ກູ​ບາ​ ໄດ້​ຮັບ​ເງິນ​ຊ່ວຍ​ເຫຼືອ​ຈາກ​ຈີນ ​ເພື່ອ​ພັດທະນາ​ເສດ​ຖະ​ກິດ

111 27 ກ.ຍ. 2019 ຂ່າວຕ່າງປະເທດ
ກູ​ບາ​ ໄດ້​ຮັບ​ເງິນ​ຊ່ວຍ​ເຫຼືອ​ຈາກ​ຈີນ ​ເພື່ອ​ພັດທະນາ​ເສດ​ຖະ​ກິດ

    ທ່ານ ໂຣດ​ຣີ​ໂກ ມາ​ມຽກ​ກາ ດີ​ອາ​​ສ ລັດຖະມົນຕີ​ການ​ຄ້າ​ຕ່າງປະເທດ ແລະ ການ​ລົງທຶນ​ຕ່າງປະເທດ​ກູ​ບາ ແຈ້ງ​ໃຫ້​ຮູ້ເມື່ອ​ວັນ​ທີ 24 ກັນຍາ ​ທີ່​ຜ່ານ​ມາ​ວ່າ ລັດຖະບານ​ຈີນ​ໄດ້​ຕົກລົງ​ຊ່ວຍເຫຼືອ 800 ລ້ານ​ຢວນ (ເທົ່າ​ກັບ 112 ລ້ານ​ໂດ​ລາ​ສະຫະລັດ) ໃຫ້​ແກ່​ກູ​ບາ ເພື່ອ​ຊ່ວຍ​ໃນ​ການ​ເຮັດ​ສຳເລັດ​ແຜນການ​ພັດທະນາ​ເສດຖະກິດ-ສັງຄົມ.

    ຂ່າວ​ແຈ້ງວ່າ ເອກະສານ​ກ່ຽວ​ກັບ​ການ​ຊ່ວຍເຫຼືອ​ດັ່ງກ່າວ ໄດ້​ຮັບ​ການ​ລົງ​ນາມ​ຢູ່​ໃນ​ການ​ພົບ​ປະ​ລະຫວ່າງ​ທ່ານ ມາ​ມຽກ​ກາ ກັບ​ທ່ານ ຈູ ຫຼີວ​ກວານ ຮອງ​ປະທານ​ອົງການ​ຮ່ວມ​ມື​ພັດທະນາ​ສາກົນ​ຂອງ​ຈີນ.

    ໃນ​ຂະນະ​ດຽວ​ກັນ ເວບ​ໄຊ Cubadebate ມີ​ຂ່າວ​ອອກ​ມາ​ວ່າ ເອກະສານ​ຕ່າງໆ​ທີ່​ໄດ້​ຮັບ​ການ​ລົງ​ນາມ ລະຫວ່າງ​ທ່ານ ມາ​ມຽກ​ກາ ກັບ​ເຈົ້າ​ໜ້າທີ່​ຂອງ​ຈີນ ແມ່ນ​ພົວພັນ​ເຖິງ​ເງິນ​ຊ່ວຍເຫຼືອ​ສອງ​ບ້ວງ​ຂອງ​ຈີນ ທີ່​ຊ່ວຍເຫຼືອ​ໃຫ້​ແກ່​ສະ​ຖາ​ບັນ​ຊັບພະຍາກອນ​ນ້ຳ​ແຫ່ງ​ຊາດ (INRH) ຂອງ​ກູ​ບາ ເພື່ອ​ຮັບ​ມື​ກັບ​ສະພາບ​ແຫ້ງແລ້ງ ກໍ​ຄື​ການ​ຈັດ​ຊື້​ລະບົບ​ການ​ຈັດ​ກອງ​ປະຊຸມ​ຜ່ານ​ໂທລະພາບ ໃຫ້​ແກ່​ບໍລິສັດ​ການ​ຢາ​ແຫ່ງ​ຊາດ​ກູ​ບາ BioCubaFarma. ນອກຈາກ​ນັ້ນແລ້ວ ບ້ວງ​ເງິນ​ຊ່ວຍເຫຼືອ​ທີ​ສາມ ເປັນ​ການ​ຊ່ວຍເຫຼືອ​ກູ​ບາ ໃນ​ການ​ຈັດ​ຊື້​ເຄື່ອງ​ຈັກ​ກະຈາຍ​ໃໝ່ ແລະ ອຸປະກອນ​ອື່ນໆ ເພື່ອ​ໃຫ້​ມີ​ເຂດ​ປົກ​ຄຸມ​ຄື້ນ​ສັນຍານ​ດີ​ຈີ​​ຕອລ​ທີ່​ໃຫຍ່​ກວ່າ​ເກົ່າ ໃນ​ທົ່ວ​ດິນແດນ​ຂອງ​​ກູ​ບາ.

ຂ່າວທີ່ກ່ຽວຂ້ອງ