ຂ່າວຫຼ້າສຸດ

ເປີດສາກແລ້ວ ບານເຕະນັກຮຽນສາມັນ ໂຄປາ ໂຄຄາ-ໂຄລາ

342 01 ຕ.ລ. 2019 ວົງຈອນກີລາ
ເປີດສາກແລ້ວ ບານເຕະນັກຮຽນສາມັນ ໂຄປາ ໂຄຄາ-ໂຄລາ

    ການ​ແຂ່ງ­ຂັນ​ບານ­ເຕະ​ເຍົາ­ວະ​ຊົນ (7 ຄົນ) ນັກ­ຮຽນ​ສາ­ມັນ​ສຶກ​ສາ ຮຸ່ນ​ອາ­ຍຸ​ບໍ່​ເກີນ 16 ປີ ລາຍ­ການ ໂຄ​ປາ ໂຄ​ຄາ-ໂຄ​ລາ ຄັ້ງ​ທີ III ເປີດ​ສາກ​ຂຶ້ນ​ເປັນ​ທາງ​ການ ວັນ​ທີ 27 ກັນ­ຍາ 2019 ຢູ່​ສະ­ໜາມ​ກີ­ລາ​ບານ­ເຕະ​ລ້ານ​ຊ້າງ ບ້ານ​ໜອງ​ໄຮ ເມືອງ​ຫາດ​ຊາຍ​ຟອງ ນະ­ຄອນ­ຫຼວງ​ວຽງ​ຈັນ (ນວ) ໂດຍ​ມີ​ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ຜູ້­ຕາງ­ໜ້າ​ບໍ­ລິ­ສັດ​ລາວ ໂຄ​ຄາ-ໂຄ​ລາ​ບ໊ອດ​ຕຼິງ ຈຳ­ກັດ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ສົມ​ພູ ແກ້ວ​ປັນ­ຍາ ກ່າວ​ວ່າ: ການ​ແຂ່ງ­ຂັນ​ຄັ້ງ​ນີ້ ມີ​ຄວາມ​ໝາຍ​ຄວາມ​ສຳ­ຄັນ​ເລິກ­ເຊິ່ງ​ຕໍ່​ຂະ​ບວນ​ການ​ພັດ­ທະ­ນາ​ກີ­ລາ​ບານ­ເຕະ ນວ ແລະ ໄດ້​ມີ​ການ​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ກວ້າງ ສະ­ແດງ​ອອກ​ການ​ຈັດ​ງານ 2 ຄັ້ງ​ຜ່ານ​ມາ ມີ​ນັກ­ກີ­ລາ​ເພີ່ມ​ຂຶ້ນ​ເລື້ອຍໆ ແລະ ລາຍ­ການ​ນີ້​ຈະ​ເປັນ​ເວ­ທີ​ຍົກ​ລະ­ດັບ​ນັກ­ກີ­ລາ​ລາວ ກໍ​ຄື ນວ ເພື່ອ​ກ້າວ​ຂຶ້ນ​ໄປ​ເປັນ​ນັກ­ກີ­ລາ​ທີມ​ຊາດ​ໃນ​ອະ­ນາ­ຄົດ.

    ສຳ­ລັບ​ການ​ແຂ່ງ­ຂັນ​ໄດ້​ຈັບ​ສະ­ຫຼາກ​ປະ​ກົບ​ຄູ່​ເສຍ​ຕົກ​ຮອບ ເພື່ອ​ເອົາ​ທີມ​ທີ່​ດີ​ທີ່​ສຸດ​ຕົວ​ແທນ​ຂອງ​ແຕ່​ລະ​ເມືອງໆ​ລະ 1 ທີມ ຈາກ 9 ຕົວ​ເມືອງ (ຍິງ 9 ທີມ ຊາຍ 9 ທີມ) ເຂົ້າ​ແຂ່ງ­ຂັນ​ຮອບ​ສຸດ​ທ້າຍ ໂດຍ​ວັນ​ທີ 28 ກັນ­ຍາ-4 ຕຸ­ລາ 2019 ແຂ່ງ­ຂັນ​ຂັ້ນ​ເມືອງ ຢູ່​ສະ­ໜາມ​ເຕະ­ບານ​ຫຍ້າ​ທຽມ​ກູດ​ໄລ້ ເມືອງ​ສີ​ໂຄດ​ຕະ­ບອງ ແລະ ສະ­ໜາມ​ເຕະ­ບານ​ຫຍ້າ​ທຽມ​ນິວ​ອາ­ລີ​ນາ ເມືອງ​ສີ​ສັດ­ຕະ​ນາກ ວັນ​ທີ 7-8 ຕຸ­ລາ ແຂ່ງ­ຂັນ​ຂັ້ນ ນວ ວັນ​ທີ 11 ຕຸ­ລາ 2019 ນັດ​ຊີງ​ອັນ​ດັບ 3 ແລະ ຊີງ​ຊະ­ນະ​ເລີດ ໃຊ້​ສະ­ໜາມ​ລ້ານ​ຊ້າງ.

ຂ່າວທີ່ກ່ຽວຂ້ອງ