ຂ່າວຫຼ້າສຸດ

...ການໂຈມຕີໂຮງກັ່ນນໍ້າມັນ...

1.704 25 ກ.ຍ. 2019 ນານາສາລະ

    ເຫດ­ການ​ໂຈມ​ຕີ​ໂຮງ​ກັ່ນ​ນ້ຳ­ມັນ​ຂະ­ໜາດ​ໃຫຍ່​ສອງ​ແຫ່ງ​ຂອງ​ປະ­ເທດ​ຊາ​ອຸ ອາ​ຣະ​ເບຍ ເມື່ອ​ວັນ​ທີ 14 ກັນ­ຍາ 2019 ທີ່​ຜ່ານ​ມາ ສ້າງ​ຄວາມ​ວິ­ຕົກ​ກັງ­ວົນ​ຕໍ່​ສະ­ຖຽນ​ລະ​ພາບ​ລາ­ຄາ​ນ້ຳ­ມັນ​ໄປ​ທົ່ວ​ໂລກ ເນື່ອງ​ຈາ​ກວ່າ ໂຮງ​ກັ່ນ​ນ້ຳ­ມັນ​ທັງ​ສອງ​ແຫ່ງ​ຖື​ວ່າ​ເປັນ​ແຫຼ່ງ​ແປ​ຮູບ​ນ້ຳ­ມັນ​ທີ່​ໃຫຍ່​ທີ່​ສຸດ​ໃນ​ໂລກ ໂດຍ​ມີ​ການ​ວິ­ເຄາະ​ວ່າ ຜົນ​ກະ­ທົບ​ນີ້​ຈະ​ເຮັດ​ໃຫ້​ລາ­ຄາ​ນ້ຳ­ມັນ​ຖີບ​ໂຕ​ສູງ​ຂຶ້ນ​ເຖິງ 100 ໂດ​ລາ​ອາ​ເມ​ຣິ​ກາ ຕໍ່ 1 ບາ​ເຣນ.

    ອີງ​ຕາມ​ແຫຼ່ງ​ຂ່າວ​ຈາກ​ຕ່າງ­ປະ­ເທດ​ໃຫ້​ຮູ້​ວ່າ: ພວກ​ກະ­ບົດ HouTHI ຈາກ​ປະ­ເທດ​ເຢຍ​ແມນ ໃຫ້­ການ​ຕອບ​ຮັບ​ວ່າ ພວກ​ເຂົາ​ໄດ້​ໃຊ້​ເຮືອນ​ບິນ​ແບບ​ບໍ່​ມີ​ຄົນ​ຂັບ ຫຼື ໂດຣນ Unmanned Aeridl Vehicle (UAV) ຈຳ­ນວນ 10 ລຳ​ຖະ​ຫຼົ່ມ​ໂຮງ​ກັ່ນ​ນ້ຳ­ມັນ​ດັ່ງ­ກ່າວ ເພື່ອ​ຕອບ​ໂຕ້​ການ​ບຸກ​ໂຈມ​ຕີ​ທາງ​ອາ­ກາດ​ຂອງ​ພັນ­ທະ​ມິດ ໂດຍ​ມີ​ຊາ​ອຸ ອາ​ຣະ​ເບຍ ໃນ​ສົງ­ຄາມ​ຢູ່​ເຢ​ເມນ ຕະ­ຫຼອດ 5 ປີ.

