ໄທ ບັນລຸ​ຂໍ້​ຕົກລົງ​ກ່ຽວ​ກັບ​ການ​ສົ່ງ​ອອກ​ມັນ​ຕົ້ນ​ກັບ​ຈີນ

208 24 ກ.ຍ. 2019 ຂ່າວຕ່າງປະເທດ
ໄທ ບັນລຸ​ຂໍ້​ຕົກລົງ​ກ່ຽວ​ກັບ​ການ​ສົ່ງ​ອອກ​ມັນ​ຕົ້ນ​ກັບ​ຈີນ

    ທ່ານ ຈຸ​ຣິນ ລັກສະນະ​ວິສິດ ຮອງ​ນາຍົກລັດຖະມົນຕີ ທັງ​ເປັນ​ລັດຖະມົນຕີ​ການ​ຄ້າ​ໄທ ແຈ້ງ​ໃຫ້​ຮູ້ເມື່ອ​ວັນ​ທີ 21 ກັນຍາ​ນີ້​ວ່າ ໄທ​ໄດ້​ບັນລຸ​ຂໍ້​ຕົກລົງ​ສະບັບ​ໜຶ່ງ ກ່ຽວ​ກັບ​ການ​ສົ່ງ​ອອກ​ມັນຕົ້ນ ເປັນ​ມູນ​ຄ່າ 18 ຕື້​ບາດ (ເທົ່າ​ກັບ 590 ລ້ານ​ໂດ​ລາ​ສະຫະລັດ) ກັບ​ຈີນ.

    ສື່ສານ​ຂອງ​ໄທ​ລາຍ​ງານ​ວ່າ ທ່ານ ຈຸ​ຣິນ ນຳ​ໜ້າ​ຄະນະ​ຜູ້​ແທນ​ໄທ ໄປ​ເຂົ້າ​ຮ່ວມ​ງານ​ຕະຫຼາດນັດ ຈີນ-ອາ​ຊຽນ ຄັ້ງ​ທີ 16 ຊຶ່ງ​ຈັດ​ຂຶ້ນ​ທີ່​ນະຄອນ​ໜານ​ໜິງ (ຈີນ). ທ່ານ ຈຸ​ຣິນ ໃຫ້​ຮູ້​ວ່າ ຂໍ້​ຕົກລົງ​ກ່ຽວ​ກັບ​ການ​ສົ່ງ​ອອກ​ມັນຕົ້ນ​ນັ້ນ ໄດ້​ຮັບ​ການ​ລົງ​ນາມ​ກັບ​ສີ່​ບໍລິສັດ​ຂອງ​ຈີນ ໂດຍ​ມີ​ທັງ​ການ​ສົ່ງ​ອອກ​ທັງ​ມັນຕົ້ນ​ປ່ຽງ ແລະ ແປ້ງ​ມັນຕົ້ນ ໃຫ້​ແກ່​ແຂວງ​ກວາງຊີ ທີ່​ເປັນ​ຕະຫຼາດ​ໃໝ່​ໃຫ້​ແກ່​ຂະແໜງການ​ສົ່ງ​ອອກ​ມັນຕົ້ນ​ຂອງ​ໄທ. ຕາມ​ທຳ​ມະ​ດາ​ແລ້ວ ໃນ​ແຕ່​ລະ​ປີ ຈີນ​ນຳ​ເຂົ້າ​ຫົວ​ມັນຕົ້ນ​ຈາກ​ໄທ ທີ່​ປະມານ 7 ລ້ານ​ໂຕນ ໃນ​ມູນ​ຄ່າ​ປະມານ 20 ຕື້​ບາດ. ແຕ່​ວ່າ​ໃນ​ປີ 2018 ຈີນ​ນຳ​ເຂົ້າ​ຫົວ​ມັນຕົ້ນ​ຈາກ​ໄທ​ພຽງ 3 ລ້ານ​ໂຕນ.

    ທ່ານ ຈຸ​ຣິນ ແຈ້ງ​ໃຫ້​ຮູ້​ຕື່ມ​ວ່າ ໄທ ແລະ ຈີນ ກໍ​ພວມ​ເຈລະຈາ ກ່ຽວ​ກັບ​ການ​ປະຕິບັດ​ບົດ​ບັນທຶກ​ຊ່ວຍ​ຈຳ (MoU) ສະບັບ​ໜຶ່ງ ທີ່​ໄດ້​ຮັບ​ການ​ລົງ​ນາມ​ໃນ​ເມື່ອ​ກ່ອນ ເມື່ອ​ຈີນ​ຍິນ​ດີ​ນຳ​ເຂົ້າ​ເຂົ້າສານ 2 ລ້ານ​ໂຕນ ຈາກ​ໄທ. ໄລ່​ມາ​ຮອດ​ເວລາ​ນີ້ ຈີນ​ຫາ​ກໍ​ນຳ​ເຂົ້າ​ເຂົ້າສານ​ໄດ້ 700.000 ໂຕນ ແລະ ຍັງ​ອີກ 1,3 ລ້ານ​ໂຕນ ທີ່​ຈະ​ຕ້ອງ​ໄດ້​ປະຕິບັດ​ຕາມ​ຂໍ້​ຕົກລົງ​ນີ້. ໃນ​ຂະນະ​ດຽວ​ກັນ ໄທ ແລະ ຈີນ ຍັງ​ໄດ້​ປຶກສາ​ຫາລື ກ່ຽວ​ກັບ MoU ອີກ​ສະບັບ​ໜຶ່ງ ຊຶ່ງ​ພົວພັນ​ເຖິງ​ເລື່ອງ​ທີ່​ຈີນ ເຫັນ​ດີ​ນຳ​ເຂົ້າ​ຢາງພາລາ 200.000 ໂຕນ​ຈາກ​ໄທ ຊຶ່ງ​ມາ​ຮອດ​ເວລາ​ນີ້ ຈີນ​ຫາ​ກໍ​ນຳ​ເຂົ້າ​ຢາງພາລາ​ຈາກ​ໄທ ຕາມ​ຂໍ້​ຕົກລົງ​ດັ່ງກ່າວ​ພຽງ​ທີ່ 16.000 ໂຕນ.

ຂ່າວທີ່ກ່ຽວຂ້ອງ