເຊັ່ນ ເສັ້ນທາງ​ທ່ອງ​ທ່ຽວ ການ​ຄົມມະນາຄົມ ສະຖານທີ່​ທ່ອງ​ທ່ຽວ ໂຮງແຮມ ຮ້ານ​ອາຫານ ແລະ ອື່ນໆ ດ້ວຍ 6 ພາສາ ແລະ  ຍັງ​ໄດ້​ຈັດ​ໃຫ້​ມີ​ປຸ່ມ​ຂໍ​ຄວາມ​ຊ່ວຍເຫຼືອ SOS ໃນ​ເວລາ​ພົບ​ກໍລະນີ​ສຸກ​ເສີນ​ຢູ່​ກຳປູເຈຍ ໂດຍ​ນັກ​ທ່ອງ​ທ່ຽວ​ສາມາດ​ກົດ​ປຸ່ມ​ນີ້ ເພື່ອ​ຂໍ​ຄວາມ​ຊ່ວຍເຫຼືອ​ຈາກ​ພາກສ່ວນ​ທີ່​ກ່ຽວຂ້ອງ​ຂອງ​ລັດຖະບານ​ກຳປູເຈຍ.

    ໃນ​ຫຼາຍ​ປີ​ມາ​ນີ້ ຂະແໜງ​ການທ່ອງທ່ຽວ ໄດ້​ກາຍເປັນ​ເສົາຄ້ຳ​ໜຶ່ງ​ຂອງ​ອຸດສາຫະກຳ​ຂອງ​ກຳປູເຈຍ. ໃນ​ປີ 2018 ກຳປູເຈຍ​ໄດ້​ຮັບ​ຕ້ອນ​ນັກ​ທ່ອງ​ທ່ຽວ​ຕ່າງປະເທດ 6,2 ລ້ານ​ເທື່ອ​ຄົນ ລາຍ​ຮັບ​ຈາກ​ການທ່ອງທ່ຽວ​ກວມ​ເອົາ 12,7% ຂອງ GDP ກຳ​ປະ​ເຈຍ ແລະ ໄດ້​ເຕີບ​ໂຕ​ດ້ວຍ​ຄວາມ​ໄວ 5%-10% ຕໍ່​ປີ. ຈີນ​ເປັນ​ປະເທດ​ທີ່​ມີ​ແຫຼ່ງ​ແຂກ​ທ່ອງ​ທ່ຽວ​ອັນ​ດັບ​ທີ 1 ຂອງ​ກຳປູເຈຍ ຊຶ່ງ​ໃນ​ປີ 2018 ນັກ​ທ່ອງ​ທ່ຽວ​ຈີນ​ໄປ​ທ່ອງ​ທ່ຽວ​ໃນ​ກຳປູເຈຍ ມີ​ເຖິງ​ປະມານ 2 ລ້ານ​ເທື່ອ​ຄົນ ແລະ  ຄາດ​ວ່າ ໃນ​ປີ 2019 ຈະ​ບັນລຸ​ເຖິງ 2,6 ລ້ານ​ເທື່ອ​ຄົນ ປີ 2020 ຈະ​ບັນລຸ​ເຖິງ 3 ລ້ານ​ເທື່ອ​ຄົນ. ທ່ານ​ໂຊ​ເຄຼິກ​ຢາ​ກ່າວ​ວ່າ ກຳປູເຈຍ ແລະ ຈີນ​ພວມ​ເພີ່ມ​ທະວີ​ການ​ຮ່ວມ​ມື​ດ້ານ​ການທ່ອງທ່ຽວ ແຜນ​ຍາວ​ໄກ​ແມ່ນ​ໃນ​ປີ 2030 ດຶງ​ດູດ​ນັກ​ທ່ອງ​ທ່ຽວ​ຈີນ​ເຖິງ 8 ລ້ານ​ເທື່ອ​ຄົນ.

    ຕາມ​ການ​ແນະນຳ​ໃຫ້​ຮູ້​ວ່າ ຕະຫຼາດ​ການທ່ອງທ່ຽວ​ຂອງ​ກຳປູເຈຍ​ໃນ​ປັດຈຸບັນ ຍັງ​ມີ​ຊ່ອງ​ຫວ່າງ​ເຕີບ​ໂຕ​ຢ່າງ​ຫຼວງຫຼາຍ ດັ່ງນັ້ນ​ຈຶ່ງ​ຍິນ​ດີ​ຕ້ອນຮັບ​ວິ​ສາ​ກະ​ກິດ​ຕ່າງປະເທດ​ເຂົ້າ​ໄປ​ລົງທຶນ​ໃນ​ຂະແໜງ​ການທ່ອງທ່ຽວ​ຢູ່​ກຳປູເຈຍ.

ຂ່າວທີ່ກ່ຽວຂ້ອງ