    ວິ­ທະ­ຍຸ​ກະ­ຈາຍ­ສຽງ​ຫວຽດ­ນາມ (VOV WORLD) ສະ­ບັບ​ອອນ​ລາຍ ລົງ​ວັນ​ທີ 19 ກັນ­ຍາ 2019 ໄດ້​ລົງ​ພິມ​ບົດ​ໃນ​ຫົວ­ຂໍ້: ...ສິ່ງ​ທີ່​ອາ​ເມ​ຣິ​ກາ ອ້າງ​ເຫດ­ຜົນ​ເພື່ອ​ກໍ່​ກຳ­ລັງ​ບັງ­ຄັບ​ໃຫ້​ອີ​ຣານ ກັບ​ຄືນ​ສູ່​ການ​ເຈລະ­ຈາ... ໄດ້​ຂຽນ​ບາງ​ຈຸດ​ວ່າ:... ພາຍ­ຫຼັງ​ເຫດ​ເກີດ​ຂຶ້ນ ປະ­ທາ­ນາ­ທິ­ບໍ­ດີ​ອາ​ເມ​ຣິ​ກາ Donald Trump ຕະ­ຫຼອດ​ຮອດ​ພັນ­ທະ​ມິດ​ຢູ່​ຕາ­ເວັນ​ອອກ​ກາງ ລ້ວນ​ແຕ່​ກ່າວ​ຫາ​ວ່າ ອີ​ຣານ ຢູ່​ເບື້ອງ​ຫຼັງ​ການ​ໂຈມ​ຕີ​ດັ່ງ­ກ່າວ ຜ່ານ​ການ​ກ່າວ​ຫາ​ຄັ້ງ​ນີ້ ສະ­ແດງ​ໃຫ້​ເຫັນ​ວ່າ ອາ​ເມ​ຣິ​ກາ ພວມ​ກໍ່​ກຳ­ລັງ​ດັນ​ຢ່າງ​ສຸດ​ຂີດ​ຕໍ່​ອີ​ຣານ ເພື່ອ​ແນ­ໃສ່​ໃຫ້​ຕົກ­ລົງ​ເຂົ້າ​ສູ່​ການ​ເຈລະ­ຈາ ເພື່ອ​ບັນ­ລຸ​ຂໍ້​ຕົກ­ລົງ​ນິວ​ເຄລຍ ສະ­ບັບ​ໃໝ່....

    ສ່ວນ​ສຳ­ນັກ­ງານ​ພະ­ລັງ­ງານ ລະ­ຫວ່າງ​ປະ­ເທດ (IEA) ທີ່​ມີ​ສຳ­ນັກ­ງານ​ຢູ່​ກຸງ​ປາ​ຣີ ປະ­ເທດ​ຝຣັ່ງ ກໍ​ອອກ​ມາ​ແຈ້ງ​ໃຫ້​ບັນ­ດາ​ປະ­ເທດ​ຜະ­ລິດ​ນ້ຳ­ມັນ​ຕ້ອງ​ນຳ​ເອົາ​ນ້ຳ­ມັນ​ສຳ­ຮອງ​ອອກ​ມາ​ຂາຍ​ຢ່າງ​ໜ້ອຍ​ຕ້ອງ​ກຸ້ມ 90 ວັນ ເພື່ອ​ຮັບ​ມື​ກັບ​ເຫດ­ການ​ໃນ​ຄັ້ງ​ນີ້ ແລະ ກ່າວ​ວ່າ ປະ­ລິ­ມານ​ນ້ຳ­ມັນ​ໃນ​ຕະ­ຫຼາດ​ໂລກ​ຍັງ­ພຽງ​ພໍ ເຖິງ​ວ່າ​ມີ​ເຫດ­ການ​ດັ່ງ­ກ່າວ​ກໍ​ຕາມ ເພາະ​ມີ​ແຫຼ່ງ​ຜະ­ລິດ​ນ້ຳ­ມັນ​ອີກ​ຫຼາຍ​ແຫ່ງ​ໃນ​ໂລກ​ມີ​ຄວາມ​ສາ­ມາດ​ພຽງ­ພໍ​ທີ່​ຈະ​ຜະ­ລິດ​ມາ​ທົດ​ແທນ​ສອງ​ບໍ່​ກັ່ນ​ນ້ຳ­ມັນ​ດັ່ງ­ກ່າວ ເປັນ­ຕົ້ນ ແມ່ນ​ຖານ​ການ​ຜະ­ລິດ​ນ້ຳ­ມັນ​ຂອງ​ອາ​ເມ​ຣິ​ກາ ທີ່​ສາ­ມາດ​ຜະ­ລິດ​ນ້ຳ­ມັນ​ໄດ້​ຫຼາຍ​ກວ່າ 12 ລ້ານ​ບາ​ເຣນ​ຕໍ່​ວັນ ກວມ 15% ຂອງ​ຄວາມ​ຕ້ອງ­ການ​ຂອງ​ຕະ­ຫຼາດ​ນ້ຳ­ມັນ​ໂລກ ຍັງ​ບໍ່​ນັບ​ຈາກ​ຣັດ​ເຊຍ ເວ​ເນ​ຊູ​ເອ​ລາ... ບໍ່​ທໍ່​ນັ້ນ ມີ​ຫຼາຍ​ປະ­ເທດ​ກໍ​ນຳ​ເອົາ​ນ້ຳ­ມັນ​ໃນ​ຄັງ​ສຳ­ຮອງ​ອອກ​ມາ­ສູ່​ຕະ­ຫຼາດ.

