ລັດ ວໍຊິງຕັນ ປະກາດໃຊ້ຄຳສັ່ງຫ້າມຢາສູບເອເລັກໂຕຣນິກ

497 01 ຕ.ລ. 2019 ຂ່າວຕ່າງປະເທດ
ລັດ ວໍຊິງຕັນ ປະກາດໃຊ້ຄຳສັ່ງຫ້າມຢາສູບເອເລັກໂຕຣນິກ

   ດຳລັດດ້ານບໍລິຫານ ທີ່ໄດ້ລົງນາມເມື່ອວັນທີ 28 ກັນຍາທີ່ຜ່ານມາ ລະບຸວ່າ ທ່ານ ເຈ ອິນສເລ ຜູ້ວ່າການລັດວໍຊິງຕັນ ໄດ້ສະເໜີໄປຍັງອົງການສາທາລະນະສຸກຂອງລັດ ວໍຊິງຕັນ ໃຫ້ຫ້າມຢ່າງສິ້ນເຊີງ ຕໍ່ບັນດາຜະລິດຕະພັນທີ່ເຈືອປົນ ນີໂກຕິນ (nicotine) ແລະ ທາດເຄມີອື່ນໆ ອີກຈຳນວນໜຶ່ງ  ທີ່ນຳໃຊ້ໃຫ້ແກ່ຢາສູບເອເລັກໂຕຣນິກ (ຢາສູບໄຟຟ້າ).

    ຖ້າຫາກໄດ້ຮັບການຮັບຮອງ ຈາກອົງການສາທາລະນະສຸກຂອງລັດວໍຊິງຕັນ ໃນລະຫວ່າງ ການປະຊຸມ ໃນວັນທີ 9 ຕຸລານີ້ແລ້ວ ດຳລັດດັ່ງກ່າວກໍຈະມີຜົນບັງຄັບໃຊ້ທັນທີໃນມື້ນັ້ນ ແລະ ແກ່ຍາວເປັນ 120 ວັນ ແລະ ຄຳສັ່ງຫ້າມນັ້ນ ກໍອາດຕໍ່ກຳນົດໄດ້ອີກ.

    ທ່ານ ອິນສເລ ເວົ້າວ່າ ຄຳສັ່ງຫ້າມດັ່ງກ່າວ ແມ່ນເພື່ອສະກັດກັ້ນຢາສູບເອເລັກໂຕຣນິກ ປະເພດຕ່າງໆ ເຊັ່ນປະເພດທີ່ມາຈາກຍີ່ຫໍ້ JUULs ແລະ ພວກປະເພດທີ່ສະກັດຈາກກິ່ນໝາກໄມ້ ທີ່ອາດຈະເຈືອປົນ nicotine ຫຼື tetrahydrocannabinol (THC ທີ່ເປັນສານເຄມີປະສົມ ທີ່ກັ່ນມາຈາກຕົ້ນພືດຊະນິດໜຶ່ງ) ແລະ ສານເຄມີຈຳນວນໜຶ່ງທີ່ມີຜົນຮ້າຍ. ທ່ານ ອິນສເລ ໃຫ້ຮູ້ວ່າ ນີ້ເປັນພວກຜະລິດຕະພັນທີ່ເຈືອປົນສານນີໂກຕິນ ທີ່ໃຊ້ກັນຫຼາຍຢູ່ໃນລັດວໍຊິງຕັນ. ນັກຮຽນຊັ້ນ ມັດທະຍົມສຶກສາ ກວມເອົາເຖິງ 30% ຂອງຈຳນວນຜູ້ສູບຢາ ໂດຍເພີ່ມຂຶ້ນຈາກລະດັບ 20% ເມື່ອປີ 2016.

    ມາດຕະການດັ່ງກ່າວມີອອກມາ ຫຼັງຈາກທີ່ຢູ່ໃນລັດວໍຊິງຕັນ ຢັ້ງຢືນຜູ້ເປັນພະຍາດໃນປອດ 7 ກໍລະນີ ຍ້ອນນຳໃຊ້ຢາສູບເອເລັກໂຕຣນິກ. ສູນຄວາມຄຸມ ແລະ ປ້ອງກັນພະຍາດຂອງ ສ ອາເມຣິກາ ໃຫ້ຮູ້ວ່າ ທົ່ວ ສ ອາເມຣິກາ ມີຜູ້ເສຍຊີວິດແລ້ວຢ່າງໜ້ອຍ 12 ຄົນ ແລະ  800 ກວ່າກໍລະນີເປັນພະຍາດໃນປອດ ຊຶ່ງພົວພັນເຖິງຢາສູບເອເລັກໂຕຣນິກ.

    ກ່ອນໜ້ານີ້ ລັດອື່ນໆຈຳນວນໜຶ່ງໃນ ສ ອາເມຣິກາ ເຊັ່ນ ນີວຢອກ ມີຊີແກນ ແລະ  ມາຊາຊູແຊດ ກໍໄດ້ຫ້າມຢາສູບເອເລັກໂຕຣນິກມາແລ້ວ ເນື່ອງຈາກກັງວົນເຖິງການເພີ່ມຂຶ້ນ ຂອງກໍລະນີຜູ້ເປັນພະຍາດໃນປອດ ຊຶ່ງພົວພັນເຖິງຢາສູບເອເລັກໂຕຣນິກ ພ້ອມທັງກົວວົນວ່າ ບັນດາຜະລິດຕະພັນຢາສູບເອເລັກໂຕຣນິກທີ່ມີກິ່ນຫອມ ນັ້ນຈະເຮັດໃຫ້ໄວໜຸ່ມຕິດນີໂກຕິນໄດ້ງ່າຍ.

 

ຂ່າວທີ່ກ່ຽວຂ້ອງ