ສ ອາ​ເມ​ຣິ​ກາ​ ປະ​ກາດ​ຈະ​ປິດ​ລ້ອມ​ຕໍ່​ທະ​ນາ​ຄານ​ກາງ​​ຂອງ​ອີ​ຣານ

101 24 ກ.ຍ. 2019 ຂ່າວຕ່າງປະເທດ
ສ ອາ​ເມ​ຣິ​ກາ​ ປະ​ກາດ​ຈະ​ປິດ​ລ້ອມ​ຕໍ່​ທະ​ນາ​ຄານ​ກາງ​​ຂອງ​ອີ​ຣານ

     ວັນ​ທີ 20 ກັນຍາ​ນີ້ ລັດຖະບານ ສ ອາ​ເມ​ຣິ​ກາ ໄດ້​ປະກາດ​ວ່າ​ຈະ​ໃຊ້​ມາດ​ຕະການ​ປິດ​ລ້ອມ​ຕໍ່​ທະນາຄານ​ກາງ ແລະ ອົງ​ກອນ​ອື່ນໆ​ຂອງ​ອີ​ຣານ ລວມ 3 ແຫ່ງ ໂດຍ​ກ່າວ​ວ່າ​ນີ້​ເປັນ​ການ​ຕອບ​ໂຕ້​ຕໍ່​ເຫດການ​ທີ່​ໂຮງງານ​ກັ່ນ​ນ້ຳມັນ​ຂອງ ອາ​ຣາ​ບີ ຊາ​ອຸ​ດິດ ຖືກ​ຫຼອນ​ໂຈມ​ຕີ.

    ໃນ​ມື້​ດຽວ​ກັນ ທ່ານ​ໂດ​ນາ​​ລ ທຣຳ ປະທານາທິບໍດີ ສ ອາ​ເມ​ຣິ​ກາ ໄດ້​ປະກາດ​ການ​ປິດ​ລ້ອມ​ກ່ຽວຂ້ອງ ໃນ​ເວລາ​ພົບ​ປະ​ກັບ​ທ່ານ​​ສ​ກັອດ ໂມ​ຣິ​ຊັນ ນາຍົກ​ລັດ​ຖະ​ມົນ​ຕີ​​ອົ​ສະ​ຕຣາ​ລີ ທີ່​ໄປ​ຢ້ຽມຢາມ​ຢູ່​ທີ່​ທຳ​ນຽບ​ຂາວ. ຂະນະ​ດຽວ​ກັນ ທ່ານ​ສະ​ເຕ​ເວນ ມະນູ​ຊິນ ລັດຖະມົນຕີ​ກະຊວງ​ການ​ເງິນ ສ ອາ​ເມ​ຣິ​ກາ​ກໍ​ກ່າວ​ໃນ​ໂອກາດ​ດັ່ງກ່າວ​ວ່າ ມາ​ຮອດ​ປັດຈຸບັນ ສ ອາ​ເມ​ຣິ​ກາ ໄດ້​ຕັດ​ແຫຼ່ງ​ທຶນ​ທັງ​ໝົດ​ຂອງ​ອີ​ຣານ​ແລ້ວ.

     ມື້​ດຽວ​ກັນ ທ່ານ​ໄມ ພອມ​ປີ​ໂອ ລັດຖະມົນຕີ​ກະຊວງ​ການ​ຕ່າງ​ປະ​ເທດ​​ສ ອາ​ເມ​ຣິ​ກາ ໄດ້​ຖະແຫຼງ​ວ່າ ການ​ປິດ​ລ້ອມ​ຄັ້ງ​ນີ້ ເປັນ​ການ​ຕອບ​ໂຕ້​ຂອງ ສ ອາ​ເມ​ຣິ​ກາ ຕໍ່​ການ​ທີ່​ອີ​ຣານ​ຫຼອນ​ໂຈມ​ຕີ​ໂຣງ​ງານ​ຜະລິດ​ນ້ຳມັນ​ຂອງ ອາ​ຣາ​ບີ ຊາ​ອຸ​ດິດ. ມາດ​ຕະການ​ເພີ່ມ​ແຮງ​ກົດ​ດັນ​ສຸດ​ຂີດ​ຂອງ ສ ອາ​ເມ​ຣິ​ກາ ຕໍ່​ອີ​ຣານ ຍັງ​ຈະ​ປະຕິບັດ​ຕໍ່​ໄປ.

   ວັນ​ທີ 14 ກັນຍາ​ທີ່​ຜ່ານ​ມາ ໂຮງງານ​ຜະລິດ​ນ້ຳມັນ​ເຊື້ອ​ໄຟ​ສອງ​ແຫ່ງ​ຂອງ​ບໍລິສັດ​ນ້ຳມັນ​ເຊື້ອ​ໄຟ​ແຫ່ງ​ຊາດ ອາ​ຣາ​ບີ ຊາ​ອຸ​ດິດ ໄດ້​ຖືກ​ຫຼອນ​ໂຈມ​ຕີ​ໂດຍ​ເຮືອບິນ​ແບບ​ບໍ່​ມີ​ຄົນ​ຂັບ ແລະ ເກີດ​ໄຟ​ໄໝ້. ກຸ່ມ​ປະກອບ​ອາວຸດ ຮູ​ຕີ ໃນ​ເຢ​ແມນ ປະກາດ​ອ້າງ​ຄວາມ​ຮັບຜິດຊອບ ວ່າ​ເປັນ​ຝ່າຍ​ລົງມື​ໃນ​ການ​ໂຈມ​ຕີ​ດັ່ງກ່າວ ແຕ່ ສ ອາ​ເມ​ຣິ​ກາ ພັດ​ກ່າວ​ວ່າ​ອີ​ຣານ​ເປັນ​ຜູ້​ຢູ່​ເບື້ອງ​ຫຼັງ​ຂອງ​ເຫດການ​ໂຈມ​ຕີ​ນັ້ນ ໃນ​ຂະນະ​ທີ່​ອີ​ຣານ ໄດ້​ປະຕິເສດ​ຫຼາຍ​ເທື່ອ​ຕໍ່​ກ່າວ​ຫາ​ນີ້.

ຂ່າວທີ່ກ່ຽວຂ້ອງ