ຂ່າວຫຼ້າສຸດ

ບັນດາ​ປະເທດ​ທີ່​ຍັງ​ເຫຼືອ​ຂອງ JCPOA ໃຫ້​ສັນຍາ​ຮັກສາ​ຂໍ້​ຕົກລົງ​ນີວ​ເຄລຍ​ອີ​ຣານ

106 27 ກ.ຍ. 2019 ຂ່າວຕ່າງປະເທດ
ບັນດາ​ປະເທດ​ທີ່​ຍັງ​ເຫຼືອ​ຂອງ JCPOA ໃຫ້​ສັນຍາ​ຮັກສາ​ຂໍ້​ຕົກລົງ​ນີວ​ເຄລຍ​ອີ​ຣານ

    ທ່ານ​ນາງ ເຟ​ເດຣີ​ກາ ໂມ​ເກຣີ​ນີ ກຳມະການ​ຂັ້ນ​ສູງ ຮັບຜິດຊອບ​ດ້ານ​ຄວາມ​ໝັ້ນຄົງ ແລະ ນະໂຍບາຍ​ຕໍ່​ຕ່າງປະເທດ ຂອງ​ສະຫະພາບ​ເອີ​ຣົບ (EU)  ກ່າວ​ເມື່ອ​ວັນ​ທີ 25 ກັນຍາ​ນີ້ ໃນ​ເວລາ​ເຂົ້າ​ຮ່ວມ​ການ​ພົບ​ປະ​ກັບ​ຝ່າຍ​ຕ່າງໆ ທີ່​ເຂົ້າ​ຮ່ວມ​ແຜນການ​ດຳເນີນ​ງານ​ລວມ​ຮອບດ້ານ  (JCPOA) ຊຶ່ງ​ມີ​ຂຶ້ນ​ຢູ່​ນອກ​ວາລະ​ປະຊຸມ​ຂອງ​ສະມັດຊາ​ໃຫຍ່ ສະຫະ​ປະຊາ​ຊາດ ຢູ່​ທີ່​ນະຄອນ​ນີວ​ຢອກ (ສ ອາ​ເມ​ຣິ​ກາ) ໂດຍ​ໃຫ້​ສັນຍາ​ວ່າ ຈະ​ຮັກສາ​ຂໍ້​ຕົກລົງ​ນີ້​ໄວ້ ເຖິງ​ວ່າ​ນັບ​ມື້​ນັບ​ມີ​ຄວາມ​ຫຍຸ້ງຍາກ ຫຼາຍ​ກໍ​ຕາມ.

    ທ່ານ​ນາງ ໂມ​ເກຣີ​ນີ ເວົ້າ​ວ່າ ຝຣັ່ງ ອັງກິດ ເຢຍ​ລະ​ມັນ ຣັດ​ເຊຍ ຈີນ ແລະ ອີ​ຣານ ຕ່າງ​ກໍ​ເຫັນ​ດີ​ເປັນ​ເອກະສັນ​ກັນ ສືບຕໍ່​ຄວາມ​ພະຍາຍາມ ເພື່ອ​ປະຕິບັດ​ຂໍ້​ຕົກລົງ JCPOA ທີ່ ສ ອາ​ເມ​ຣິ​ກາ ໄດ້​ປະກາດ​ຖອນ​ອອກ​ໄປ​ເມື່ອ​ເດືອນ​ພຶດສະພາ ປີ 2018 ນັ້ນ. ໃນ​ຂະນະ​ດຽວ​ກັນ ທ່ານ​ນາງ ໂມ​ເກຣີ​ນີ ກໍ​ເຫັນ​ວ່າ ທຸກໆ​ບາດກ້າວ​ທີ່​ອີ​ຣານ​ປະຕິບັດ ມາ​ຮອດ​ເວລາ​ນີ້​ໄດ້​ມີ​ການ​ປ່ຽນແປງ ແລະ ຂໍ​ຮຽກຮ້ອງ​ໃຫ້​ອີ​ຣານ​ປີ້ນ​ຄຳ​ຕົກລົງ​ຂອງ​ຕົນ ພ້ອມ​ທັງ​ກັບ​ຄືນ​ສູ່​ຄຳ​ສັນຍາ​ຕາມ JCPOA.

    ເມື່ອ​ເດືອນ​ພຶດສະພາ ປີ 2018 ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ໄດ້​ປະກາດ ຖອນ ສ ອາ​ເມ​ຣິ​ກາ ອອກ​ຈາກ JCPOA ຕາມ​ລຳພັງ​ພຽງ​ຝ່າຍ​ດຽວ ພ້ອມ​ທັງ​ກັບ​ສູ່​ການ​ປິດ​ລ້ອມ ອີ​ຣານ ທີ່​ນັບ​ມື້​ນັບ​ເຂັ້ມ​ງວດ​ຂຶ້ນ. ນັບ​ແຕ່​ນັ້ນ​ເປັນຕົ້ນ​ມາ ອີ​ຣານ​ກໍ​ໄດ້​ເລີ່ມ​ໄປ​ໄກ​ຈາກ​ແດນ​ກຳນົດ ຂອງ​ຄຳ​ສັນຍາ ກ່ຽວ​ກັບ​ຄວາມ​ສາມາດ​ທາງ​ດ້ານ​ນີວ​ເຄລຍ ເພື່ອ​ເປັນ​ການ​ຕອບ​ໂຕ້​ຕໍ່ ສ ອາ​ເມ​ຣິ​ກາ. ຄວາມ​ເຄັ່ງ​ຕຶງ​ເພີ່ມ​ຂຶ້ນ ຫຼັງ​ຈາກ​ເຫດການ​ໂຈມ​ຕີ​ໃສ່​ບັນດາ​ໂຮງງານ​ກັ່ນ​ນ້ຳມັນ​ຂອງ​ອາ​ຣາ​ບີ ຊາ​ອຸ​ດິດ ເມື່ອ​ວັນ​ທີ 14 ກັນຍາ​ທີ່​ຜ່ານ​ມາ ຊຶ່ງ ສ ອາ​ເມ​ຣິ​ກາ ແລະ  ອາ​ຣາ​ບີ ຊາ​ອຸ​ດິດ ຖິ້ມ​ໂທດ​ໃສ່​ອີ​ຣານ ວ່າ​ເປັນ​ຜູ້​ຢູ່​ເບື້ອງ​ຫຼັງ​ຂອງ​ການ​ໂຈມ​ຕີ​ດັ່ງກ່າວ.

    ເຖິງ​ຢ່າງໃດ​ກໍ​ຕາມ ອີ​ຣານ ໄດ້​ປະຕິເສດ​ຕໍ່​ການ​ກ່າວ​ຫາ​ນັ້ນ​ຕະຫຼອດ​ມາ ໂດຍ​ຖະແຫຼງ​ວ່າ ຖ້າ​ຫາກ​ບໍ່​ໄດ້​ຮັບ​ຜົນ​ປະໂຫຍດ​ທາງ​ດ້ານ​ເສດຖະກິດ ຕາມ​ບັນດາ​ຂໍ້ຄວາມ​ຄຳ​ສັນຍາ​ຢູ່​ໃນ JCPOA ນັ້ນແລ້ວ ໃນ​ເດືອນ​ພະຈິກ​ປີ​ນີ້ ອີ​ຣານ​ຈະ​ສືບຕໍ່​ຫຼຸດ​ບັນດາ​ຄຳ​ສັນຍາ​ຂອງ​ຕົນ​ລົງ.

ຂ່າວທີ່ກ່ຽວຂ້ອງ