ບັນດາ​ປະ​ເທດ​ລ້ຳ​ລວຍ ​ຖືກ​ກ່າວ​ຫາ​ວ່າ​ຫຼຸດຜ່ອນ​ການ​ຈ່າຍ​ເງິນ​ຊ່ວຍ​ເຫຼືອ​ມະນຸດສະທຳ

599 02 ຕ.ລ. 2019 ຂ່າວຕ່າງປະເທດ
ບັນດາ​ປະ​ເທດ​ລ້ຳ​ລວຍ ​ຖືກ​ກ່າວ​ຫາ​ວ່າ​ຫຼຸດຜ່ອນ​ການ​ຈ່າຍ​ເງິນ​ຊ່ວຍ​ເຫຼືອ​ມະນຸດສະທຳ

    ບົດ​ລາຍ​ງານ​ຂອງ​ອົງການ​ພັດທະນາ​ເອກະລາດ Development Initiatives ກ່ຽວ​ກັບ​ການ​ຊ່ວຍເຫຼືອ​ມະນຸດສະທຳ​ທົ່ວ​ໂລກ (GHA) ທີ່​ໄດ້​ນຳ​ອອກ​ມາ​ເຜີຍແຜ່​ເມື່ອ​ວັນ​ທີ 30 ກັນຍາ​ທີ່​ຜ່ານ​ມາ ໃຫ້​ຮູ້​ວ່າ ບັນດາ​ປະເທດ​ທີ່​ລ້ຳ​ລວຍ ອັນ​ປະກອບ​ດ້ວຍ ສ ອາ​ເມ​ຣິ​ກາ ເຢຍ​ລະ​ມັນ ແລະ ອັງກິດ ໄດ້​ຫຼຸດ​ການ​ໃຊ້​ຈ່າຍ​ເຂົ້າ​ໃນ​ການ​ຊ່ວຍເຫຼືອ​ມະນຸດສະທຳ​ໃນ​ປີ 2018 ທ່າມກາງ​ທີ່​ອົງການ​ສະຫະ​ປະຊາ​ຊາດ (​ສປຊ) ພວມ​ພະຍາຍາມ​ແກ້​ໄຂ​ຄວາມ​ຕ້ອງການ​ໃນ​ການ​ຊ່ວຍເຫຼືອ​ມະນຸດສະທຳ ຢ່າງ​ບໍ່​ເຄີຍ​ມີ​ມາ​ກ່ອນ.

    ບົດ​ລາຍ​ງານ​ດັ່ງກ່າວ ລະບຸ​ວ່າ ສ ອາ​ເມ​ຣິ​ກາ ທີ່​ເປັນ​ປະເທດ​ແຖວ​ໜ້າ​ຂອງ​ໂລກ ໃນ​ການ​ໃຫ້​ຄວາມ​ຊ່ວຍເຫຼືອ​ມະນຸດສະທຳ ໄດ້​ຫຼຸດ​ການ​ໃຊ້​ຈ່າຍ​ລົງ 6% ໃນ​ການ​ຈ່າຍ​ໃຫ້​ແກ່​ການເຄື່ອນໄຫວ​ຊ່ວຍເຫຼືອ​ມະນຸດສະທຳ ຊຶ່ງ​ເປັນ​ຕົວ​ເລກ​ເທົ່າ​ກັບ 423 ລ້ານ​ໂດ​ລາ​ສະຫະລັດ ພາຍ​ໃນ​ປີ 2018 ໃນ​ຂະນະ​ທີ່​ການ​ໃຊ້​ຈ່າຍ​ຂອງ​ເຢຍ​ລະ​ມັນ ແລະ ອັງກິດ ໃຫ້​ແກ່​ການເຄື່ອນໄຫວ​ດັ່ງກ່າວ ກໍ​ຫຼຸດ​ລົງ 11% ໃນ​ປີ 2017. ການ​ຫຼຸດ​ລົງ​ດັ່ງກ່າວ ມີ​ຂຶ້ນ​ໂດຍ​ບໍ່​ເອົາ​ຫົວຊາ​ຕໍ່​ລະດັບ​ການ​ສະເໜີ​ຄວາມ​ຊ່ວຍເຫຼືອ​ທີ່​ລະດັບ 28,3 ຕື້​ໂດ​ລາ​ສະຫະລັດ ໂດຍ​ແມ່ນ ​ສປຊ ນຳ​ອອກ​ມາ ຊຶ່ງ​ຕາມ​ນັ້ນແລ້ວ​ຄາດ​ວ່າ​ມີ 200 ລ້ານ​ກວ່າ​ຄົນ ພວມ​ຕ້ອງການ​ຄວາມ​ຊ່ວຍເຫຼືອ​ມະນຸດສະທຳ ໃນ​ນັ້ນ ເຢ​ແມນ ແລະ ຊີ​ຣີ ມີ​ຄວາມ​ຕ້ອງການ​ຄວາມ​ຊ່ວຍເຫຼືອ​ມະນຸດສະທຳ​ຢູ່​ໃນ​ອັນ​ດັບ​ຕົ້ນໆ.

     ທ່ານ ແດນ ຄອບ​ພັດ ຜູ້ອຳນວຍການ​ຮັບຜິດຊອບ​ການ​ຄົ້ນຄວ້າ ແລະ ວິໄຈ​ຂອງ Development Initiatives ເວົ້າ​ວ່າ ຍອດ​ຈຳນວນ​ເງິນ​ຊ່ວຍເຫຼືອ​ມະນຸດສະທຳ ຂອງ​ລັດຖະບານ​ປະເທດ​ຕ່າງໆ ໄດ້​ເພີ່ມ​ຂຶ້ນ​ໜ້ອຍ​ໜຶ່ງ​ໃນ​ປີ 2018 ເມື່ອ ສະຫະລັດ ອາ​ຣັບ ເອ​ມີ​ເຣດ (UAE) ແລະ  ອາ​ຣາ​ບີ ຊາ​ອຸ​ດິດ ເພີ່ມ​ການ​ໃຊ້​ຈ່າຍ​ໃຫ້​ແກ່​ບັນດາ​ໂຄງການ​ຊ່ວຍເຫຼືອ​ມະນຸດສະທຳ ຕົ້ນຕໍ​ກໍ​ແມ່ນ​ໃຫ້​ແກ່​ການເຄື່ອນໄຫວ​ບູລະນະ​ສ້າງສາ​ຢູ່​ໃນ​ເຢ​ແມນ ທີ່​ພວມ​ຖືກ​ທຳລາຍ​ຢ່າງ​ໜັກໜ່ວງ​ຈາກ​ສົງຄາມ.

ຂ່າວທີ່ກ່ຽວຂ້ອງ