ກູ​ບາ ຕິຕຽນ ສ ອາ​ເມ​ຣິ​ກາ ທີ່​ຫ້າມ​ເຂົ້າ​ເມືອງ​ຕໍ່​ອະດີດ​ປະທານ ຣາ​ອູນ ​ກັສ​ໂຕຣ

494 01 ຕ.ລ. 2019 ຂ່າວຕ່າງປະເທດ
ກູ​ບາ ຕິຕຽນ ສ ອາ​ເມ​ຣິ​ກາ ທີ່​ຫ້າມ​ເຂົ້າ​ເມືອງ​ຕໍ່​ອະດີດ​ປະທານ ຣາ​ອູນ ​ກັສ​ໂຕຣ

   ທ່ານ ບຣູ​ໂນ ໂຣດ​ຣີ​ເກ​​ສ ລັດຖະມົນຕີ​ການ​ຕ່າງປະເທດ​ກູ​ບາ ກ່າວ​ຕໍ່​ກອງ​ປະຊຸມ ສະມັດຊາ​ໃຫຍ່​ສະຫະ​ປະຊາ​ຊາດ ເມື່ອ​ວັນ​ທີ 28 ກັນຍາ​ທີ່​ຜ່ານ​ມາ ໂດຍ​ໄດ້​ຕິຕຽນ​ຕໍ່​ທາງ​ການ                  ສ ອາ​ເມ​ຣິ​ກາ ພາຍ​ໃຕ້​ການ​ນຳພາ​ຂອງ​ປະທານາທິບໍດີ ໂດ​ນາ​​ລ ທຣຳ ໃນ​ການ​ທີ່​ໄດ້​ປະຕິບັດ ຄຳ​ສັ່ງ​ຫ້າມ​ເຂົ້າ​ເມືອງ​ຕໍ່​ທ່ານ ຣາ​ອູນ ​ກັສ​ໂຕຣ ເລຂາ​ທີ​ໜຶ່ງ​ຂອງ​ພັກ​ກອມ​ມູ​ນິດ​ກູ​ບາ. ທ່ານ ໂຣດ​ຣີ​ເກ​​ສ ກ່າວ​ເນັ້ນ​ວ່າ ນີ້​ເປັນ​ການ​ກະທຳ ທີ່​ບໍ່​ມີ​ຄຸນ​ປະໂຫຍດ​ຕົວ​ຈິງ ແລະ ມີ​ເປົ້າ​ໝາຍ​ແຕະຕ້ອງ​ເຖິງ​ກຽດ​ສັກ​ສີ ຂອງ​ມະນຸດ ກໍ​ຄື​ຄວາມ​ຮູ້ສຶກ​ຂອງ​ປະຊາຊົນ​ກູ​ບາ.

    ເມື່ອ​ວັນ​ທີ 26 ກັນຍາ​ທີ່​ຜ່ານ​ມາ ທ່ານ ໄມ ພອມ​ປີ​ໂອ ລັດຖະມົນຕີ​ການ​ຕ່າງປະເທດ ສ ອາ​ເມ​ຣິ​ກາ ແຈ້ງ​ໃຫ້​ຮູ້​ວ່າ ທ່ານ ຣາ​ອູນ ​ກັສ​ໂຕຣ ເລຂາ​ທີ​ໜຶ່ງ​ຂອງ​ພັກ​ກອມ​ມູ​ນິດ​ກູ​ບາ ທັງ​ເປັນ​ອະດີດ​ປະທານ​ສະພາ​ແຫ່ງ​ລັດ ແລະ ສະພາ​ລັດຖະມົນຕີ​ກູ​ບາ ພ້ອມ​ດ້ວຍ​ຍອດ​ຕິ​ພີ່ນ້ອງ ຂອງ​ເພິ່ນ ຈະ​ບໍ່​ມີ​ເງື່ອນໄຂ​ພຽງພໍ ເພື່ອ​ເຂົ້າ​ໄປ​ໃນ ສ ອາ​ເມ​ຣິ​ກາ.

    ກ່ອນ​ໜ້າ​ນັ້ນ ເມື່ອ​ວັນ​ທີ 19 ກັນຍາ​ທີ່​ຜ່ານ​ມາ ສ ອາ​ເມ​ຣິ​ກາ ກໍ​ໄດ້​ອອກ​ຄຳ​ສັ່ງ ຂັບ​ໄລ່​ສະມາຊິກ​ຂອງ​ຄະນະ​ຜູ້​ແທນ​ກູ​ບາ 2 ຄົນ ຢູ່​ໃນ​ສະຫະ​ປະຊາ​ຊາດ ແລະ ຈຳກັດ​ການ​ໄປ​ມາ​ຕໍ່​ບັນດາ​ສະມາຊິກ​ທີ່​ຍັງ​ເຫຼືອ ຫຼັງ​ຈາກ​ທີ່​ໄດ້​ກ່າວ​ຫາ​ເຂົາເຈົ້າ ວ່າ​ພະຍາຍາມ​ດຳເນີນ​ການເຄື່ອນໄຫວ ຕ້ານ​ກັບ ສ ອາ​ເມ​ຣິ​ກາ.

ຂ່າວທີ່ກ່ຽວຂ້ອງ