ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 26-09-2019

732 26 ກ.ຍ. 2019 ຫົວຂໍ້ຂ່າວອື່ນໆ

    ເລື່ອງ​ທີ່​ຄວນ​ເບິ່ງ​ໄວ້​ເປັນ​ບົດ­ຮຽນ​ປະ­ຈຳ​ຄໍ​ລຳ​ວັນ​ນີ້ ເລີ່ມ​ຈາກ​ຄະ­ດີ​ຕົ້ມ​ຕຸ໋ນ​ຢູ່​ພູ​ຖານ ບັນ­ຫາ​ການ​ອອກ­ແຮງ​ງານ​ຂອງ​ຄົນ​ພິ­ການ​ໃນ​ຍີ່­ປຸ່ນ ແລະ ເລື່ອງ​ການ​ເກັບ​ພາ­ສີ​ທ່ອງ​ທ່ຽວ​ທີ່​ນູ​ແວນ​ເຊ​ລັງ (ນິວ​ຊີ​ແລນ).

    ທີ່ ພູ​ຖານ: ຂ່າວ​ຕ່າງ­ປະ­ເທດ​ໃຫ້​ຮູ້​ໃນ​ວັນ​ທີ 2 ເດືອນ​ສິງ­ຫາ​ຜ່ານ​ມາ (ວຽງ​ຈັນ​ທາມ) ວ່າ​ກອງ​ກຳ­ລັງ​ຕຳ­ຫຼວດ​ປະ­ເທດ​ພູ​ຖານ ໄດ້​ຈັບ​ກຸມ​ເຈົ້າ​ຂອງ​ບໍ­ລິ­ສັດ​ຊອກ​ວຽກ​ເຮັດ​ງານ​ທຳ​ຢູ່​ຕ່າງ­ປະ­ເທດ ຈຳ­ນວນ 2 ຄົນ ທີ່​ສ້າງ​ເອ­ກະ­ສານ​ປອມ ເພື່ອ​ຕົວະ​ເອົາ​ເງິນ​ຄົນ​ອື່ນ ແບບ​ໜ້າ​ຕາ​ເສີຍ ບໍ­ລິ­ສັດ​ດັ່ງ­ກ່າວ​ໃຊ້​ເລ່­ຫຼ່ຽມ​ຕົວະ​ຕົ້ມ​ຄົນ​ອື່ນ ດ້ວຍ​ວິ­ທີ​ສ້າງ​ໂຄງ­ການ “ທັງ​ຮຽນ​ທັງ​ຮັບ” (Learn and Earn Programme-LEP) ຢູ່​ປະ­ເທດ​ຍີ່­ປຸ່ນ ໂດຍ​ຮັບ­ປະ­ກັນ​ວ່າ ຈະ​ຊອກ​ວຽກ​ເຮັດ​ງານ​ທຳ​ໄດ້​ຄ່າ​ແຮງ​ງານ​ສູງໆ​ຢູ່​ປະ­ເທດ​ນັ້ນ ແລະ ວ່າ​ເປັນ​ການ​ອອກ­ແຮງ​ງານ​ປະ­ສົມ​ປະ­ສານ​ກັບ​ການ​ເຝິກ­ອົບ­ຮົມ ເຊິ່ງ​ຜູ້​ເຂົ້າ​ຮ່ວມ ຈະ​ໄດ້​ທັງ​ຄວາມ​ຮູ້ ແລະ ໄດ້​ທັງ​ເງິນ ດ້ວຍ​ເລ່­ຫຼ່ຽມ ອັນ​ແນບ​ນຽນ ບັນ­ດາ​ຜູ້​ເປັນ​ພໍ່​ແມ່​ຈຳ­ນວນ ປະ­ມານ 100 ຄົນ ພາ­ກັນ​ຫຼົງ​ເຊື່ອ ເລີຍ​ພາ­ກັນ​ວິ່ງ​ເຕັ້ນ​ຈ່າຍ​ເງິນ​ໃຫ້​ບໍ­ລິ­ສັດ ເພື່ອ​ສົ່ງ​ລູກ​ຫຼານ​ຂອງ​ພວກ​ຕົນ​ໄປ​ອອກ­ແຮງ​ງານ​ຢູ່​ຍີ່­ປຸ່ນ ຕາມ​ການ​ໂຄ­ສະ­ນາ ແຕ່​ສຸດ​ທ້າຍ ຜົນ​ຮັບ​ກໍ​ຄື ຖືກ​ຕົ້ມ​ຈົນ​ເປື່ອຍ ຂ່າວ​ບອກ​ວ່າ ບັນ­ດາ​ພໍ່​ແມ່​ຜູ້​ເຄາະ​ຮ້າຍ​ເຫຼົ່າ​ນີ້ ໄດ້​ເຂົ້າ​ໄປ​ກອງ​ບັນ­ຊາ​ການ​ຕຳ­ຫຼວດ ເພື່ອ​ລົງ­ທະ­ບຽນ​ຟ້ອງ​ຮ້ອງ​ຢ່າງ​ເປັນ​ທາງ​ການ​ໃນ​ວັນ​ທີ 26 ເດືອນ​ມິ­ຖຸ­ນາ​ປີ​ນີ້ ແລະ ຕໍ່​ມາ​ໃນ​ວັນ​ທີ 30 ເດືອນ​ກໍ­ລະ­ກົດ ພາຍ­ຫຼັງ​ມີ​ການ​ສືບ­ສວນ​ຢ່າງ​ລະ­ອຽດ ຜູ້​ຕົ້ມ​ຕູ໋ນ​ທັງ​ສອງ ກໍ​ຖືກ​ລາກ​ຄໍ​ເຂົ້າ​ກົງ​ຂັງ​ເປັນ​ທີ່​ຮຽບ​ຮ້ອຍ​ແລ້ວ.

