ຂ່າວຫຼ້າສຸດ

ເຊີນເຂົ້າຮ່ວມບໍລິການ ສັກຢາວັກຊິນກັນວໍ້ສັດລ້ຽງ ໂດຍບໍ່ເສຍຄ່າ

158 24 ກ.ຍ. 2019 ຂ່າວໜ້າ​ໜຶ່ງ

    ກະ­ຊວງ​ສາ­ທາ­ລະ­ນະ​ສຸກ ກະ­ຊວງ​ກະ­ສິ­ກຳ ແລະ ປ່າ­ໄມ້ ຮ່ວມ​ກັບ​ອົງ­ການ​ອະ­ນາ­ໄມ​ໂລກ​ປະ­ຈຳ​ລາວ ໄດ້​ຈັດ​ຖະ­ແຫຼງ​ຂ່າວ​ສະ­ເຫຼີມ­ສະ­ຫຼອງ​ວັນ​ຕ້ານ​ພະ­ຍາດ​ວໍ້​ໂລກ​ຂຶ້ນ​ວັນ​ທີ 20 ກັນ­ຍາ 2019 ທີ່​ກະ­ຊວງ​ສາ­ທາ­ລະ­ນະ​ສຸກ ຖະ­ແຫຼງ​ຂ່າວ​ໂດຍ​ທ່ານ  ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ບຸນ​ຂວາງ ຄຳ​ບຸນ​ເຮືອງ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ແລະ ທ່ານ ມາກ ແອນ​ດິວ ເຈ​ໂຄບ ຕາງ­ໜ້າ​ອົງ­ການ​ອະ­ນາ­ໄມ​ໂລກ​ປະ­ຈຳ​ລາວ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ພູ­ທອນ ເມືອງ​ປາກ ກ່າວ​ວ່າ: ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ຕ້ານ​ພະ­ຍາດ​ວໍ້​ສາ­ກົນ 28 ກັນ­ຍາ ພະ­ຍາດ​ນີ້​ເປັນ​ພະ­ຍາດ​ທີ່​ຮ້າຍ​ແຮງ​ຊະ­ນິດ​ໜຶ່ງ​ເຊິ່ງ​ຕິດ­ຕໍ່​ຈາກ​ສັດ​ສູ່​ຄົນ ສາ­ເຫດ​ເກີດ​ຈາກ​ເຊື້ອ Rabies Virus ສາຍ​ພັນ Lyssa virus ເຊື້ອ​ພະ­ຍາດ​ນີ້​ສາ­ມາດ​ຕິດ­ແປດ​ໃສ່​ສັດ​ເລືອດ​ອຸ່ນ​ທຸກ​ຊະ­ນິດ ເຊັ່ນ: ໝາ ແມວ ງົວ ຄວາຍ ລີງ ຊະ­ນີ ກະ­ຮອກ ກະ­ແຕ ເສືອ ໝີ ໜູ ເຈຍ ແລະ​ອື່ນໆ ລວມ​ທັງ​ຄົນ ການ​ຕິດ­ເຊື້ອ​ຜ່ານ​ທາງ­ນ້ຳ​ລາຍ​ຂອງ​ສັດ​ທີ່​ເປັນ​ພະ­ຍາດ​ວໍ້​ເຂົ້າ​ສູ່​ບາດ­ແຜ​ດ້ວຍ​ການ​ຖືກ​ສັດ​ກັດ ຫຼື ຄູດ​ເລຍ ໂດຍ​ນ້ຳ­ລາຍ​ເດັນ​ເຂົ້າ​ທາງ​ຜິວ­ໜັງ​ທີ່​ມີ​ບາດ­ແຜ ທາງ​ຕາ ຫຼື ທາງ​ປາກ ສຳ­ລັບ​ລາວ​ເຮົາ​ລັດ­ຖະ­ບານ​ໄດ້​ຮັບ­ຮອງ​ຍຸດ​ທະ​ສາດ​ການ​ລົບ​ລ້າງ​ພະ­ຍາດ​ວໍ້​ໃນ​ບັນ­ດາ​ປະ­ເທດ​ອາ​ຊຽນ ໂດຍ​ໄດ້​ຮ່າງ​ຍຸດ​ທະ​ສາດ​ແຫ່ງ​ຊາດ ວ່າ​ດ້ວຍ​ການ​ກັນ ແລະ ຄວບ​ຄຸມ­ພະ​ຍາດ​ວໍ້ ກວມ​ເອົາ​ອົງ​ປະ­ກອບ​ດ້ານ​ສຸ­ຂະ­ພາບ​ຄົນ ສຸ­ຂະ­ພາບ​ສັດ ແລະ ການ​ປະ­ສານ​ງານ​ກັບ​ຫຼາຍ​ຝ່າຍ ເພື່ອ​ໃຫ້​ປະ­ສົບ​ຜົນ­ສຳ­ເລັດ​ໃນ​ການ​ລົບ​ລ້າງ​ພະ­ຍາດ​ວໍ້ ພາຍ​ໃນ​ປີ 2030 ຂອງ​ອົງ­ການ​ອະ­ນາ­ໄມ​ໂລ​ກວາງ​ອອກ ພ້ອມ​ນັ້ນ ຍັງ​ໄດ້​ຖື​ເອົາ​ພະ­ຍາດ​ນີ້​ເປັນ​ໜຶ່ງ​ໃນ​ພະ­ຍາດ​ບູ​ລິ​ມະ​ສິດ ແລະ ໄດ້​ເອົາ​ເຂົ້າ​ໃນ​ລະ­ບົບ​ເຝົ້າ​ລະ­ວັງ​ແຫ່ງ​ຊາດ ໃນ​ທ້າຍ​ປີ 2018 ແລະ ເລີ່ມ​ຈັດ​ຕັ້ງ​ປະ­ຕິ­ບັດ ຕົ້ນ​ປີ 2019 ເປັນ­ຕົ້ນ​ມາ ນັບ​ແຕ່​ປີ 2012-2019 ລາວ​ເຮົາ​ມີ​ກໍ­ລະ­ນີ​ສະ​ສົມ​ສັດ​ກັດ​ຄົນ ທັງ​ໝົດ 270 ຄົນ  ໃນ​ນັ້ນ ເສຍ​ຊີ­ວິດ 29 ຄົນ.

    ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ດັ່ງ­ກ່າວ ກະ­ຊວງ​ສາ­ທາ­ລະ­ນະ​ສຸກ ຮ່ວມ​ກັບ​ກະ­ຊວງ​ກະ­ສິ­ກຳ ແລະ ປ່າ­ໄມ້ ຈະ​ໄດ້​ຈັດ​ຊຸມ­ນຸມ​ສະ­ເຫຼີມ­ສະ­ຫຼອງ​ວັນ​ຕ້ານ​ພະ­ຍາດ​ວໍ້​ໂລກ​ຂຶ້ນ ໃນ​ວັນ​ທີ 27 ກັນ­ຍາ 2019 ທີ່​ສວນ​ເຈົ້າ­ຟ້າ​ງຸ່ມ ເລີ່ມ​ແຕ່ 8-16:00 ໂມງ ເຊິ່ງ​ຈະ​ມີ​ບໍ­ລິ­ການ​ສັກ​ຢາ​ວັກ​ຊິນ​ກັນ​ວໍ້​ໂດຍ​ບໍ່​ເສຍ​ຄ່າ ແລະ ເຜີຍ­ແຜ່​ຄວາມ​ຮູ້​ໃນ​ການ​ປ້ອງ​ກັນ​ພະ­ຍາດ​ດັ່ງ­ກ່າວ.

ຂ່າວທີ່ກ່ຽວຂ້ອງ