ພາກ​ເໜືອ​ຝຣັ່ງ ຫ້າມ​ເກັບ​ກູ້​ຜົນລະປູກ ຫຼັງ​ເກີດ​ເຫດການ​ໄຟ​ໄໝ້​ໂຮງງານ​ເຄ​ມີ

497 01 ຕ.ລ. 2019 ຂ່າວຕ່າງປະເທດ
ພາກ​ເໜືອ​ຝຣັ່ງ ຫ້າມ​ເກັບ​ກູ້​ຜົນລະປູກ ຫຼັງ​ເກີດ​ເຫດການ​ໄຟ​ໄໝ້​ໂຮງງານ​ເຄ​ມີ

   ເຈົ້າ​ໜ້າທີ່​ໃນ​ເຂດ​ພາກ​ເໜືອ​ຝຣັ່ງ ໄດ້​ປະກາດ​ຫ້າມ​ອອກ​ມາ​ໃນ​ວັນ​ທີ 30 ກັນຍາ​ທີ່​ຜ່ານ​ມາ ສຳລັບ​ການ​ເກັບ​ກູ້​ຜົນລະປູກ ແລະ ການ​ເຮັດ​ທຸລະ​ກິດ​ຜະລິດ​ຕະ​ພັນ​ຈາກ​ສັດລ້ຽງ ທີ່​ມີ​ຕົ້ນ​ທາງ​ມາ​ຈາກ​ເຂດ​ທີ່​ເກີດ​ເຫດການ​ໄຟ​ໄໝ້​ໂຮງງານ​ເຄ​ມີ​ແຫ່ງ​ໜຶ່ງ ໃນ​ນະຄອນ ຣູ​ເອນ (Rouen) ຊຶ່ງ​ເກີດ​ຂຶ້ນ​ເມື່ອ​ອາທິດ​ກ່ອນ ນັ້ນ​ຄື​ກັບ​ວ່າ​ເປັນ​ມາດ​ຕະການ​ປ້ອງ​ກັນ​ໄວ້​ກ່ອນ. ຄາດ​ວ່າ​ມີ​ປະມານ 100 ເມືອງ​ຢູ່​ໃນ​ເຂດ​ອ້ອມແອ້ມ​ນະຄອນ​ຣູ​ເອນ ໄດ້​ຮັບ​ຜົນ​ກະທົບ​ຈາກ​ຄຳ​ສັ່ງ​ຫ້າມ​ດັ່ງກ່າວ.

    ແຈ້ງ​ການ​ໃຫ້​ຮູ້​ວ່າ ຂີ້ເທົ່າ​ຖ່ານ​ຈາກ​ເຫດການ​ໄຟ​ໄໝ້​ດັ່ງກ່າວ ເປັນ​ຜົນ​ກະທົບ​ຕໍ່​ບາງ​ເຂດ​ທີ່​ທຳ​ການ​ຜະລິດ​ທາງ​ດ້ານ​ກະສິກຳ ຊຶ່ງ​ອາດ​ເຮັດ​ໃຫ້​ເກີດ​ຄວາມ​ສ່ຽງ​ຕໍ່​ສຸຂະພາບ​ຂອງ​ຊຸມ​ຊົນ ຈຶ່ງ​ເຮັດ​ໃຫ້​ເຈົ້າ​ໜ້າທີ່​ຕ້ອງ​ໄດ້​ນຳ​ເອົາ​ມາດ​ຕະການ​ອອກ​ມາ​ທັນທີ ເພື່ອ​ເປັນ​ການ​ປ້ອງ​ກັນ​ໄວ້​ກ່ອນ.

    ເມື່ອ​ວັນ​ທີ 27 ກັນຍາ​ທີ່​ຜ່ານ​ມາ ລັດຖະມົນຕີ​ກະຊວງ​ສາທາລະນະ​ສຸກ​ຂອງ​ຝຣັ່ງ ໄດ້​ກ່າວ​ຍອມຮັບ​ວ່າ ບໍ່​ຮັບປະກັນ​ໄດ້​ວ່າ​ຈະ​ບໍ່​ມີ​ຄວາມ​ສ່ຽງ​ເຊື່ອມ​ພິດ ຈາກ​ເຫດການ​ໄຟ​ໄໝ້​ນັ້ນ ຕໍ່​ປະຊາຊົນ​ພາຍ​ໃນ​ເຂດ​ອ້ອມແອ້ມ​ທີ່​ຕັ້ງ​ຂອງ​ໂຮງງານ. ເຫດການ​ໄຟ​ໄໝ້​ນັ້ນ​ເກີດ​ຂຶ້ນ​ເມື່ອ​ວັນ​ທີ 25 ກັນຍາ ຊຶ່ງ​ເກີດ​ຂຶ້ນ​ໃນ​ສາງ​ເກັບ​ມ້ຽນ​ວັດຖຸ​ຂອງ​ບໍລິສັດ Lubrizol ທີ່​ເປັນ​ບໍລິສັດ​ຜູ້​ຜະລິດ​ທາດ​ຫຼໍ່​ລື່ນ​ໃນ​ພາກ​ອຸດສາຫະກຳ ແລະ ທາດ​ປະສົມ​ນ້ຳມັນ ທີ່​ເປັນ​ກຳມະສິດ​ຂອງ ວາ​ເຣນ ບຸ​​ຟ​ເຟດ ມະຫາ​ເສດຖີ​ຊາວ​ອາ​ເມ​ຣິ​ກັນ.

ຂ່າວທີ່ກ່ຽວຂ້ອງ