    ທີ່ ຍີ່­ປຸ່ນ: ໃນ​ເດືອນ​ກຸມ­ພາ ປີ 2018 ກະ­ຊວງ​ແຮງ​ງານ​ຍີ່­ປຸ່ນ ໄດ້​ເຮັດ​ການ​ສຳ​ຫຼວດ ເພື່ອ​ຊອກ​ຮູ້​ກ່ຽວ​ກັບ​ບັນ­ຫາ​ທີ່​ຄົນ​ພິ­ການ​ພົບ­ພໍ້​ໃນ​ການ​ອອກ­ແຮງ​ງານ ບັ້ນ​ສຳ​ຫຼວດ​ດັ່ງ­ກ່າວ ໄດ້​ສຳ­ພາດ​ຄົນ​ພິ­ການ​ຈຳ­ນວນ 1.000 ຄົນ ທີ່​ມີ​ອາ­ຍຸ​ແຕ່ 20-64 ປີ ໃນ​ນັ້ນ 664 ຄົນ​ຍັງ​ອອກ­ແຮງ​ງານ​ຢູ່ 268 ຄົນ ເຊົາ​ອອກ­ແຮງ​ງານ​ແລ້ວ ແລະ ອີກ 68 ຄົນ ຢູ່​ໃນ​ໄລ­ຍະ​ພັກ​ວຽກ ຜົນ​ການ​ສຳ​ຫຼວດ​ຊີ້​ອອກ​ວ່າ 84,5% ຂອງ​ຜູ້​ຖືກ​ສຳ­ພາດ​ບອກ​ວ່າ ຕ້ອງ­ການ​ເຮັດ​ວຽກ​ຫຼື​ສືບ­ຕໍ່​ເຮັດ​ວຽກ ສ່ວນ​ຄຳ​ຕອບ​ຈາກ 268 ຄົນ ທີ່​ບໍ່​ໄດ້​ເຮັດ​ວຽກ​ນັ້ນ ສະ­ຫຼຸບ​ວ່າ ມີ 64,2% ຕ້ອງ­ການ​ເຮັດ​ວຽກ ຕໍ່​ຄຳ​ຖາມ​ກ່ຽວ​ກັບ​ເຫດ­ຜົນ​ທີ່​ວ່າ ເປັນ​ຫຍັງ​ພວກ​ເຂົາ­ເຈົ້າ​ບໍ່​ສາ­ມາດ​ເຮັດ​ວຽກ ຫຼື ສືບ­ຕໍ່​ເຮັດ​ວຽກ ທັງໆ​ທີ່​ມີ​ຄວາມ​ຕ້ອງ­ການ? ຄຳ​ຕອບ​ອອກ​ມາ​ແນວ​ນີ້ 50,6% ບອກ​ວ່າ ຍ້ອນ​ບໍ່​ມີ​ກຳ­ລັງ­ວັງ­ຊາ​ດ້ານ​ຮ່າງ­ກາຍ 36,9% ບອກ​ວ່າ​ມີ​ບັນ­ຫາ​ກັບ​ເວ­ລາ​ສຳ­ລັບ​ເຮັດ​ວຽກ ແລະ ເວ­ລາ​ສຳ­ລັບ​ການ​ພັກ­ຜ່ອນ​ທີ່​ບໍ່​ເໝາະ​ສົມ​ກັບ​ພວກ​ຕົນ ສ່ວນ​ຈຳ­ນວນ​ທີ່​ອ້າງ​ວ່າ ອຸ­ປະ­ສັກ​ໃນ​ການ​ເຮັດ​ວຽກ​ຂອງ​ພວກ​ຕົນ ແມ່ນ​ຍ້ອນ​ຂາດ​ຄວາມ​ເຂົ້າ­ໃຈ​ການ​ສະ­ໜັບ­ສະ­ໜູນ​ຈາກ​ຜູ້​ເປັນ​ຫົວ­ໜ້າ​ງານ ແລະ ຜູ້​ຮ່ວມ​ວຽກ​ນັ້ນ ມີ​ຈຳ­ນວນ 30,3% ຈາກ​ຜົນ​ການ​ສຳ​ຫຼວດ​ຄັ້ງ​ນີ້ ທາງ​ກະ­ຊວງ​ແຮງ​ງານ​ຍີ່­ປຸ່ນ ດຳ­ເນີນ​ນະ­ໂຍ­ບາຍ​ສະ­ໜັບ­ສະ­ໜູນ ບັນ­ດາ​ບໍ­ລິ­ສັດ​ທີ່​ຊ່ວຍ­ເຫຼືອ​ຄົນ​ພິ­ການ​ຄົນ​ທີ່​ສຸ­ຂະ­ພາບ​ບໍ່​ດີ​ໃນ​ການ​ສືບ­ຕໍ່​ເຮັດ​ວຽກ.

