ຍີ່ປຸ່ນ ຂຶ້ນ​ພາສີ​ບໍລິໂພກ ຫຼັງ​ຈາກ​ທີ່​ໄດ້​ໂຈະ​ມາ​ສອງ​ເທື່ອ

698 02 ຕ.ລ. 2019 ຂ່າວຕ່າງປະເທດ
ຍີ່ປຸ່ນ ຂຶ້ນ​ພາສີ​ບໍລິໂພກ ຫຼັງ​ຈາກ​ທີ່​ໄດ້​ໂຈະ​ມາ​ສອງ​ເທື່ອ

   ພາສີ​ບໍລິໂພກ​ຢູ່​ໃນ​ຍີ່ປຸ່ນ ໄດ້​ເພີ່ມ​ຂຶ້ນ​ຈາກ​ລະດັບ 8% ໃນ​ເມື່ອ​ກ່ອນ ຂຶ້ນ​ເປັນ 10% ນັບ​ແຕ່​ວັນ​ທີ 1 ຕຸລາ​ນີ້​ເປັນຕົ້ນ​ໄປ ທ່າມກາງ​ທີ່​ລັດຖະບານ​ຍີ່ປຸ່ນ ພວມ​ກິ້ງເກືອກ​ລີເລືອ ເພື່ອ​ຈັດ​ສັນ​ຄ່າ​ໃຊ້​ຈ່າຍ​ໃຫ້​ແກ່​ຄວາມ​ສະຫງົບ​ໃນ​ການ​ດຳລົງ​ຊີວິດ​ໃນ​ສັງຄົມ ທີ່​ນັບ​ມື້​ນັບ​ຫຼາຍ​ຂຶ້ນ ຍ້ອນ​ວ່າ​ຈຳນວນ​ຜູ້​ເຖົ້າ​ເພີ່ມ​ຂຶ້ນ. ນີ້​ເປັນ​ເທື່ອ​ທຳ​ອິດ ທີ່​ຍີ່ປຸ່ນ​ຂຶ້ນ​ພາສີ​ບໍລິໂພກ ໃນ​ຮອບ 4 ປີ​ທີ່​ຜ່ານ​ມາ ຫຼັງ​ຈາກ​ທີ່​ໄດ້​ໂຈະ​ໄປ​ສອງ​ເທື່ອ.

    ການ​ຂຶ້ນ​ພາສີ​ດັ່ງກ່າວ​ເທື່ອ​ຫຼ້າ​ສຸດ​ກ່ອນ​ໜ້າ​ນີ້ ມີ​ຂຶ້ນ​ໃນ​ເດືອນ​ເມສາ ປີ 2014 ເມື່ອ​ພາສີ ບໍລິໂພກ​ໄດ້​ເພີ່ມ​ຂຶ້ນ​ຈາກ 5% ເປັນ 8% ດ້ວຍ​ເປົ້າ​ໝາຍ​ກໍ​ແມ່ນ​ເພື່ອ​ເພີ່ມ​ລາຍ​ຮັບ​ງົບປະມານ ເພື່ອ​ຫຼຸດຜ່ອນ​ໜີ້​ພາກ​ລັດ ທີ່​ພວມ​ຢູ່​ໃນ​ລະດັບ​ສູງ​ສຸດ ໃນ​ບັນດາ​ພື້ນຖານ​ເສດຖະກິດ​ພັດທະນາ. ໃນ​ເບື້ອງ​ຕົ້ນ ລັດຖະບານ​ຍີ່ປຸ່ນ​ຄາດ​ວ່າ​ຈະ​ສືບຕໍ່​ຂຶ້ນ​ພາສີ​ບໍລິໂພກ​ເປັນ 10% ໃນ​ເດືອນ​ຕຸລາ ປີ 2015. ເຖິງ​ຢ່າງໃດ​ກໍ​ຕາມ ຍີ່ປຸ່ນ​ໄດ້​ໂຈະ​ແຜນການ​ນັ້ນ​ເຖິງ​ສອງ​ເທື່ອ ໃນ​ເດືອນ​ຕຸລາ ປີ 2015 ແລະ ເດືອນ​ເມສາ ປີ 2017 ຍ້ອນ​ກັງວົນ​ວ່າ ການ​ຂຶ້ນ​ພາສີ ອາດ​ຈະ​ເຮັດ​ໃຫ້​ເປັນ​ຜົນ​ກະທົບ​ໃນ​ທາງ​ລົບ ຕໍ່​ການ​ໃຊ້​ຈ່າຍ​ໃຫ້​ແກ່​ການ​ບໍລິໂພກ ແລະ ທ່ວງ​ທ່າ​ການ​ຟື້ນ​ຕົວ​ພື້ນຖານ​ເສດຖະກິດ​ຍັງ​ອ່ອນ.

    ລັດຖະບານ​ຍີ່ປຸ່ນ ໃຫ້ການ​ຄາດ​ຄະເນ​ວ່າ ລາຍ​ຮັບ​ງົບປະມານ​ຈະ​ເພີ່ມ​ຂຶ້ນ​ຕື່ມ​ປະມານ 5.700 ຕື້​ເຢນ (ເທົ່າ​ກັບ 52,8 ຕື້​ໂດ​ລາ​ສະຫະລັດ) ຈາກ​ການ​ຂຶ້ນ​ພາສີ​ບໍລິໂພກ ແລະ ຄາດ​ວ່າ​ຈະ​ນຳ​ໃຊ້​ເກືອບ 50% ຂອງ​ເງິນ​ຈຳນວນ​ດັ່ງກ່າວ ເຂົ້າ​ໃນ​ການ​ແກ້​ໄຂ​ໂຄງການ ຄວາມ​ສະຫງົບ​ໃນ​ການ​ດຳລົງ​ຊີວິດ ໃນ​ສັງຄົມ ໂດຍ​ສຸມ​ໃສ່​ການ​ສຶກ​ສາ​ຊັ້ນ​ອະນຸບານ ເລີ່ມ​ແຕ່​ເດືອນ​ນີ້​ເປັນຕົ້ນ​ໄປ.

ຂ່າວທີ່ກ່ຽວຂ້ອງ