ຂ່າວຫຼ້າສຸດ

ງານວາງສະແດງສິນຄ້າມະຫັດສະຈັນ ອິນໂດເນເຊຍ 2019

185 24 ກ.ຍ. 2019 ຂ່າວໜ້າ​ໜຶ່ງ
ງານວາງສະແດງສິນຄ້າມະຫັດສະຈັນ ອິນໂດເນເຊຍ 2019

    ໃນ​ວັນ​ທີ 20-22 ກັນ­ຍາ 2019 ທີ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ນະ­ຄອນ­ຫຼວງ​ວຽງ​ຈັນ ສະ­ຖານ­ທູດ​ອິນ​ໂດ​ເນ​ເຊຍ​ປະ­ຈຳ​ລາວ ຈັດ​ງານ​ວາງ­ສະ­ແດງ​ສິນ­ຄ້າ​ໃນ​ຫົວ­ຂໍ້: ງານ​ວາງ­ສະ­ແດງ​ສິນ­ຄ້າ​ມະ­ຫັດ­ສະ­ຈັນ​ອິນ​ໂດ​ເນ​ເຊຍ 2019 ເປັນ​ປະ­ທານ​ຂອງ​ທ່ານ ປາ​ຕີ​ໂຕ ຊູ​ຮາ​ໂຍ ເອກ​ອັກ​ຄະ​ລັດ​ຖະ​ທູດ​ອິນ​ໂດ​ເນ​ເຊຍ​ປະ­ຈຳ​ລາວ ມີ​ທ່ານ ສົມ​ຈິດ ອິນ​ທະ​ມິດ ຮອງ​ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ພ້ອມ​ດ້ວຍ​ບັນ­ດາ​ທູ­ຕາ­ນຸ­ທູດ ອົງ​ການ­ຈັດ­ຕັ້ງ​ສາ­ກົນ ແຂກ​ຖືກ​ເຊີນ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ປາ​ຕີ​ໂຕ ຊູ​ຮາ​ໂຍ ໄດ້​ກ່າວ​ສະ­ແດງ​ຄວາມ​ຍິນ​ດີ​ຕ້ອນ­ຮັບ​ບັນ­ດາ​ແຂກ​ທີ່​ເຂົ້າ​ຮ່ວມ​ງານ​ຄັ້ງ​ນີ້ ເປັນ​ໜຶ່ງ​ໃນ​ກິດ­ຈະ­ກຳ​ຂອງ​ການ​ພົບ​ປະ​ໂອ້​ລົມ ລະ­ຫວ່າງ​ປະ­ທາ­ນາ­ທິ­ບໍ­ດີ ສາ­ທາ­ລະ­ນະ​ລັດ ອິນ​ໂດ​ເນ​ເຊຍ ທ່ານ ໂຈ​ໂກ ວິ​ໂດ​ໂດ ແລະ ນາ­ຍົກ­ລັດ­ຖະ­ມົນ­ຕີ​ລາວ ໃນ​ເດືອນ​ຕຸ­ລາ 2017 ເຊິ່ງ​ຜູ້­ນຳ​ທັງ​ສອງ​ປະ­ເທດ​ໄດ້​ເຫັນ​ດີ​ຈະ​ເພີ່ມ​ທະ­ວີ​ການ​ພົວ­ພັນ​ຮ່ວມ​ມື​ທາງ​ດ້ານ​ການ​ທູດ ແລະ ເສດ­ຖະ­ກິດ ການ­ທ່ອງ­ທ່ຽວ​ຂອງ​ສອງ​ປະ­ເທດ​ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

    ງານ​ວາງ­ສະ­ແດງ​ຄັ້ງ​ນີ້ ເປັນ​ການ­ສະ­ແດງ​ສິນ­ຄ້າ​ທຸ­ລະ​ກິດ​ຂອງ​ປະ­ເທດ​ອິນ​ໂດ​ເນ​ເຊຍ 22 ຫົວ­ໜ່ວຍ​ທຸ­ລະ​ກິດ ມີ​ຫຼາຍ​ປະ­ເພດ ເຊັ່ນ: ອາ­ຫານ ເຄື່ອງ­ນຸ່ງ​ຫົ່ມ ບໍ­ລິ­ສັດ​ຕົວ​ແທນ​ການ​ເດີນ­ທາງ ການ­ທ່ອງ­ທ່ຽວ ຜະ­ລິດ​ຕະ​ພັນ​ຝຸ່ນ​ເຄ​ມີ ແລະ ເຄື່ອງ​ດື່ມ ເຊິ່ງ​ເປັນ​ບໍ­ລິ­ສັດ​ໃໝ່ ແລະ ຫວັງ​ວ່າ​ຈະ​ສາ­ມາດ​ຍາດ​ໄດ້​ໂອ­ກາດ​ທີ່​ຈະ​ມາ​ລົງ­ທຶນ​ຢູ່​ລາວ ໃນ​ນາມ​ສະ­ຖານ­ທູດ​ຕົວ​ແທນ​ໃຫ້​ປະ­ຊາ­ຊົນ​ອິນ​ໂດ​ເນ​ເຊຍ ຂໍ​ສະ­ແດງ​ຄວາມ​ຂອບ­ໃຈ​ນຳ ພັກ-ລັດ­ຖະ­ບານ​ລາວ ແລະ ບັນ­ດາ​ແຂກ​ທີ່​ເຂົ້າ​ຮ່ວມ​ງານ​ຄັ້ງ​ນີ້ ຈະ​ສາ­ມາດ​ສ້າງ​ຄວາມ​ປະ​ທັບ​ໃຈ​ໃຫ້​ບັນ­ດາ​ທ່ານ​ເປັນ​ການ​ປະ­ກອບ­ສ່ວນ​ເພີ່ມ​ພູນ​ຄູນ​ສ້າງ ສາຍ​ພົວ­ພັນ​ມິດ­ຕະ­ພາບ ແລະ ຮ່ວມ​ມື​ລະ­ຫວ່າງ​ສອງ​ປະ­ເທດ​ໃຫ້​ນັບ​ມື້​ມີ​ບາດ­ກ້າວ​ຂະ­ຫຍາຍ­ຕົວ​ຢ່າງ​ບໍ່​ຢຸດ​ຢັ້ງ.

ຂ່າວທີ່ກ່ຽວຂ້ອງ