ຂ່າວຫຼ້າສຸດ

ພື້ນຖານ​ເສດຖະກິດ​ດີ​ຈີ​​ຕອນຂອງ​ຫວຽດນາມ ຄາດ​ວ່າ​ຈະ​ບັນລຸ 30 ຕື້​ໂດ​ລາ ພາຍ​ໃນ​ປີ 2025

92 30 ກ.ຍ. 2019 ຂ່າວຕ່າງປະເທດ
ພື້ນຖານ​ເສດຖະກິດ​ດີ​ຈີ​​ຕອນຂອງ​ຫວຽດນາມ ຄາດ​ວ່າ​ຈະ​ບັນລຸ 30 ຕື້​ໂດ​ລາ ພາຍ​ໃນ​ປີ 2025

   ຂ່າວສານ​ຫວຽດນາມ ລາຍ​ງານ​ວ່າ ຈາກ​ການ​ຢືນຢັນ​ທີ່​ມີ​ອອກ​ມາ​ຢູ່​ໃນ​ບົດ ຊຶ່ງ​ໄດ້​ລົງ​ພິມ​ຢູ່​ໃນ​ເວບ​ໄຊ Open Gov Asia ເມື່ອ​ວັນ​ທີ 24 ກັນຍາ​ທີ່​ຜ່ານ​ມາ ໂດຍ​ອ້າງ​ຕາມ​ຜົນ​ການ​ຄົ້ນຄວ້າ​ລາຍ​ໜຶ່ງ ຊີ້​ໃຫ້​ເຫັນ​ວ່າ ພື້ນຖານ​ເສດຖະກິດ​ດີ​ຈີ​​ຕອນ ຂອງ​ຫວຽດນາມ ໄດ້​ຮັບ​ການ​ກຳນົດ​ຄ່າ​ທີ່​ປະມານ 3 ຕື້​ໂດ​ລາ​ສະຫະລັດ ໃນ​ປີ 2015 ແລ້ວ​ເພີ່ມ​ຂຶ້ນ​ເປັນ 9 ຕື້​ໂດ​ລາ​ສະຫະລັດ ໃນ​ປີ 2018 ແລະ ຄາດ​ວ່າ​ຈະ​ບັນລຸ 30 ຕື້​ໂດ​ລາ​ສະຫະລັດ ພາຍ​ໃນ​ປີ 2025.

    ບົດ​ດັ່ງກ່າວ​ໃຫ້​ຮູ້​ວ່າ ເສດຖະກິດ​ດີ​ຈີ​​ຕອນ​ຂອງ​ຫວຽດນາມ ພວມ​ພັດທະນາ​ຢ່າງ​ໄວວາ ນຳ​ມາ​ຊຶ່ງ​ການ​ປະກອບສ່ວນ​ທີ່​ສຳຄັນ ໃຫ້​ແກ່​ເສດຖະກິດ​ຂອງ​ປະເທດ​ຊາດ. ໃນ​ຊຸມ​ປີ​ທີ່​ຜ່ານ​ມາ ຫວຽດນາມ​ໄດ້​ເຫັນ​ປະຈັກ​ຕາ ກ່ຽວ​ກັບ​ແຕກ​ອື້​ຂຶ້ນ​ໃນ​ຂົງເຂດ​ການ​ຈັດ​ຊື້​ອອນ​ລາຍ. ທ່າ​ອ່ຽງ ຂອງ​ການ​ຄ້າ​ເອ​ເລັກ​ໂຕຣ​ນິກ ແລະ ການ​ປະກົດ​ອອກ​ມາ​ຂອງ​ຮູບ​ການ​ທຸລະ​ກິດ​ໃໝ່ ຢູ່​ໃນ​ອິນ​ເຕີ​ເນັດ ໄດ້​ເຮັດ​ໃຫ້​ເກີດ​ການ​ປ່ຽນແປງ​ຄວາມ​ຊິນ​ເຄີຍ​ດ້ານ​ການ​ບໍລິໂພກ​ຂອງ​ປະຊາຊົນ.

    ບົດ​ດັ່ງກ່າວ​ເນັ້ນ​ໜັກ​ວ່າ ການ​ຄ້າ​ເອ​ເລັກ​ໂຕຣ​ນິກ​ໃນ​ຫວຽດນາມ ເປັນ​ຂົງເຂດ​ທີ່​ພັດທະນາ ໄວ​ທີ່​ສຸດ ໂດຍ​ມີ​ຄວາມ​ເຕີບ​ໂຕ​ປະມານ 30% ໃນ​ແຕ່​ລະ​ປີ ດ້ວຍ​ລາຍ​ຮັບ​ໃນ​ປີ 2018 ບັນລຸ​ປະມານ 8 ຕື້​ໂດ​ລາ​ສະຫະລັດ ແລະ ຄາດ​ວ່າ​ຈະ​ບັນລຸ​ຢ່າງ​ໜ້ອຍ 10 ຕື້​ໂດ​ລາ​ສະຫະລັດ ພາຍ​ໃນ​ປີ 2020. ຜູ້​ຂຽນ​ບົດ​ດັ່ງກ່າວ​ໃຫ້​ຮູ້​ວ່າ ບັນດາ​ວິ​ສາ​ຫະ​ກິດ​ດ້ານ​ໂທລະ​ຄົມມະນາຄົມ​ຢູ່​ໃນ​ຫວຽດນາມ ກໍ​ມີ​ການ ພັດທະນາ​ດ້ວຍ​ລາຍ​ຮັບ​ປະມານ 6,1 ຕື້​ໂດ​ລາ​ສະຫະລັດ ປະກອບ​ວຽກ​ເຮັດ​ງານ​ທຳ​ອອກ​ມາ​ໄດ້ 851.000 ກວ່າ​ຕຳແໜ່ງ​ງານ. ໃນ​ຂະນະ​ດຽວ​ກັນ ຂະແໜງການ​ໂຄສະນາ​ອອນ​ລາຍ ກໍ​ພວມ ພັດທະນາ​ຢ່າງ​ໄວວາ ດ້ວຍ​ລາຍ​ຮັບ​ຄາດ​ວ່າ​ຢູ່​ທີ່​ປະມານ​ກວ່າ 1 ຕື້​ໂດ​ລາ​ສະຫະລັດ ໃນ​ປີ 2020 ເປັນ​ຕົວ​ເລກ​ທີ່​ສູງ​ທົບ​ສາມ​ເທົ່າ ເມື່ອ​ທຽບໃສ່​ຕົວ​ເລກ​ໃນ​ປີ 2016.

 

ຂ່າວທີ່ກ່ຽວຂ້ອງ