ຂ່າວຫຼ້າສຸດ

ປະທານປະເທດ ເນັ້ນໃຫ້ເມືອງໄຊເສດຖາ ສຸມໃສ່ແກ້ໄຂບັນຫາຢ່າງເດັດຂາດ

366 24 ກ.ຍ. 2019 ຂ່າວໜ້າ​ໜຶ່ງ
ປະທານປະເທດ ເນັ້ນໃຫ້ເມືອງໄຊເສດຖາ ສຸມໃສ່ແກ້ໄຂບັນຫາຢ່າງເດັດຂາດ

    ວັນ​ທີ 23 ກັນ­ຍາ 2019 ທີ່​ຫ້ອງ​ວ່າ­ການ​ປົກ­ຄອງ​ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ທ່ານ ບຸນ​ຍັງ ວໍ­ລະ​ຈິດ ເລ­ຂາ­ທິ­ການ​ໃຫຍ່​ຄະ­ນະ​ບໍ­ລິ­ຫານ​ງານ​ສູນ​ກາງ​ພັກ ປະ­ທານ​ປະ­ເທດ ໄດ້​ລົງ​ຢ້ຽມ­ຢາມ​ພົບ​ປະ​ໂອ້​ລົມ ແລະ ເຮັດ​ວຽກ​ກັບ​ການ​ນຳ ແລະ ພະ­ນັກ­ງານ​ຫຼັກ​ແຫຼ່ງ ເມືອງ​ໄຊ​ເສດ​ຖາ ຖືກ​ຕ້ອນ­ຮັບ​ໂດຍ​ທ່ານ ຖະ­ໜອມ ທຳ​ທອງ ເຈົ້າ­ເມືອງ​ໄຊ​ເສດ​ຖາ ມີ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ບັນ­ດາ​ຫົວ­ໜ້າ​ກົມ ແລະ ພະ​ແນ​ການ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ ຖະ­ໜອມ ທຳ​ທອງ ໄດ້​ລາຍ​ງານ​ການ​ຊີ້​ນຳ-ນຳ­ພາ​ວຽກ​ງານ​ຮອບ­ດ້ານ​ຂອງ​ເມືອງ​ໄຊ​ເສດ​ຖາ​ໃນ​ແຕ່​ລະ​ຂົງ­ເຂດ​ເປັນ­ຕົ້ນ ການ​ນຳ­ພາ​ການ­ເມືອງ-ແນວ​ຄິດ ປ້ອງ​ກັນ​ຊາດ-ປ້ອງ​ກັນ​ຄວາມ​ສະ­ຫງົບ ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ແນວ​ລາວ​ສ້າງ​ຊາດ ສະ­ຫະ­ພັນ​ນັກ­ຮົບ​ເກົ່າ ອົງ​ການ­ຈັດ­ຕັ້ງ​ມະ­ຫາ­ຊົນ ວຽກ​ງານ​ພັກ ພະ­ນັກ­ງານ  ແລະ ວຽກ​ງານ​ອົງ­ການ​ປົກ­ຄອງ​ໃນ​ໄລ­ຍະ​ຜ່ານ​ມາ ແລະ ທິດ​ທາງ​ແຜນ­ການ​ຕໍ່­ໜ້າ ໂດຍ​ສະ­ເພາະ ການ​ກະ­ກຽມ​ກອງ​ປະ­ຊຸມ​ໃຫຍ່ 3 ຂັ້ນ​ຂອງ​ພັກ​ທີ່​ຫຼາຍ​ໜ່ວຍ​ພັກ​ຂັ້ນ​ບ້ານ ພ້ອມ​ກັນ​ຈັດ​ຕັ້ງ​ດຳ­ເນີນ​ກອງ​ປະ­ຊຸມ​ໃຫຍ່​ຂອງ​ພັກ​ຕົນ ພ້ອມ​ດຽວ​ກັນ​ນີ້ ທ່ານ​ເຈົ້າ­ເມືອງ​ຍັງ​ໄດ້​ສະ­ເໜີ​ບັນ­ຫາ​ຕ່າງໆ​ຕໍ່​ທ່ານ​ປະ­ທານ​ປະ­ເທດ ເພື່ອ​ຂໍ​ທິດ​ທາງ​ໃນ​ການ​ປັບ­ປຸງ ແລະ ການ​ແກ້​ໄຂ​ໃນ­ຕໍ່­ໜ້າ​ຕື່ມ​ອີກ ເປັນ­ຕົ້ນ ບັນ­ຫາ​ການ​ອະ­ນຸ­ມັດ​ງົບ­ປະ­ມານ​ໃຫ້​ທ້ອງ­ຖິ່ນ​ນຳ​ໃຊ້ ໂດຍ​ສະ­ເພາະ ເມືອງ​ໄຊ​ເສດ​ຖາ​ໃນ​ໄລ­ຍະ​ຜ່ານ​ມາ​ມີ​ຄວາມ​ຕ້ອງ­ການ​ທຶນ 568,52 ຕື້​ກີບ ແຕ່​ການ​ອະ­ນຸ­ມັດ​ຕົວ​ຈິງ​ມີ​ພຽງ​ແຕ່ 20,69 ຕື້​ກີບ ເຫັນ​ວ່າ​ຂັ້ນ​ເທິງ​ອະ­ນຸ­ມັດ​ໃຫ້​ໜ້ອຍ​ສະ­ເລ່ຍ​ພຽງ​ແຕ່ 3% ບັນ­ຫາ​ຢາ​ເສບ​ຕິດ ຂໍ້​ຂັດ​ແຍ່ງ​ທາງ​ດ້ານ​ທີ່​ດິນ ຄວາມ​ບໍ່​ສະ­ອາດ​ຕາມ​ເສັ້ນ­ທາງ​ສາຍ​ຫຼັກ​ໃນ​ຕົວ​ເມືອງ ການ​ກໍ່­ສ້າງ​ຂະ­ຫຍາຍ​ພັກ ແລະ ອື່ນໆ​ທີ່​ຍັງ​ເປັນ​ສິ່ງ​ທ້າ​ທາຍ​ຈະ​ຕ້ອງ​ໄດ້​ແກ້​ໄຂ​ໃນ​ສະ­ເພາະ​ໜ້າ ແລະ ຍາວ​ນານ.

