ຂ່າວຫຼ້າສຸດ

ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ປະສົບໄພນ້ຳຖ້ວມ

208 24 ກ.ຍ. 2019 ຂ່າວໜ້າ​ໜຶ່ງ
ມອບເຄື່ອງຊ່ວຍເຫຼືອໃຫ້ປະຊາຊົນ ທີ່ປະສົບໄພນ້ຳຖ້ວມ

    ຄອບ­ຄົວ​ຄຸດ​ໄພ­ທູນ ແລະ ຄອບ­ຄົວ​ມະ­ຫາ­ວົງ ໄດ້​ນຳ​ເອົາ​ເຄື່ອງ​ອຸ­ປະ­ໂພກ-ບໍ­ລິ­ໂພກ ເປັນ­ຕົ້ນ ເຂົ້າ ສານ ອາ­ຫານ​ແຫ້ງ ນ້ຳ​ດື່ມ ມອບ​ໃຫ້​ປະ­ຊາ­ຊົນ​ເມືອງ​ເຊ​ໂປນ ເມືອງ​ພີນ ແລະ ເມືອງ​ວິ­ລະ​ບູ​ລີ ແຂວງ​ສະ ຫວັນ​ນະ​ເຂດ ທີ່​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ ລວມ​ມູນ​ຄ່າ 40 ລ້ານ​ກີບ.

    ພິ­ທີ​ມອບ​ໄດ້​ຈັດ​ຂຶ້ນ​ວັນ​ທີ 21 ກັນ­ຍາ 2019 ທີ່​ຫ້ອງ​ວ່າ­ການ​ປົກ­ຄອງ​ເມືອງ​ເຊ​ໂປນ  ຕາງ­ໜ້າ​ໃຫ້​ສອງ​ຄອບ­ຄົວ​ກ່າວ​ມອບ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ແລະ ກ່າວ​ຮັບ​ໂດຍ​ທ່ານ​ເຈົ້າ­ເມືອງ​ທັງ​ສາມ​ເມືອງ ມີ​ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສິນ​ລະ​ວົງ ຄຸດ​ໄພ­ທູນ ໄດ້​ສະ­ແດງ​ຄວາມ​ເສຍ​ໃຈ​ຕໍ່​ກັບ​ເຫດ­ການ​ທີ່​ເກີດ​ຂຶ້ນ​ໃນ​ເທື່ອ​ນີ້ ພ້ອມ​ທັງ​ຮຽກ­ຮ້ອງ​ໃຫ້​ບັນ­ດາ​ເມືອງ​ເອົາ­ໃຈ­ໃສ່​ໃນ​ການ​ຟື້ນ​ຟູ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ ໂດຍ​ເລັ່ງ​ໃສ່​ການ​ລົງ​ເກັບ​ກຳ​ຂໍ້​ມູນ​ລະ­ອຽດ​ເພື່ອ​ລາຍ​ງານ​ຕໍ່​ຂັ້ນ​ເທິງ ສົມ­ທົບ​ກັບ​ຂະ­ແໜງ­ການ​ກ່ຽວ­ຂ້ອງ​ໃນ​ການ​ສົ່ງ­ເສີມ​ການ​ຜະ­ລິດ​ເພື່ອ​ທົດ​ແທນ​ຜົນ​ຜະ­ລິດ​ທີ່​ເສຍ​ຫາຍ​ໄປ ສ່ວນ​ເສັ້ນ­ທາງ​ຄົມ­ມະ­ນາ­ຄົມ​ຕ້ອງ​ໄດ້​ຮີບ​ຮ້ອນ​ໃນ​ການ​ແກ້​ໄຂ​ສ້ອມ­ແປງ ເນື່ອງ​ຈາກ​ເສັ້ນ­ທາງ​ຄົມ­ມະ­ນາ­ຄົມ​ແມ່ນ​ອີກ​ປັດ​ໄຈ​ສຳ­ຄັນ​ໃນ​ການ​ພັດ­ທະ­ນາ ແລະ ການ​ເຂົ້າ​ເຖິງ​ດ້ານ​ຕ່າງໆ​ຂອງ​ປະ­ຊາ­ຊົນ.

    ສຳ­ລັບ​ສະ­ພາບ​ນ້ຳ​ຖ້ວມ​ໃນ​ສາມ​ເມືອງ ເລີ່ມ​ຈາກ​ເມືອງ​ເຊ​ໂປນ ມີ​ບ້ານ​ໄດ້​ຮັບ​ຜົນ​ກະ­ທົບ 42 ບ້ານ 3.532 ຄອບ­ຄົວ ເນື້ອ­ທີ່​ນາ 1.000 ກວ່າ​ເຮັກ­ຕາ ສວນ​ກ້ວຍ 65 ເຮັກ­ຕາ ແລະ ໜອງ​ປາ 18 ໜອງ ພື້ນ­ຖານ​ໂຄງ​ລ່າງ​ເສັ້ນ­ທາງ​ຄົມ­ມະ­ນາ­ຄົມ​ໄດ້​ຮັບ​ຜົນ​ກະ­ທົບ​ຫຼາຍ​ສົມ­ຄວນ ເມືອງ​ພີນ ຖືກ​ຖ້ວມ 50 ບ້ານ 2.059 ຄອບ­ຄົວ 9.362 ຄົນ ເນື້ອ­ທີ່​ການ​ຜະ­ລິດ 1.064 ເຮັກ­ຕາ ໜອງ​ປາ 182 ໜອງ ສັດ­ລ້ຽງ​ໄດ້​ຮັບ​ຄວາມ​ເສຍ​ຫາຍ ໂຮງ­ຮຽນ​ໄດ້​ຢຸດ​ການ​ຮຽນ​ໄປ​ໄລ­ຍະ​ໜຶ່ງ ແລະ ເສັ້ນ­ທາງ​ຄົມ­ມະ­ນາ­ຄົມ​ຫຼາຍ​ຈຸດ​ຖືກ­ເສຍ​ຫາຍ​ເປ່​ເພ ແລະ ເມືອງ​ວິ­ລະ​ບູ​ລີ ໄດ້​ຮັບ​ຜົນ​ກະ­ທົບ 72 ບ້ານ 6.000 ກວ່າ​ຄອບ­ຄົວ ເນື້ອ­ທີ່​ນາ 4.800 ກວ່າ​ເຮັກ­ຕາ ໜອງ​ປາ 114 ໜອງ ສັດ­ລ້ຽງ​ໄດ້​ຮັບ​ຄວາມ​ເສຍ​ຫາຍ ເສັ້ນ­ທາງ​ໄດ້​ຮັບ​ຜົນ​ກະ­ທົບ 21 ຈຸດ ໂຮງ­ຮຽນ​ໄດ້​ໂຈະ​ການ​ຮຽນ 4 ແຫ່ງ ແລະ​ອື່ນໆ.

ຂ່າວທີ່ກ່ຽວຂ້ອງ