Boeing ປະກາດ​ການ​ຈ່າຍ​ຄ່າ​ຊົດ​ເຊີຍ​ໃຫ້​ແກ່​ຜູ້​ປະສົບ​ເຄາະ​ຮ້າຍ​ຈາກ​ອຸບັດເຫດ

103 26 ກ.ຍ. 2019 ຂ່າວຕ່າງປະເທດ
Boeing ປະກາດ​ການ​ຈ່າຍ​ຄ່າ​ຊົດ​ເຊີຍ​ໃຫ້​ແກ່​ຜູ້​ປະສົບ​ເຄາະ​ຮ້າຍ​ຈາກ​ອຸບັດເຫດ

    ເມື່ອ​ວັນ​ທີ 23 ກັນຍາ​ທີ່​ຜ່ານ​ມາ ກຸ່ມ​ບໍລິສັດ​ຜູ້​ຜະລິດ​ເຮືອບິນ​ໂບ​ອິງ (Boeing) ຂອງ ສ ອາ​ເມ​ຣິ​ກາ ໄດ້​ແຈ້ງ​ໃຫ້​ຮູ້​ເຖິງ​ລະດັບ​ການ​ຈ່າຍ​ຄ່າ​ຊົດ​ເຊີຍ​ຄວາມ​ເສຍ​ຫາຍ ໃຫ້​ແກ່​ຄອບຄົວ​ຂອງ  346 ຄົນ ທີ່​ເສຍ​ຊີວິດ​ຢູ່​ໃນ​ອຸບັດເຫດ 2 ລາຍ ທີ່​ເກີດ​ຈາກ​ເຮືອບິນ​ໂບ​ອິງ 737 MAX ນັ້ນ​ຢູ່​ທີ່  144.500 ໂດ​ລາ​ສະຫະລັດ ໃຫ້​ແຕ່​ລະ​ກໍລະນີ.

    ແຈ້ງ​ການ​ຂອງ Boeing ໃຫ້​ຮູ້​ວ່າ ເງິນ​ຈຳນວນ​ດັ່ງກ່າວ ແມ່ນ​ເອົາ​ມາ​ຈາກ​ກອງ​ທຶນ ຊ່ວຍເຫຼືອ ການ​ເງິນ​ມູນ​ຄ່າ 50 ລ້ານ​ໂດ​ລາ​ສະຫະລັດ ຊຶ່ງ Boeing ເປີດເຜີຍ​ເມື່ອ​ເດືອນ​ກໍລະກົດ​ທີ່​ຜ່ານ​ມາ.

    ໃນ​ແຈ້ງ​ການ​ດັ່ງກ່າວ Boeing ກໍ​ໃຫ້​ຮູ້​ວ່າ​ໄດ້​ເລີ່ມ​ຕົ້ນ​ຮັບ​ເອົາ​ການ​ແກ້​ໄຂ​ບັນດາ​ກໍລະນີ ທີ່​ພົວພັນ​ເຖິງ​ອຸບັດເຫດ​ສອງ​ລາຍ​ນັ້ນ. ທ່ານ ແດນ​ນິ​​ສ ມຸຍ​ເລນ​ເບີກ ຜູ້ອຳນວຍການ​ຝ່າຍ​ບໍລິຫານ​ຂອງ Boeing ເວົ້າ​ວ່າ ການ​ແຈ້ງ​ເຖິງ​ບ້ວງ​ຊົດ​ເຊີຍ​ຄວາມ​ເສຍ​ຫາຍ ເປັນ​ບາດກ້າວ​ທີ່​ສຳຄັນ​ທຳ​ອິດ​ຂອງ Boeing ໃນ​ການ​ໃຫ້​ຄວາມ​ຊ່ວຍເຫຼືອ​ຄອບຄົວ ຂອງ​ຜູ້​ປະສົບ​ເຄາະ​ຮ້າຍ.

    ປັດຈຸບັນ​ນີ້ ບັນດາ​ເຮືອບິນ Boeing 737 MAX ໄດ້​ຖືກ​ຫ້າມ​ບິນ​ໃນ​ທົ່ວ​ໂລກ ຫຼັງ​ຈາກ​ທີ່​ເຮືອບິນ​ປະເພດ​ນີ້​ລຳ​ໜຶ່ງ ຂອງ​ບໍລິສັດ​ການບິນ Ethiopian Airlines ໃນ​ເວລາ​ທີ່​ບິນ​ຈາກ​ນະ ຄອນ​ຫຼວງ ອັດ​ດິ​​ສ ອາ​ເບ​ບາ (ເອ​ທີ​ໂອ​ປີ) ໄປ​ຍັງ​ນະຄອນຫຼວງ ໄນ​ໂຣ​ບີ (ປະເທດ​ເຄນ​ຢາ) ເມື່ອ​ເດືອນ​ມີນາ​ທີ່​ຜ່ານ​ມາ  ໄດ້​ເກີດ​ອຸບັດເຫດ​ຕົກ ຫຼັງ​ຈາກ​ທີ່​ບິນ​ຂຶ້ນ​ບໍ່​ດົນ ສົ່ງ​ຜົນ​ໃຫ້​ຜູ້ໂດຍສານ 149 ຄົນ ແລະ ຈຸ​ບິນ 8 ຄົນ ເສຍ​ຊີວິດ​ທັງ​ໝົດ.

    ໃນ​ກໍ​ຊລະ​ນີ​ອຸບັດເຫດ​ກັບ​ເຮືອບິນ​ຂອງ​ບໍລິສັດ​ການບິນ Lion Air ເມື່ອ​ເດືອນ​ຕຸລາ ປີ 2018 ຊຶ່ງ​ກໍ​ແມ່ນ Boeing 737 MAX ເຊັ່ນ​ກັນ​ນັ້ນ ໄດ້​ຕົກລົງ​ໃນ​ເຂດ​ທະເລ ຈາ​ວາ ຂອງ​ອິນ​ໂດ​ເນ​ເຊຍ ຫຼັງ​ຈາກ​ທີ່​ບິນ​ຂຶ້ນ​ຈາກ​ນະຄອນຫຼວງ ຈາ​ກາ​ຕາ ໄດ້​ບໍ່​ດົນ ສົ່ງ​ຜົນ​ໃຫ້​ຜູ້ໂດຍສານ ແລະ ຈຸ​ບິນ ເສຍ​ຊີວິດ​ທັງ​ໝົດ.

ຂ່າວທີ່ກ່ຽວຂ້ອງ