ADB ໃຫ້ການ​ຄາດ​ຄະເນ​ຄວາມ​ເຕີບ​ໂຕ​ເສດຖະກິດ​ໃນ​ອາຊີ

119 27 ກ.ຍ. 2019 ຂ່າວຕ່າງປະເທດ
ADB ໃຫ້ການ​ຄາດ​ຄະເນ​ຄວາມ​ເຕີບ​ໂຕ​ເສດຖະກິດ​ໃນ​ອາຊີ

   ທະນາຄານ​ພັດທະນາ​ອາຊີ (ADB) ຢືນຢັນ​ເມື່ອ​ວັນ​ທີ 25 ກັນຍາ​ນີ້​ວ່າ ຄວາມ​ເຄັ່ງ​ຕຶງ ທາງ​ດ້ານ​ການ​ຄ້າ ລະຫວ່າງ ສ ອາ​ເມ​ຣິ​ກາ ກັບ​ຈີນ ພວມ​ເປັນ​ຜົນ​ກະທົບ​ຕໍ່​ຄວາມ​ຫວັງ​ເຕີບ​ໂຕ ເສດຖະກິດ ພາຍ​ໃນ​ປີ​ນີ້ ແລະ ປີໜ້າ ຂອງ​ເຂດ​ທີ່​ພວມ​ພັດທະນາ​ຂອງ​ອາຊີ.

    ເຂດ​ທີ່​ພວມ​ພັດທະນາ​ຂອງ​ອາຊີ ປະກອບ​ມີ 45 ປະເທດ ໃນ​ອາຊີ-ປາ​ຊີ​ຟິກ. ໃນ​ບົດ​ລາຍ​ງານ ໃໝ່​ຫຼ້າ​ສຸດ​ນັ້ນ ADB ໃຫ້ການ​ຄາດ​ຄະເນ​ວ່າ ເສດຖະກິດ​ໃນ​ເຂດ​ດັ່ງກ່າວ​ຈະ​ເຕີບ​ໂຕ 5,4% ໃນ​ປີ​ນີ້ ແລະ  5,5% ໃນ​ປີໜ້າ ນັບ​ວ່າ​ຕ່ຳ​ກວ່າ​ເມື່ອ​ທຽບໃສ່​ລະດັບ​ການ​ຄາດ​ຄະເນ​ຕາມ​ລຳດັບ ໄວ້​ທີ່ 5,7% ແລະ  5,6% ທີ່​ໄດ້​ນຳ​ອອກ​ມາ​ເມື່ອ​ເດືອນ​ກໍລະກົດ​ທີ່​ຜ່ານ​ມາ. ໃນ​ຂະນະ​ດຽວ​ກັນ ຄວາມ​ເຕີບ​ໂຕ ຕະຫຼອດ​ທັງ​ປີ​ຂອງ​ເຂດ​ດັ່ງກ່າວ ໃນ​ປີ 2018 ຢູ່​ທີ່ 5,9%.

    ADB ໃຫ້ການ​ຄາດ​ຄະເນ​ວ່າ ເສດຖະກິດ​ຂອງ​ຈີນ ຈະ​ເຕີບ​ໂຕ​ທີ່​ລະດັບ 6,2% ໃນ​ປີ​ນີ້ ເປັນ​ຕົວ​ເລກ​ທີ່​ຕ່ຳ​ກວ່າ​ລະດັບ​ທີ່​ໄດ້​ຄາດ​ຄະເນ​ໄວ້​ທີ່ 6,3% ທີ່​ມີ​ອອກ​ມາ​ໃນ​ເດືອນ​ກໍລະກົດ; ແລະ ໃນ​ປີ 2020 ອາດ​ຈະ​ຫຼຸດ​ລົງ​ເຖິງ 6%. ຈີນ​ວາງ​ຄາດໝາຍ​ຄວາມ​ເຕີບ​ໂຕ​ເສດຖະກິດ​ແຕ່ 6-6,5% ພາຍ​ໃນ ປີ 2019.

    ADB ໃຫ້​ຮູ້​ວ່າ ເມື່ອ​ເບິ່ງ​ຕາມ​ເຂດ​ແລ້ວ ອາຊີ​ໃຕ້​ຍັງ​ຄົງ​ເປັນ​ເຂດ​ທີ່​ເສດຖະກິດ​ພັດທະນາ ໄວ​ທີ່​ສຸດ ຢູ່​ໃນ​ພາກ​ພື້ນ​ອາຊີ-ປາ​ຊີ​ຟິກ ເຖິງ​ແມ່ນ​ວ່າ  ADB ໄດ້​ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ ຂອງ​ເຂດ​ດັ່ງກ່າວ ໃນ​ປີ 2019 ຈາກ 6,6% ລົງ​ໄປ​ຍັງ​ເຫຼືອ 6,2% ກໍ​ຕາມ.

    ໃນ​ຂະນະ​ດຽວ​ກັນ ADB ໃຫ້ການ​ຄາດ​ຄະເນ​ຄວາມ​ເຕີບ​ໂຕ​ເສດຖະກິດ ຂອງ​ເຂດ ອາຊີ​ຕາເວັນ​ອອກ​ສ່ຽງ​ໃຕ້ ໃນ​ປີ​ນີ້ ຖືກ​ປັບ​ຫຼຸດ​ຈາກ 4,8% ລົງ​ເປັນ 4,5% ເມື່ອ​ທຽບໃສ່​ລະດັບ ຄວາມ​ເຕີບ​ໂຕ 5,1% ໃນ​ປີ​ກາຍ ໃນ​ຂະນະ​ທີ່​ຄວາມ​ເຕີບ​ໂຕ​ຢູ່​ໃນ​ເຂດ​ນີ້ ພາຍ​ໃນ​ປີ 2020 ໄດ້​ຮັບ​ການ​ຄາດ​ຄະເນ​ວ່າ​ຢູ່​ທີ່ 4,7% ຊຶ່ງ​ກໍ​ຕ່ຳ​ກວ່າ​ເມື່ອ​ທຽບໃສ່​ລະດັບ​ຄາດ​ຄະເນ​ໄວ້ 4,9% ທີ່​ໄດ້​ນຳ​ອອກ​ມາ​ເມື່ອ​ເດືອນ​ກໍລະກົດ.

    ADB ຍັງ​ໃຫ້ການ​ຄາດ​ຄະເນ​ວ່າ ເງິນ​ເຟີ້ ຢູ່​ໃນ​ເຂດ​ດັ່ງກ່າວ ໃນ​ປີ 2019 ແລະ  2020 ຈະ​ຢູ່​ທີ່ 2,7% ເປັນ​ລະດັບ​ທີ່​ສູງ​ກວ່າ ເມື່ອ​ທຽບໃສ່​ລະດັບ 2,6% ທີ່​ໄດ້​ຄາດ​ຄະເນ​ອອກ​ມາ ກ່ອນ​ໜ້າ​ນີ້.

ຂ່າວທີ່ກ່ຽວຂ້ອງ