ຂ່າວຫຼ້າສຸດ

WHO ​ແຈ້ງ​ເຕືອນ​ກ່ຽວ​ກັບ​ພະຍາດ​ອະຫິ​ວາ ຢູ່​ໃນ​ຊູ​ດານ

86 30 ກ.ຍ. 2019 ຂ່າວຕ່າງປະເທດ
WHO ​ແຈ້ງ​ເຕືອນ​ກ່ຽວ​ກັບ​ພະຍາດ​ອະຫິ​ວາ ຢູ່​ໃນ​ຊູ​ດານ

    ອົງການ​ອະນາໄມ​ໂລກ (WHO) ຢັ້ງຢືນ​ເມື່ອ​ວັນ​ທີ 25 ກັນຍາ​ທີ່​ຜ່ານ​ມາ ວ່າ​ມີ​ຜູ້​ເສຍ​ຊີວິດ 8 ຄົນ ຍ້ອນ​ພະຍາດ​ອະຫິ​ວາ ຢູ່​ໃນ​ປະເທດ​ຊູ​ດານ. ແຈ້ງ​ການ​ຂອງ WHO ທີ່​ມີ​ອອກ​ມາ​ເມື່ອ​ວັນ​ທີ 25 ກັນຍາ​ນັ້ນ ໄດ້​ອ້າງ​ຕາມ​ບົດ​ລາຍ​ງານ​ຂອງ​ກະຊວງ​ສາທາລະນະ​ສຸກ​ຊູ​ດານ ໃຫ້​ຮູ້​ວ່າ ໃນ​ເດືອນ​ທີ່​ຜ່ານ​ມາ ລວມ​ແລ້ວ​ມີ​ຜູ້​ຕິດພະຍາດ​ອະຫິ​ວາ 184 ຄົນ ທີ່​ໄດ້​ຮັບ​ການ​ຢັ້ງຢືນ ໃນ​ນັ້ນ​ມີ 128 ຄົນ​ຢູ່​ໃນ​ລັດ ບລູ ນາຍ ແລະ  56 ຄົນ ຢູ່​ໃນ​ລັດ ຊິນ​ນາ.

    WHO ພວມ​ສົມທົບ​ກັບ​ກະຊວງ​ສາທາລະນະ​ສຸກ​ຊູ​ດານ ເພື່ອ​ຄວບ​ຄຸມ​ການ​ລະບາດ ພະຍາດ ດັ່ງກ່າວ ແລະ ເພື່ອ​ຫຼຸດຜ່ອນ​ອັດຕາ​ສ່ວນ​ຜູ້​ເສຍ​ຊີວິດ ໃຫ້​ຕ່ຳ​ທີ່​ສຸດ. WHO ໄດ້​ສົ່ງ​ຢາ​ປົວ​ພະຍາດ​ອະຫິ​ວາ 36 ໂຕນ ແລະ ອຸປະກອນ​ການ​ແພດ ໄປ​ຍັງ​ນະຄອນຫຼວງ​ຄາ​ຕູມ ແລະ ພວມ​ກະກຽມ​ແຈກ​ຈ່າຍ​ໄປ​ຍັງ​ທ້ອງຖິ່ນ​ຕ່າງໆ​ທີ່​ເກີດ​ພະຍາດ​ລະບາດ.

    ອີກ​ດ້ານ​ໜຶ່ງ ກ່ອນ​ໜ້າ​ນີ້ ເມື່ອ​ປີ 2016 ພະຍາດ​ຖອກທ້ອງ​ຮຸນ​ແຮງ ໄດ້​ເກີດ​ການ​ລະບາດ ຢູ່​ໃນ​ປະເທດ​ຊູ​ດານ ສົ່ງ​ຜົນ​ໃຫ້​ມີ​ຜູ້​ຕິດພະຍາດ​ນີ້​ຫຼາຍ​ພັນ​ຄົນ ໃນ​ນັ້ນ​ມີ​ຜູ້​ເສຍ​ຊີວິດ​ຫຼາຍ​ສິບ​ຄົນ.

ຂ່າວທີ່ກ່ຽວຂ້ອງ