WHO ຕິຕຽນ​ຕັງ​ຊາ​ນີ ທີ່​ບໍ່​ມີ​ຄວາມ​ໂປ່​ງ​ໃສ​ກ່ຽວ​ກັບ​ພະຍາດ​ອີ​ໂບ​ລາ

205 24 ກ.ຍ. 2019 ຂ່າວຕ່າງປະເທດ
WHO ຕິຕຽນ​ຕັງ​ຊາ​ນີ ທີ່​ບໍ່​ມີ​ຄວາມ​ໂປ່​ງ​ໃສ​ກ່ຽວ​ກັບ​ພະຍາດ​ອີ​ໂບ​ລາ

   ວັນ​ທີ 22 ກັນຍາ​ນີ້ ອົງການ​ອະນາໄມ​ໂລກ (WHO) ໄດ້​ຕິຕຽນ​ຕໍ່​ຕັງ​ຊາ​ນີ ທີ່​ໃຫ້ການ​ປະຕິເສດ​ໃນ​ການ​ສະໜອງ​ຂໍ້​ມູນ​ລະອຽດ ກ່ຽວ​ກັບ​ບັນດາ​ກໍລະນີ​ຜູ້​ທີ່​ຕິດພະຍາດ​ອີ​ໂບ​ລາ (Ebola). ນີ້​ເປັນ​ເລື່ອງ​ທີ່​ບໍ່​ຄ່ອຍ​ມີ​ທີ່ WHO ຕິຕຽນ​ຕໍ່​ປະເທດ​ໜຶ່ງ ທ່າມກາງ​ທີ່​ບັນດາ​ປະເທດ​ໃນ​ເຂດ​ຕາເວັນ​ອອກ ແລະ ພາກ​ກາງ​ອາ​ຟະ​ຣິກ​ກາ ພວມ​ຊຸກຍູ້​ການ​ຕໍ່ສູ້​ກັບ​ພະຍາດ​ດັ່ງກ່າວ ທີ່​ຖື​ວ່າ​ເປັນ “ບັນຫາ​ສຸກ​ເສີນ​ກ່ຽວ​ກັບ​ສຸຂະພາບ​ທົ່ວ​ໂລກ” ນັ້ນ.

   ແຈ້ງ​ການ​ຂອງ WHO ໃຫ້​ຮູ້​ວ່າ ຄວາມ​ໂປ່ງ​ໃສ ແລະ ຈັງຫວະ ນັບ​ວ່າ​ເປັນ​ຂໍ​ກຸນແຈ ເພື່ອ​ໃຫ້​ສາມາດ​ຕໍ່ຕ້ານ​ກັບ​ພະຍາດ​ອີ​ໂບ​ລາ ທັງ​ນີ້​ກໍ​ເພາະວ່າ​ພະຍາດ​ດັ່ງກ່າວ ແພ່​ລາມ​ໄດ້​ຢ່າງ​ໄວວາ.  ໃຜ​ກໍ​ຕາມ ທີ່​ສຳຜັດ​ກັບ​ຜູ້​ທີ່​ສົງ​ໃສ​ຕິດ​ພະຍາ​ອີ​ໂບ​ລາ ແມ່ນ​ຕ່າງ​ກໍ​ຕ້ອງ​ໄດ້​ຖືກ​ແຍກ​ບໍລິເວນ ແລະ ແຈ້ງ​ໄປ​ຍັງ​ຊຸມ​ຊົນ ເພື່ອ​ປະຕິບັດ​ມາດ​ຕະການ​ປ້ອງ​ກັນ.

