ໄຂ​ກອງ​ປະຊຸມ​ສຸດ​ຍອດ ​ສປຊ ກ່ຽວ​ກັບ​ບັນດາ​​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ

112 26 ກ.ຍ. 2019 ຂ່າວຕ່າງປະເທດ
ໄຂ​ກອງ​ປະຊຸມ​ສຸດ​ຍອດ ​ສປຊ ກ່ຽວ​ກັບ​ບັນດາ​​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ

   ວັນ​ທີ 24 ກັນຍາ​ນີ້ ທ່ານ ອັນໂຕ​ນີ​ໂອ ກູ​ເຕີ​ເຣ​​ສ ເລຂາທິການ​ໃຫຍ່ ອົງການ​ສະ​ປະຊາ​ຊາດ (​ສປຊ) ໄດ້​ກ່າວ​ໄຂ​ກອງ​ປະຊຸມ​ສຸດ​ຍອດ​ຂອງ ​ສປຊ ກ່ຽວ​ກັບ​ບັນດາ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (SDGs) ຢ່າງ​ເປັນ​ທາງ​ການ​ເປັນ​ເທື່ອ​ທຳ​ອິດ ຊຶ່ງ​ຈັດ​ຂຶ້ນ​ທີ່​ສຳນັກງານ​ໃຫຍ່​ຂອງ ​ສປຊ ຢູ່​ໃນ​ນະຄອນ​ນີວ​ຢອກ (ສ ອາ​ເມ​ຣິ​ກາ) ໂດຍ​ທ່ານ​ໄດ້​ຮຽກຮ້ອງ​ໄປ​ຍັງ​ທົ່ວ​ໂລກ ວ່າ​ຄວນ​ພະຍາຍາມ​ຫຼາຍ​ຂຶ້ນ ເພື່ອ​ຫັນ​ສູ່​ການ​ປະຕິບັດ​ບັນດາ​ເປົ້າ​ໝາຍ​ທີ່​ໄດ້​ວາງ​ອອກ​ມາ ສຳລັບ​ວາລະ​ການ​ດຳເນີນ​ງານ​ຮອດ​ປີ 2030.

    ຂ່າວ​ແຈ້ງວ່າ ໂດຍ​ທີ່​ເປັນ​ໜຶ່ງ ໃນ 5 ເຫດການ​ສຸດ​ຍອດ ທີ່​ດຳເນີນ​ຢູ່​ໃນ​ຂອບ​ຂອງ​ສັບປະດາ​ສຸດ​ຍອດ ໃນ​ສະໄໝ​ປະຊຸມ​ທີ 74 ຂອງ​ສະມັດຊາ​ໃຫຍ່ ​ສປຊ ນັ້ນ ກອງ​ປະຊຸມ SDGs ເປັນ​ການ​ເຕົ້າໂຮມ​ການ​ນຳ​ປະເທດ​ຕ່າງໆ ວົງ​ການ​ວິ​ສາ​ຫະ​ກິດ ແລະ ບັນດາ​ອົງ​ການຈັດຕັ້ງ​ສາກົນ ມາ​ຮ່ວມ​ກັນ​ວາງ​ການ​ດຳເນີນ​ງານ​ຕົວ​ຈິງ​ອອກ​ມາ ເພື່ອ​ໃຫ້​ບັນລຸ​ບັນດາ​ເປົ້າ​ໝາຍ​ຂອງ ​ສປຊ ທີ່​ໄດ້​ວາງ​ອອກ​ມາ ສຳລັບ​ແຕ່​ນີ້​ຮອດ​ປີ 2030 ນັ້ນ​ກໍ​ຄື​ການ​ຢຸດຕິ​ຄວາມທຸກ​ຍາກ ກໍ່ສ້າງ​ພື້ນຖານ​ເສດຖະກິດ​ທີ່​ມີ​ລະດັບ​ການ​ປ່ອຍ​ແກ​​ັສ​ຕ່ຳ ສ້າງ​ສັງຄົມ​ທີ່​ມີ​ຄວາມ​ຍຸຕິ​ທຳ ແລະ ສັນຕິພາບ ກໍ​ຄື​ການ​ຮັບປະກັນ​ສິດທິ​ມະນຸດ.

    ທ່ານ ກູ​ເຕີ​ເຣ​​ັສ ໄດ້​ກ່າວ​ຍົກຍ້ອງ ຕໍ່​ຄວາມ​ກ້າວໜ້າ​ໃນ​ຂົງເຂດ​ດັ່ງກ່າວ​ໃນ​ທົ່ວ​ໂລກ ຕົ້ນຕໍ​ກໍ​ແມ່ນ​ລັດຖະບານ​ຂອງ​ບາງ​ປະເທດ ທີ່​ໄດ້​ເອົາ SDGs ຊ້ອນ​ເຂົ້າ​ໄປ​ໃນ​ຍຸດ​ທະ​ສາດ​ການ​ພັດທະນາ​ແຫ່ງ​ຊາດ​ຂອງ​ປະເທດ​ຕົນ. ເຖິງ​ຢ່າງໃດ​ກໍ​ຕາມ ທ່ານ ກູ​ເຕີ​ເຣ​​ສ ກໍ​ໄດ້​ກ່າວ​ເຕືອນ​ວ່າ ໂລກ​ໄດ້​ຜິດ​ນັດ​ໃນ​ຫຼາຍ​ເປົ້າ​ໝາຍ​ທີ່​ໄດ້​ວາງ​ອອກ​ມາ ຕົ້ນຕໍ​ກໍ​ແມ່ນ​ໃນ​ບັນຫາ​ການ​ຢຸດຕິ​ການ​ພິພາດ​ທີ່​ເຮັດ​ໃຫ້​ເກີດ​ການ​ລົ້ມ​ຕາຍ ຕະຫຼອດ​ຮອດ​ວິ​ກິດ​ການ​ໃນ​ດ້ານ​ສະພາບ​ດິນ​ຟ້າ​ອາກາດ​ປ່ຽນແປງ ຄວາມ​ຮຸນ​ແຮງ​ລະ​ຫວາງ​ເພດ ແລະ ຄວາມ​ບໍ່​ສະເໝີພາບ.

    ທ່ານ ກູ​ເຕີ​ເຣ​​ສ ຊີ້​ໃຫ້​ເຫັນ​ວ່າ ໃນ​ຄວາມ​ເປັນ​ຈິງ​ກໍ​ຄື​ວ່າ ໃນ​ຂະນະ​ທີ່​ມີ​ບຸກຄົນ​ຈຳນວນ​ບໍ່​ຫຼາຍ ພວມ​ຄອບ​ຄອງ​ເຖິງ​ເຄິ່ງ​ໜຶ່ງ​ຂອງ​ຊັບ​ສິນ​ຂອງ​ທົ່ວ​ທັງ​ໂລກ​ຢູ່​ນັ້ນ ພັດ​ມີ​ຜູ້​ອື່ນໆ​ອີກ​ເຖິງ​ເກືອບ 500 ລ້ານ​ຄົນ ຍັງ​ຄົງ​ດຳລົງ​ຊີວິດ​ຢູ່​ໃນ​ຄວາມທຸກ​ຍາກ​ໄປ​ຈົນ​ຮອດ​ປີ 2030. ດັ່ງນັ້ນ ທົ່ວ​ໂລກ​ຈຶ່ງ​ຕ້ອງ​ໄດ້​ດຳເນີນ​ການ ເພື່ອ​ປ່ຽນແປງ​ປະກົດ​ການ​ດັ່ງກ່າວ.

ຂ່າວທີ່ກ່ຽວຂ້ອງ