IMF ມີ​ຜູ້ອຳນວຍການ​ໃຫຍ່​ຄົນ​ໃໝ່​ຢ່າງ​ເປັນ​ທາງ​ການ

135 30 ກ.ຍ. 2019 ຂ່າວຕ່າງປະເທດ
IMF ມີ​ຜູ້ອຳນວຍການ​ໃຫຍ່​ຄົນ​ໃໝ່​ຢ່າງ​ເປັນ​ທາງ​ການ

    ຄະນະ​ບໍລິຫານ​ງານ​ຂອງ​ກອງ​ທຶນ​ເງິນຕາ​ສາກົນ (IMF) ໄດ້​ຮັບຮອງ​ຢ່າງ​ເປັນ​ທາງ​ການ​ເມື່ອ​ວັນ​ທີ 25 ກັນຍາ​ທີ່​ຜ່ານ​ມາ ກ່ຽວ​ກັບ​ການ​ນຳ​ສະເໜີ​ແຕ່ງຕັ້ງ​ທ່ານ​ນາງ ຄຣິ​​ສ​ຕາ​ລີ​ນາ ຈອດ​ເຈ​ວາ (Kristalina Georgieva) ນັກ​ເສດຖະສາດ​ຊາວ​ບູນ​ກາ​ຣີ (ອາຍຸ 66 ປີ) ຜູ້ອຳນວຍການ​ຝ່າຍ​ບໍລິຫານ​ຂອງ​ທະນາຄານ​ໂລກ (WB) ເຂົ້າ​ໃນ​ຕຳແໜ່ງ​ຜູ້ອຳນວຍການ​ໃຫຍ່​ຄົນ​ໃໝ່​ຂອງ IMF ຊຶ່ງ​ເປັນ​ອົງການ​ການ​ເງິນ​ທີ່​ມີ 189 ປະເທດ​ເປັນ​ສະມາຊິກ​ນັ້ນ.

    ວາລະ​ດຳລົງ​ຕຳແໜ່ງ​ຜູ້ອຳນວຍການ​ໃຫຍ່ IMF ຂອງ​ທ່ານ​ນາງ ຈອດ​ເຈ​ວາ ມີ​ກຳນົດ 5 ປີ ໂດຍ​ເລີ່ມ​ແຕ່​ວັນ​ທີ 1 ຕຸລາ​ໜ້າ​ນີ້​ເປັນຕົ້ນ​ໄປ. ກ່ອນ​ໜ້າ​ນັ້ນ ສະຫະພາບ​ເອີ​ຣົບ (EU) ໄດ້​ປ່ອນ​ບັດ​ຄັດ​ເລືອກ​ເອົາ​ທ່ານ​ນາງ ຄຣິ​​ສ​ຕາ​ລີ​ນາ ຈອດ​ເຈ​ວາ ເປັນ​ຜູ້​ສະໝັກ​ພຽງ​ຄົນ​ດຽວ ສຳລັບ​ຕຳແໜ່ງ ຜູ້ອຳນວຍການ​ໃຫຍ່  IMF.

    ເມື່ອ​ປີ 2010 ທ່ານ​ນາງ ຄຣິ​​ສ​ຕາ​ລີ​ນາ ຈອດ​ເຈ​ວາ ເຄີຍ​ເຮັດ​ວຽກ​ຢູ່​ໃນ​ຄະນະ​ກຳມະການ​ເອີ​ຣົບ​ມາ​ກ່ອນ ແລະ ຢູ່​ໃນ​ຕຳແໜ່ງ​ຜູ້ອຳນວຍການ​ຝ່າຍ​ບໍລິຫານ​ຂອງ WB ນັບ​ແຕ່​ເດືອນ​ມັງກອນ ປີ 2017 ເປັນຕົ້ນ​ມາ. ທ່ານ​ນາງ ຄຣິ​​ສ​ຕາ​ລີ​ນາ ຈອດ​ເຈ​ວາ ຢູ່​ໃນ​ຕຳແໜ່ງ​ປະທານ​ຮັກສາ​ການ​ຂອງ WB ແຕ່​ເດືອນ​ກຸມພາ ຮອດ​ເດືອນ​ເມສາ ປີ 2019.

ດັ່ງນັ້ນ ທ່ານ​ນາງ ຄຣິ​​ສ​ຕາ​ລີ​ນາ ຈອດ​ເຈ​ວາ ໄດ້​ກາຍເປັນ​ແມ່ຍິງ​ຄົນທີ​ສອງ ທີ່​ດຳລົງ​ຕຳແໜ່ງ​ຜູ້ອຳນວຍການ​ໃຫຍ່ IMF ຖັດ​ຈາກ​ທ່ານ​ນາງ ຄຣິ​​ສ​ຕິນ ລາ​ກາດ ຜູ້​ທີ່​ໄດ້​ລາ​ອອກ​ຈາກ​ຕຳແໜ່ງ​ໄປ​ກ່ອນ​ໜ້າ​ນັ້ນ ເພື່ອ​ໄປ​ນຳພາ​ທະນາຄານ​ກາງ​ເອີ​ຣົບ.

ຂ່າວທີ່ກ່ຽວຂ້ອງ