    ທີ່ ນູ​ແວນ​ເຊ​ລັງ (ນິວ​ຊີ​ແລນ): ເຊັ່ນ​ດຽວ​ກັບ​ປະ­ເທດ​ລາວ​ພວກ​ເຮົາ ປະ­ເທດ​ນິວ​ຊີ​ແລນ ໄດ້​ກຳ­ນົດ​ເອົາ​ປີ 2019 ເປັນ​ປີ​ທ່ອງ​ທ່ຽວ​ນິວ​ຊີ​ແລນ-ຈີນ ມາ​ພ້ອມໆ​ກັບ​ຂ່າວ​ນີ້ ກໍ​ມີ​ເລື່ອງ​ທີ່​ວ່າ​ທາງ​ການ​ຂອງ​ປະ­ເທດ​ນີ້ ໄດ້​ເລີ່ມ​ເກັບ​ພາ­ສີ​ນັກ​ທ່ອງ​ທ່ຽວ​ຕ່າງ­ປະ­ເທດ ນັບ​ແຕ່​ກາງ​ປີ​ນີ້​ເປັນ­ຕົ້ນ​ມາ ໃນ​ອັດ­ຕາ​ບໍ່​ເກີນ 35 ໂດ​ລາ​ນິວ​ຊີ​ແລນ​ຕໍ່​ຄົນ ການ​ເກັບ​ພາ­ສີ​ດັ່ງ­ກ່າວ ແມ່ນ​ເຮັດ​ພ້ອມ​ດຽວ​ກັນ ການ​ອອກ​ວີ​ຊາ​ໃຫ້​ນັກ​ທ່ອງ​ທ່ຽວ ຂ່າວ​ບອກ​ວ່າ ນັກ​ທ່ອງ​ທ່ຽວ​ຈາກ​ອົດ​ສະ​ຕຣາ​ລີ ໄດ້​ຮັບ​ການ​ຍົກ­ເວັ້ນ​ການ​ເກັບ​ພາ­ສີ ດ້ວຍ​ເຫດ­ຜົນ​ວ່າ ນັກ​ທ່ອງ​ທ່ຽວ​ຈາກ​ປະ­ເທດ​ນີ້ ເຂົ້າ​ໄປ​ທ່ອງ​ທ່ຽວ​ນິວ​ຊີ​ແລນ​ຫຼາຍ​ເປັນ​ອັນ​ດັບ​ທີ 1 ທາງ​ການ​ຂອງ​ນິວ​ຊີ​ແລນ​ປະ​ເມີນ​ວ່າ ລັດ​ຈະ​ມີ​ລາຍ​ຮັບ​ຈາກ​ການ​ເກັບ​ພາ­ສີ​ທ່ອງ​ທ່ຽວ​ເຖິງ 80 ລ້ານ​ໂດ​ລາ​ນິວ​ຊີ​ແລນ​ຕໍ່​ປີ ແລະ ເງິນ​ຈຳ­ນວນ​ທີ່​ວ່າ​ນີ້ ຈະ​ນຳ​ໃຊ້​ເພື່ອ​ປັບ­ປຸງ​ໂຄງ​ສ້າງ​ພື້ນ­ຖານ ເພື່ອ​ຮອງ​ຮັບ​ນັກ​ທ່ອງ​ທ່ຽວ ແລະ ເພື່ອ​ອະ­ນຸ​ຮັກ​ສະ­ຖານ­ທີ່​ທ່ອງ​ທ່ຽວ​ໃຫ້​ຍືນ​ຍົງ ແລະ ສວຍ​ງາມ.

ຂ່າວທີ່ກ່ຽວຂ້ອງ