    ໂອ­ກາດ​ນີ້ ທ່ານ ບຸນ​ຍັງ ວໍ­ລະ​ຈິດ ໄດ້​ສະ­ແດງ​ຄວາມ​ຍ້ອງ­ຍໍ​ຊົມ­ເຊີຍ​ຕໍ່​ບັນ­ດາ​ຜົນ­ງານ ທີ່​ເມືອງ​ໄຊ​ເສດ​ຖາ​ຍາດ​ມາ​ໄດ້​ໃນ​ໄລ­ຍະ​ຜ່ານ​ມາ ພ້ອມ​ນີ້ ທ່ານ​ຍັງ​ໄດ້​ເນັ້ນ​ໃຫ້​ອຳ­ນາດ​ການ​ປົກ­ຄອງ​ເມືອງ​ໄຊ​ເສດ​ຖາ ກໍ​ຄື ຂະ­ແໜງ­ການ​ທີ່​ກ່ຽວ­ຂ້ອງ​ເອົາ­ໃຈ­ໃສ່​ໃນ​ການ­ຈັດ­ຕັ້ງ​ປະ­ຕິ­ບັດ​ການ​ສຶກ​ສາ​ອົບ­ຮົມ ການ­ເມືອງ-ແນວ​ຄິດ ແນວ­ທາງ​ນະ­ໂຍ­ບາຍ​ຂອງ​ພັກ ແລະ ລະ­ບຽບ​ກົດ­ໝາຍ​ຂອງ​ລັດ ເຊິ່ງ​ບັນ­ຫາ​ດັ່ງ­ກ່າວ​ເປັນ​ບັນ­ຫາ​ທີ່​ຕັດ­ສິນ ການ​ປະ­ຕິ­ບັດ​ໜ້າ­ທີ່​ວຽກ​ງານ​ຂອງ​ແຕ່​ລະ​ຂະ­ແໜງ­ການ ການ​ນຳ​ໃຊ້​ສິດ​ປະ­ຊາ­ທິ­ປະ­ໄຕ​ເຂົ້າ​ໃນ​ການ​ພັດ­ທະ­ນາ ວຽກ​ງານ​ເສດ­ຖະ­ກິດ-ສັງ­ຄົມ ການ​ແກ້​ໄຂ​ບັນ­ຫາ​ສັງ­ຄົມ ໄພ​ວ່າງ​ງານ ການ​ສຶກ​ສາ ສາ­ທາ­ລະ­ນະ​ສຸກ ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ 6ສ ຂອງ​ນະ­ຄອນ­ຫຼວງ​ວຽງ​ຈັນ​ວາງ​ອອກ ການ​ເກັບ​ລາຍ​ຮັບ​ເຂົ້າ​ງົບ­ປະ­ມານ ການ​ແກ້​ໄຂ​ໜີ້​ສິນ ແລະ ຂໍ້­ຄົງ­ຄ້າງ​ຕ່າງໆ ຍົກ​ລະ­ດັບ​ສີ­ມື​ແຮງ​ງານ ການ​ສ້າງ​ວຽກ​ເຮັດ​ງານ​ທຳ​ໃຫ້​ກັບ​ຊາວ​ໜຸ່ມ-ໄວ​ໜຸ່ມ ຕະ­ຫຼາດ​ຈຳ­ໜ່າຍ​ສິນ­ຄ້າ ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ ການ​ແກ້​ໄຂ​ຮ່ອງ​ລະ­ບາຍ​ນ້ຳ ເປັນ­ຕົ້ນ ການ​ເກີດ​ຜັກ​ຕົບ​ຢູ່​ບໍ­ລິ­ເວນ​ຮ່ອງ​ລະ­ບາຍ​ນ້ຳ ການ​ຜະ­ລິດ​ສິນ­ຄ້າ​ກະ­ສິ­ກຳ​ເປັນ​ສິນ­ຄ້າ ແລະ​ອື່ນໆ ເຊິ່ງ​ການ​ແກ້​ໄຂ​ບັນ­ຫາ​ເຫຼົ່າ​ນີ້​ຕ້ອງ​ເອົາ­ໃຈ­ໃສ່​ຢ່າງ​ຈິງ​ຈັງ ເດັດ­ຂາດ ແລະ ເໝາະ​ສົມ ນຳ­ພາ​ຢ່າງ​ໃກ້­ຊິດ­ຕິດ­ແທດ​ຈຶ່ງ​ຈະ​ເຮັດ​ໃຫ້​ແກ້​ໄຂ​ບັນ­ຫາ​ຢ່າງ​ມີ​ປະ​ສິດ­ທິ​ຜົນ​ໄດ້.

ຂ່າວທີ່ກ່ຽວຂ້ອງ