ຂ່າວຫຼ້າສຸດ

ຄນລ 485 ຄົນ ສຳເລັດການສຶກສາ ພ້ອມຮັບໃຊ້ສັງຄົມ

181 24 ກ.ຍ. 2019 ຂ່າວໜ້າ​ໜຶ່ງ

    ຄະ­ນະ​ນິ­ຕິ­ສາດ ແລະ ລັດ­ຖະ­ສາດ (ຄນລ) ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ຈັດ​ພິ­ທີ​ສະ­ຫຼຸບ​ສົກ­ຮຽນ 2018-2019 ແລະ ໄຂ​ສົກ­ຮຽນ 2019-2020 ຂຶ້ນ​ວັນ​ທີ 20 ກັນ­ຍາ 2019 ຢູ່​ຄະ­ນະ​ດັ່ງ­ກ່າວ ໂດຍ​ມີ​ທ່ານ ສົມ​ສີ ຍໍ​ພັນ​ໄຊ ອະ­ທິ­ການ​ບໍ­ດີ ມຊ ມີ​ຄະ­ນະ­ບໍ­ດີ ຮອງ​ອະ­ທິ­ການ​ບໍ­ດີ ຄູ-ອາ­ຈານ ນັກ​ສຶກ​ສາ​ເຂົ້າ​ຮ່ວມ.

    ທ່ານ ວຽງ​ວິ­ໄລ ທ່ຽງ​ຈັນ​ໄຊ ຄະ­ນະ­ບໍ­ດີ ຄນລ ກ່າວ​ວ່າ: ຄນລ ມີ​ພະ­ນັກ­ງານ 101 ຄົນ ຍິງ 45 ຄົນ ໃນ​ນີ້​ເປັນ​ອາ­ຈານ​ສອນ 80 ຄົນ ມີ​ນັກ​ສຶກ​ສາ 1.833 ຄົນ ຍິງ 800 ຄົນ ສົກ­ຮຽນ 2018-2019 ຄນລ ໄດ້​ດຳ­ເນີນ​ການ​ຮຽນ-ການ​ສອນ​ລະ­ດັບ​ປະ­ລິນ­ຍາ​ຕີ 9 ຫຼັກ­ສູດ ປະ­ລິນ­ຍາ​ໂທ 4 ຫຼັກ­ສູດ ປະ­ກອບ​ມີ 5 ພາກ​ວິ­ຊາ: ວິ­ຊາ​ກົດ­ໝາຍ​ແພ່ງ ກົດ­ໝາຍ​ອາ­ຍາ ກົດ­ໝາຍ​ທຸ­ລະ​ກິດ ລັດ­ຖະ­ສາດ ແລະ ການ​ພົວ­ພັນ​ສາ­ກົນ ຜ່ານ​ການ​ຄົ້ນ­ຄວ້າ​ຮ່ຳ­ຮຽນ 2-4 ປີ ມີ​ນັກ​ສຶກ​ສາ​ສຳ­ເລັດ​ການ​ສຶກ​ສາ​ໃນ​ສາ­ຂາ​ວິ­ຊາ​ຕ່າງໆ 485 ຄົນ ຍິງ 157 ຄົນ ໃນ​ນີ້ ປະ­ລິນ­ຍາ​ໂທ 24 ຄົນ ຍິງ 6 ຄົນ ປະ­ລິນ­ຍາ​ຕີ 461 ຄົນ ຍິງ 151 ຄົນ ພິ­ເສດ​ນັກ​ສຶກ​ສາ​ທີ່​ໄດ້​ຮັບ​ໃບ​ປະ­ກາດ​ແດງ 6 ຄົນ ຍິງ 4 ຄົນ.

    ໂດຍ​ສືບ­ຕໍ່​ປະ­ຕິ­ບັດ​ຍຸດ​ທະ​ສາດ​ຂອງ​ຄະ­ນະ​ວິ­ຊາ ແລະ ແກ້​ໄຂ​ສິ່ງ​ທ້າ​ທາຍ​ຕ່າງໆ ຄນລ ຈະ​ເລັ່ງ​ໃສ່​ວຽກ​ງານ​ຈຸດ​ສຸມ ຄື: ການ​ພັດ­ທະ­ນາ​ຫຼັກ­ສູດ: ປະ­ລິນ­ຍາ​ຕີ​ພາກ​ພື້ນ ຫຼັກ­ສູດ​ນາໆຊາດ ຫຼັກ­ສູດ​ປະ­ລິນ­ຍາ​ໂທ ແລະ ການ​ກະ ກຽມ​ຫຼັກ­ສູດ​ປະ­ລິນ­ຍາ​ເອກ ພ້ອມ​ທັງ​ໃຫ້​ມີ​ຫຼັກ­ສູດ​ເລັ່ງ​ລັດ​ຈຳ­ນວນ​ໜຶ່ງ​ຕາມ​ຄວາມ​ຕ້ອງ­ການ​ຂອງ​ສັງ­ຄົມ ຍົກ​ລະ­ດັບ​ທັກ​ສະ​ວິ­ຊາ​ສະ­ເພາະ ແລະ ທັກ​ສະ­ການ​ໃຊ້​ສິດ­ສອນ​ຂອງ​ອາ­ຈານ​ຢ່າງ​ຕໍ່​ເນື່ອງ ແລະ ເປັນ​ລະ­ບົບ ການ​ປະ­ກັນ​ຄຸນ​ນະ​ພາບ​ການ​ສຶກ​ສາ AUN-QA level 4 ສືບ­ຕໍ່​ການ​ຄົ້ນ­ຄວ້າ​ວິ­ທະ­ຍາ­ສາດ ແລະ ບໍ­ລິ­ການ​ວິ­ຊາ​ການ​ທີ່​ສາ­ມາດ​ນຳ​ໃຊ້ ແລະ ສັງ­ຄົມ​ມີ​ຄວາມ​ຕ້ອງ­ການ ປະ­ຕິ­ບັດ​ເຂັ້ມ​ງວດ​ຂໍ້​ແຂ່ງ­ຂັນ ສອນ​ດີ-ຮຽນ​ເກ່ງ ຕ້ານ​ປາ­ກົດ­ການ​ຫຍໍ້­ທໍ້​ໃນ​ຂະ ແໜງ​ການ​ສຶກ​ສາ ສ້າງ​ສິ່ງ​ອຳ­ນວຍ​ຄວາມ​ສະ­ດວກ ແລະ ສະ­ພາບ​ແວດ​ລ້ອມ ການ​ຮຽນ-ການ​ສອນ​ໃຫ້​ດີ​ຂຶ້ນ.

ຂ່າວທີ່ກ່ຽວຂ້ອງ