    ໄລ່​ມາ​ຮອດ​ວັນ​ທີ 10 ກັນຍາ​ທີ່​ຜ່ານ​ມາ WHO ແຈ້ງ​ໃຫ້​ຮູ້​ວ່າ ໄດ້​ຮັບ​ຂໍ້​ມູນ​ຢ່າງ​ບໍ່​ເປັນ​ທາງ​ການ ກ່ຽວ​ກັບ​ວ່າ​ຄົນ​ເຈັບ​ຜູ້​ໜຶ່ງ ຢູ່​ໃນ​ນະຄອນ ດາ​ແອ​​ສ ຊາ​ລາມ (ຕັງ​ຊາ​ນີ) ເສຍ​ຊີວິດ​ເມື່ອ​ວັນ​ທີ 8 ກັນຍາ ຊຶ່ງ​ຫຼັງ​ຈາກ​ນັ້ນ ຜູ້​ທີ່​ເສຍ​ຊີວິດ​ນີ້​ໄດ້​ຮັບ​ການ​ກວດ ແລະ ມີ​ຜົນ​ເປັນ​ບວກ​ກັບ​ພະຍາດ​ອີ​ໂບ​ລາ. ນອກຈາກ​ກໍລະນີ​ຜູ້​ເສຍ​ຊີວິດ​ດັ່ງກ່າວ​ແລ້ວ  WHO ກໍ​ຮູ້​ຜ່ານ​ຂໍ້​ມູນ​ຂ່າວສານ​ທີ່​ບໍ່​ເປັນ​ທາງ​ການ ວ່າ​ຢູ່​ຕັງ​ຊາ​ນີ ມີ​ອີກ 2 ກໍລະນີ ທີ່​ຕິດພະຍາດ​ອີ​ໂບ​ລາ.

    ເຖິງ​ຢ່າງໃດ​ກໍ​ຕາມ ລັດຖະບານ​ຕັງ​ຊາ​ນີ ຍັງ​ຄົງ​ຢືນຢັນ​ວ່າ ປັດຈຸບັນ​ນີ້ ຍັງ​ບໍ່​ທັນ​ໄດ້​ກວດ​ພົບ​ກໍລະນີ​ຜູ້​ຕິດ ຫຼື​ຜູ້​ສົງ​ໃສ​ຕິດພະຍາດ​ອີ​ໂບ​ລາ ຢູ່​ໃນ​ປະເທດ​ນີ້. ອົງການ​ທີ່​ກ່ຽວຂ້ອງ ບໍ່​ໄດ້​ແກ້​ໄຂ​ກໍລະນີ​ຄົນ​ເຈັບ​ທີ່​ເສຍ​ຊີວິດ​ໃນ​ວັນ​ທີ 8 ກັນຍາ ຈຶ່ງ​ບໍ່​ສາມາດ​ສະໜອງ​ຂໍ້​ມູນ​ເພີ່ມ​ເຕີມ​ໄດ້.

    WHO ໄດ້​ສະເໜີ​ໄປ​ຍັງ​ອົງການ​ທີ່​ກ່ຽວຂ້ອງ​ຂອງ​ຕັງ​ຊາ​ນີ ໃຫ້​ສະໜອງ​ຂໍ້​ມູນ​ທົ່ວ​ໄປ ຜົນ​ການ​ສືບສວນ​ສອບ​ສວນ ແລະ ຂໍ້​ມູນ​ຂ່າວສານ​ອີກ​ຈຳນວນ​ໜຶ່ງ ແຕ່​ກໍ​ບໍ່​ໄດ້​ຮັບ​ການ​ຕອບ​ສະໜອງ. WHO ເຫັນ​ວ່າການ​ກະທຳ​ຄື​ດັ່ງກ່າວ​ຂອງ​ຕັງ​ຊາ​ນີ ເປັນຄວາມ​ທ້າ​ທາຍ​ຕໍ່​ການ​ປ້ອງ​ກັນ​ພະຍາດ. ທາງ​ດ້ານ​ເຈົ້າ​ໜ້າທີ່​ຂອງ​ຕັງ​ຊາ​ນີ ຍັງ​ບໍ່​ທັນ​ມີ​ການ​ວິພາກ​ວິຈານ​ອອກ​ມາ ກ່ຽວ​ກັບ​ການ​ກ່າວ​ຫາ​ຂອງ WHO ນັ້ນ.

ຂ່າວທີ່ກ່ຽວຂ້ອງ