    ຜູ້​ຊ່ຽວ­ຊານ​ບອກ​ວ່າ: ຫາກ​ເຫດ­ການ​ເກີດ​ຂຶ້ນ​ກ່ອນ​ໜ້າ​ນີ້ 10 ປີ ອາດ​ມີ​ບັນ­ຫາ ແຕ່​ດຽວ­ນີ້​ຄວາມ​ຕ້ອງ­ການ​ນ້ຳ­ມັນ​ໃນ​ຕະ­ຫຼາດ​ໂລກ​ບໍ່​ຫຼາຍ​ຄື​ແຕ່​ກ່ອນ ເພາະ​ມີ​ການ​ນຳ​ໃຊ້​ພະ­ລັງ­ງານ​ທົດ​ແທນ​ຫຼາຍ​ຂຶ້ນ.

    ນັກ​ວິ­ເຄາະ ສະ­ແດງ​ຄວາມ​ກັງ­ວົນ​ຕໍ່​ສະ­ຖາ­ນະ​ການ​ທີ່​ບໍ່​ຄາດ​ຄິດ​ທີ່​ຈະ​ຕາມ​ມາ​ນັ້ນ ຄື: ການ​ໃຊ້​ກຳ­ລັງ​ທະ­ຫານ ຫຼື ອາ­ວຸດ​ສົງ­ຄາມ​ຕອບ​ໂຕ້​ກັນ​ຈາກ​ການ​ທີ່​ສະ­ຫະ­ລັດ​ອາ​ເມ​ຣິ​ກາ ສົ່ງ​ສັນ­ຍານ​ຕໍ່​ອີ​ຣານ ແລະ ຝ່າຍ​ອີ​ຣານ ກໍ​ພ້ອມ​ທີ່​ຈະ​ຕອບ​ໂຕ້​ສະ­ຫະ­ລັດ​ອາ​ເມ​ຣິ​ກາ ແລະ ພັນ­ທະ​ມິດ ເປັນ­ຕົ້ນ ແມ່ນ​ຊາ​ອຸ ອາ​ຣະ​ເບຍ ຈຶ່ງ​ຂໍ​ພາ­ວະ­ນາ​ໃຫ້​ທຸກ​ຝ່າຍ​ມີ​ຄວາມ​ອົດ­ທົນ​ຫຼີກ​ລ່ຽງ​ການ​ປະ​ເຊີນ​ໜ້າ​ຈະ​ດີ​ທີ່​ສຸດ ພວກ​ເຮົາ​ຕ້ອງ​ຕິດ­ຕາມ​ຕໍ່.

ໂດຍ: ແນວ​ລາວ

ຂ່າວທີ່ກ່ຽວຂ້ອງ