British Airways ຟື້ນ​ຟູ​ການ​ບໍລິການ 50% ຫຼັງ​ຈາກ​ນັກ​ບິນ​​ໂຈະ​ແຜນ​ການ​ນັດ​ຢຸດ​ງານ

147 24 ກ.ຍ. 2019 ຂ່າວຕ່າງປະເທດ
British Airways ຟື້ນ​ຟູ​ການ​ບໍລິການ 50% ຫຼັງ​ຈາກ​ນັກ​ບິນ​​ໂຈະ​ແຜນ​ການ​ນັດ​ຢຸດ​ງານ

   ບໍລິສັດ​ການບິນ British Airways (BA) ຂອງ​ອັງກິດ ແຈ້ງ​ໃຫ້​ຮູ້ເມື່ອ​ວັນ​ທີ 20 ກັນຍາ​ທີ່​ຜ່ານ​ມາ ວ່າ​ຈະ​ຮັກສາ 50% ຂອງ​ຖ້ຽວ​ບິນ​ທີ່​ໄດ້​ຈັດ​ໃສ່​ຕາຕະລາງ​ບິນ​ໃນ​ວັນ​ທີ 27 ກັນຍາ ຫຼັງ​ຈາກ​ທີ່​ບັນດາ​ນັກ​ບິນ​ຂອງ​ບໍລິສັດ​ນີ້ ໂຈະ​ແຜນການ​ນັກ​ຢຸດ​ງານ​ໃນ​ວັນ​ດັ່ງກ່າວ.

   ກ່ອນ​ໜ້າ​ນັ້ນ BA ໄດ້​ແຈ້ງ​ເຖິງ​ການ​ໂຈະ​ຖ້ຽວ​ບິນ​ທັງ​ໝົດ ໃນ​ວັນ​ທີ 27 ກັນຍາ ແລະ ແຈ້ງ​ໃຫ້​ຜູ້ໂດຍສານ​ເລືອກ​ເອົາ​ການ​ສົ່ງ​ເງິນ​ຄ່າ​ປີ້​ເຮືອບິນ​ຄືນ ຫຼື​ຈອງ​ຖ້ຽວ​ບິນ​ໃສ່​ວັນ​ອື່ນ.

   ເຖິງ​ຢ່າງໃດ​ກໍ​ຕາມ ເມື່ອ​ວັນ​ທີ 18 ກັນຍາ​ທີ່​ຜ່ານ​ມາ ສະມາຄົມ​ນັກ​ບິນ British Airline (BALPA) ໄດ້​ປະກາດ​ໂຈະ​ແຜນການ​ນັດ​ຢຸດ​ງານ​ໃນ​ວັນ​ທີ 27 ກັນຍາ ຊຶ່ງ​ແຜນການ​ນັດ​ຢຸດ​ງານ​ນີ້ ແມ່ນ​ເພື່ອ​ຄັດຄ້ານ​ຕໍ່​ນະໂຍບາຍ​ການ​ຈ່າຍ​ເງິນເດືອນ​ໃຫ້​ແກ່​ນັກ​ບິນ​ຂອງ BA.

    ແຜນການ​ນັດ​ຢຸດ​ງານ​ໃນ​ເບື້ອງ​ຕົ້ນ ແມ່ນ​ຈັດ​ໃສ່ 3 ວັນ ຄື​ວັນ​ທີ 9 10 ແລະ  27 ກັນຍາ. ການ​ນັດ​ຢຸດ​ງານ​ໃນ​ວັນ​ທີ 9 ແລະ  10 ກັນຍາ ໄດ້​ເຮັດ​ໃຫ້ BA ຕ້ອງ​ໄດ້​ຍົກເລີກ​ຖ້ຽວ​ບິນ​ພາຍ​ໃນ​ປະເທດ​ທັງ​ໝົດ ເຮັດ​ໃຫ້​ເປັນ​ຜົນ​ກະທົບ​ຕໍ່​ຜູ້ໂດຍສານ 200.000 ຄົນ ແລະ ການເຄື່ອນໄຫວ​ຂອງ BA ໃນ​ວັນ​ທີ 11 ກັນຍາ ກໍ​ຖືກ​ຂາດ​ໄລຍະ​ໄປ.

    BALPA ໃຫ້ການ​ຄາດ​ຄະເນ​ວ່າ BA ອາດ​ຈະ​ໄດ້​ຮັບ​ຄວາມ​ເສຍ​ຫາຍ 80 ລ້ານ​ປອນ (ເທົ່າ​ກັບ 98 ລ້ານ​ໂດ​ລາ​ສະຫະລັດ) ຍ້ອນ​ແຜນການ​ນັດ​ຢຸດ​ງານ​ຂອງ​ເຫຼົ່າ​ນັກ​ບິນ ໃນ​ເວລາ 3 ວັນ.

ຂ່າວທີ່ກ່ຽວຂ້ອງ