ຊິ​​ມ​ບັບ​ເວ ມີ​ຄວາມ​ສ່ຽງ​ທີ່​ຈະ​ເກີດ​ເງິນ​ເຟີ້​ສູງ​ຄື​ກັບ​ເມື່ອ​ຫຼາຍ​ປີຜ່ານມາ

559 01 ຕ.ລ. 2019 ຂ່າວຕ່າງປະເທດ
ຊິ​​ມ​ບັບ​ເວ ມີ​ຄວາມ​ສ່ຽງ​ທີ່​ຈະ​ເກີດ​ເງິນ​ເຟີ້​ສູງ​ຄື​ກັບ​ເມື່ອ​ຫຼາຍ​ປີຜ່ານມາ

   ເມື່ອ​ອາທິດ​ທີ່​ຜ່ານ​ມາ ອົງການ​ກອງ​ທຶນ​ເງິນຕາ​ສາກົນ (IMF) ໄດ້​ເປີດເຜີຍ​ຕົວ​ເລກ​ກ່ຽວ​ກັບ​ເງິນ​ເຟີ້​ຂອງ​ຊິມ​ບັບ​ເວ ພາຍ​ໃນ​ເດືອນ​ສິງຫາ​ທີ່​ຜ່ານ​ມາ ໂດຍ​ລະບຸ​ວ່າ​ຊິມ​ບັບ​ເວ​ທີ່​ໄດ້​ປະ​ເຊີນ​ກັບ​ວິ​ກິດ​ການ​ທາງ​ດ້ານ​ເສດຖະກິດ ໃນ 20 ປີ​ທີ່​ຜ່ານ​ມາ​ນັ້ນ ເງິນ​ເຟີ້​ໄດ້​ພຸ່ງ​ຂຶ້ນ​ສູ່​ລະດັບ​ເກືອບ 300% ແລະ ມີ​ຄວາມ​ສ່ຽງ​ທີ່​ປະເທດ​ນີ້​ຈະ​ກັບ​ສູ່​ສະພາບ​ເງິນ​ເຟີ້​ສູງ ຄື​ກັນ​ກັບ​ໃນ​ຊຸມ​ປີ 2000.

    IMF ໃຫ້​ຮູ້​ວ່າ ສະກຸນ​ເງິນ​ຂອງ​ຊິມ​ບັບ​ເວ ໄດ້​ຕົກ​ຄ່າ​ຢ່າງ​ແຮງ ຈາກ​ທີ່ 1 ໂດ​ລາ​ສະຫະລັດ ປ່ຽນ​ໄດ້ 1 ໂດ​ລາ​ຊິມ​ບັບ​ເວ ເມື່ອ​ເດືອນ​ກຸມພາ​ທີ່​ຜ່ານ​ມາ ລົງ​ໄປ​ສູ່ 1 ໂດ​ລາ​ສະຫະລັດ ປ່ຽນ​ໄດ້ 16,5 ໂດ​ລາ​ຊິມ​ບັບ​ເວ (ໄລ່​ມາ​ຮອດ​ວັນ​ທີ 23 ກັນຍາ​ທີ່​ຜ່ານ​ມາ) ຈາກ​ນັ້ນ​ກໍ​ເຮັດ​ໃຫ້​ລະດັບ​ເງິນ​ເຟີ້​ໃນ​ເດືອນ​ສິງຫາ​ປີ​ນີ້ ຢູ່​ທີ່​ເກືອບ 300%.

    IMF ເນັ້ນ​ໜັກ​ວ່າ ຊິມ​ບັບ​ເວ ຈະ​ສືບຕໍ່​ພົບ​ກັບ​ຄວາມ​ຫຍຸ້ງຍາກ​ທາງ​ດ້ານ​ເສດຖະກິດ ພາຍ​ໃນ​ຊຸມ​ເດືອນ​ທີ່​ຍັງ​ເຫຼືອ​ຂອງ​ປີ 2019 ແລະ ຍິ່ງ​ໄປ​ກວ່າ​ນັ້ນ ສະພາບ​ການ​ຍັງ​ຈະ​ຮ້າຍ​ແຮງ​ຂຶ້ນ ຍ້ອນ​ໄດ້​ຮັບ​ຜົນ​ກະທົບ​ຈາກ​ສະພາບ​ດິນ​ຟ້າ​ອາກາດ ບໍ່​ອຳນວຍ​ໃຫ້​ແກ່​ການ​ຜະລິດ.

    ການ​ຄາດ​ຄະເນ​ຂອງ IMF ເຮັດ​ໃຫ້​ເກີດ​ຄວາມ​ກັງວົນ​ວ່າ ຊິມ​ບັບ​ເວ​ຈະ​ກັບ​ຄືນ​ສູ່​ສະພາບ​ເງິນ​ເຟີ້​ສູງ ທີ່​ໄດ້​ເກີດ​ຂຶ້ນ​ເມື່ອ 10 ກວ່າ​ປີ​ກ່ອນ​ໜ້າ​ນີ້ ຊຶ່ງ​ເວລາ​ນັ້ນ​ເງິນ​ເຟີ້​ໄດ້​ຖີບ​ຕົວ​ຂຶ້ນ​ເຖິງ 500 ຕື້​ສ່ວນ​ຮ້ອຍ. ສະພາບ​ເງິນ​ເຟີ້​ດັ່ງກ່າວ ໄດ້​ຢຸດຕິ​ລົງ ເມື່ອ​ຊິມ​ບັບ​ເວ​ເຊົາ​ໃຊ້​ສະກຸນ​ເງິນ​ພາຍ​ໃນ​ເມື່ອ​ປີ 2009 ແລະ ສ້າງຕັ້ງ​ລະບົບ​ການ​ແລກປ່ຽນ​ການ​ຄ້າ​ດ້ວຍ​ຫຼາຍ​ເງິນຕາ ໃນ​ນັ້ນ​ເງິນ​ໂດ​ລາ​ສະຫະລັດ​ໄດ້​ຮັບ​ການ​ນຳ​ໃຊ້​ທົ່ວ​ໄປ​ຫຼາຍ​ທີ່​ສຸດ. ເຖິງ​ຢ່າງໃດ​ກໍ​ຕາມ ໃນ 6 ເດືອນ​ທີ່​ຜ່ານ​ມາ ເງິນ​ເຟີ້​ຂອງ​ຊິມ​ບັບ​ເວ ຢູ່​ທີ່​ລະດັບ 176% ແລະ ປະເທດ​ນີ້​ໄດ້​ມີ​ການ​ຕົກລົງ​ອອກ​ມາ ກ່ຽວ​ກັບ​ການ​ຫ້າມ​ການ​ຊື້​ຂາຍ​ດ້ວຍ​ເງິນຕາ​ຕ່າງປະເທດ ໃນ​ຄວາມ​ພະຍາຍາມ​ເພື່ອ​ເຮັດ​ໃຫ້​ເງິນຕາ​ຕ່າງປະເທດ​ບົກ​ແຫ້ງ​ລົງ​ຢູ່​ໃນ​ຕະຫຼາດ​ມືດ ແລະ ຫຼີກເວັ້ນ​ການ​ກັບ​ຄືນ​ມາ​ຂອງ​ສະພາບ​ເງິນ​ເຟີ້​ສູງ.

ຂ່າວທີ່ກ່ຽວຂ້ອງ