ຂ່າວຫຼ້າສຸດ

WHO ​ແລະ MSF ​ໄດ້​ຮັບ​ການ​ຍົກ​ເວັ້ນ​ຄຳ​ສັ່ງ​ປິດ​ລ້ອມ ​ສປປ ​ເກົາຫຼີ

503 01 ຕ.ລ. 2019 ຂ່າວຕ່າງປະເທດ
WHO ​ແລະ  MSF ​ໄດ້​ຮັບ​ການ​ຍົກ​ເວັ້ນ​ຄຳ​ສັ່ງ​ປິດ​ລ້ອມ ​ສປປ ​ເກົາຫຼີ

     ອົງການ​ສະຫະ​ປະຊາ​ຊາດ (​ສປຊ) ໄດ້​ຍົກເວັ້ນ​ຄຳ​ສັ່ງ​ປິດ​ລ້ອມ​ຕໍ່ ​ສປປ ເກົາຫຼີ ເປັນ​ການ​ຊົ່ວຄາວ ໃຫ້​ແກ່​ອົງການ​ອະນາໄມ​ໂລກ (WHO) ແລະ ອົງການ​ທ່ານໝໍ​ໄຮ້​ພົມ​ແດນ (MSF). ຈາກ​ການ​ຕັດສິນ​ນີ້ ສອງ​ອົງ​ການຈັດຕັ້ງ​ຂອງ​ສາກົນ​ດັ່ງກ່າວ ໄດ້​ຮັບ​ອະນຸຍາດ​ຜັນ​ຂະຫຍາຍ​ບັນດາ​ໂຄງການ​ຊ່ວຍເຫຼືອ​ແກ່ ​ສປປ ເກົາຫຼີ.

    ຂ່າວສານ​ຢອນ​ຮັບ ຂອງ ສ ເກົາຫຼີ ລາຍ​ງານ​ເມື່ອ​ວັນ​ທີ 28 ກັນຍາ​ທີ່​ຜ່ານ​ມາ ໂດຍ​ອ້າງ​ຕາມ​ຂໍ້​ມູນ​ຈາກ​ເວບ​ໄຊ​ຂອງ ​ສປຊ ໃຫ້​ຮູ້​ວ່າ WHO ແລະ  MSF ຈະ​ໄດ້​ນຳ​ເອົາ​ອຸປະກອນ​ການ​ແພດ​ທີ່​ຈຳເປັນ ເພື່ອ​ຮັບ​ໃຊ້​ໃຫ້​ແກ່​ບັນດາ​ໂຄງການ​ຊ່ວຍເຫຼືອ​ຂອງ​ເຂົາເຈົ້າ ຢູ່​ໃນ ​ສປປ ເກົາຫຼີ ພາຍ​ໃນ​ເວລາ 6 ເດືອນ.  ແຈ້ງ​ການ​ດັ່ງກ່າວ ມີ​ຜົນ​ບັງຄັບ​ໃຊ້​ກັບ WHO ນັບ​ແຕ່​ວັນ​ທີ 20 ກັນຍາ ແລະ ກັບ MSF ແຕ່​ວັນ​ທີ 23 ກັນຍາ​ເປັນຕົ້ນ​ໄປ.

    ນັບ​ແຕ່​ປີ 2006 ເປັນຕົ້ນ​ມາ ສະພາ​ຄວາມ​ໝັ້ນຄົງ​ຂອງ ​ສປຊ ໄດ້​ປະຕິບັດ​ຄຳ​ສັ່ງ​ປິດ​ລ້ອມ ​ສປປ ເກົາຫຼີ ຫຼັງ​ຈາກ​ທີ່​ປະເທດ​ນີ້​ດຳເນີນ​ການ​ທົດ​ລອງ​ນີວ​ເຄລຍ. ມາ​ຮອດ​ເວລາ​ນີ້ ​ສປຊ ພວມ​ປະຕິບັດ​ຄຳ​ສັ່ງ​ປິດ​ລ້ອມ​ຫຼາຍ​ລາຍການ​ຕໍ່ ​ສປປ ເກົາຫຼີ ໃນ​ຂົງເຂດ​ການ​ຄ້າ ອາວຸດ ການ​ຂົນສົ່ງ ການ​ເງິນ ການ​ທູດ ແລະ ອື່ນໆ.

ຂ່າວທີ່ກ່ຽວຂ້ອງ