ຂ່າວຫຼ້າສຸດ

ອິດ​ສະ​ຣາ​ແອນ​ ຕັດ​ໄຟຟ້າ​ທີ່​ສະໜອງ​ໃຫ້​ຊາວ​ປາ​ແລັດ​ສະຕິ​ນ

107 24 ກ.ຍ. 2019 ຂ່າວຕ່າງປະເທດ
ອິດ​ສະ​ຣາ​ແອນ​ ຕັດ​ໄຟຟ້າ​ທີ່​ສະໜອງ​ໃຫ້​ຊາວ​ປາ​ແລັດ​ສະຕິ​ນ

    ວັນ​ທີ 22 ກັນຍາ​ນີ້ ບໍລິສັດ​ໄຟຟ້າ​ແຫ່ງ​ຊາດ​ອິດ​ສະ​ຣາ​ແອນ ໄດ້​ເລີ່ມ​ຕັດ​ຫຼຸດ​ແຫຼ່ງ​ສະໜອງ​ໄຟຟ້າ ໃຫ້​ແກ່​ເຂດ​ຕ່າງໆ​ຂອງ​ຊາວ​ປາ​ແລັດ​ສະ​ຕິນ ໃນ​ເຂດ​ຝັ່ງ​ຕາເວັນຕົກ​ແມ່ນ້ຳ​ຈໍ​ແດນ ດ້ວຍ​ເຫດຜົນ​ການ​ພິພາດ​ດ້ານ​ການ​ເງິນ.

    ບໍລິສັດ​ໄຟຟ້າ​ແຫ່ງ​ຊາດ​ອິດ​ສະ​ຣາ​ແອນ ໃຫ້​ຮູ້​ວ່າ ມາດ​ຕະການ​ດັ່ງກ່າວ ໄດ້​ຮັບ​ການ​ປະຕິບັດ​ໂດຍ​ບໍລິສັດ​ໄຟຟ້າ​ປະຈຳເມືອງ ເຈ​ຣູ​ຊາ​ແລມ ຊຶ່ງ​ເປັນ​ບໍລິສັດ​ທີ່​ສະໜອງ​ໄຟຟ້າ​ຕົ້ນຕໍ​ໃຫ້​ແກ່​ປາ​ແລັດ​ສະ​ຕິນ​ນັ້ນ ມີ​ໜີ້​ເກືອບ 485 ລ້ານ​ໂດ​ລາ​ສະຫະລັດ.

    ໃນ​ຂະນະ​ດຽວ​ກັນ ທ່ານ ອາລີ ຮາ​ໂມ​ເດີ ຕົວ​ແທນ​ກ່ຽວ​ກັບ​ການແຈກຢາຍ​ໄຟຟ້າ​ຂອງ​ຊາວ​ປາ​ແລັດ​ສະ​ຕິນ ເວົ້າ​ວ່າ ໄຟຟ້າ​ອາດ​ຈະ​ຖືກ​ຕັດ​ເປັນ​ເວລາ 2 ຊົ່ວໂມງ​ໃນ​ແຕ່​ລະ​ວັນ ຢູ່​ໃນ​ບາງ​ຕົວ​ເມືອງ​ຂອງ​ຊາວ​ປາ​ແລັດ​ສະ​ຕິນ ພາຍ​ໃນ​ຫຼາຍ​ອາທິດ​ຕໍ່ໜ້າ​ນີ້.

    ເມື່ອ​ອາທິດ​ກ່ອນ ບໍລິສັດ​ໄຟຟ້າ​ແຫ່ງ​ຊາດ​ອິດ​ສະ​ຣາ​ແອນ ໄດ້​ລາຍ​ງານ​ຕໍ່​ນາຍົກລັດຖະມົນຕີ ເບນ​ຈາ​ມິນ ເນ​ຕັນ​ຢາ​ຮູ ຕະຫຼອດ​ຮອດ​ລັດຖະມົນຕີ​ການ​ເງິນ ລັດຖະມົນຕີ​ພະລັງງານ ແລະ ອົງການ​ຄຸ້ມ​ຄອງ​ໄຟຟ້າ ອົງການ​ຄຸ້ມ​ຄອງ​ການເຄື່ອນໄຫວ​ຂອງ​ລັດຖະບານ ຢູ່​ໃນ​ເຂດ​ດິນແດນ​ຕ່າງໆ (COGAT) ວ່າ​ຍ້ອນ​ບັນຫາ​ໜີ້​ສິນ​ຂອງ​ບໍລິສັດ​ໄຟຟ້າ ເຈ​ຣູ​ຊາ​ແລມ ຈຶ່ງ​ເຮັດ​ໃຫ້​ບໍລິສັດ​ໄຟຟ້າ​ແຫ່ງ​ຊາດ​ອິດ​ສະ​ຣາ​ແອນ ມີ​ຈຸດປະສົງ​ຕັດ​ຫຼຸດ​ແຫຼ່ງ​ສະໜອງ​ໄຟຟ້າ ໃຫ້​ແກ່​ຊາວ​ປາ​ແລັດ​ສະ​ຕິນ.

ຂ່າວທີ່ກ່ຽວຂ້ອງ