ກອງທັບ​ຣັດ​ເຊຍ ທົດ​ລອງ​ຍິງ​ລູກ​ສອນ​ໄຟ Onik-M

763 02 ຕ.ລ. 2019 ຂ່າວຕ່າງປະເທດ
ກອງທັບ​ຣັດ​ເຊຍ ທົດ​ລອງ​ຍິງ​ລູກ​ສອນ​ໄຟ Onik-M

    ເມື່ອ​ບໍ່​ດົນ​ມາ​ນີ້ ກອງທັບ​ຣັດ​ເຊຍ ໄດ້​ປະສົມ​ຄວາມ​ສຳເລັດ​ເປັນ​ເທື່ອ​ທຳ​ອິດ  ໃນ​ການ​ທົດ​ລອງ​ຍິງ​ລູກ​ສອນ​ໄຟ​ຕ້ານ​ກຳປັ່ນ ທີ່​ຫາ​ກໍ​ໄດ້​ຮັບ​ການ​ພັດທະນາ ໂດຍ​ອີງໃສ່​ກຸ່ມ​ລູກ​ສອນ​ໄຟ P-800 Onik ທີ່​ພັດທະນາ​ຢູ່​ໃນ​ຍຸກ ສ ໂຊ​ວຽດ.

    ລູກ​ສອນ​ໄຟ​ໃໝ່ ຖືກ​ຍິງ​ຂຶ້ນ​ຈາກ​ກຸ່ມ​ລູກ​ສອນ​ໄຟ​ປ້ອງ​ກັນ​ແຄມ​ຝັ່ງ Bastion K300P ຊຶ່ງ​ກໍ​ເປັນ​ເທື່ອ​ທຳ​ອິດ ທີ່​ໄດ້​ຜັນ​ຂະຫຍາຍ​ຢູ່​ໃນ ຈູ​ໂຄດ​ກາ ໃນ​ເຂດ​ຕາເວັນ​ອອກ​ໄກ​ຂອງ​ຣັດ​ເຊຍ ທີ່​ຕິດ​ກັບ​ລັດ ອາ​ລາ​​ສ​ກາ ຂອງ ສ ອາ​ເມ​ຣິ​ກາ.

    ລູກ​ສອນ​ໄຟ​ທີ່​ໄດ້​ຮັບ​ການ​ທົດ​ລອງ​ດັ່ງກ່າວ ເປັນ​ປະເພດ Onik-M ມີ​ຂະໜາດ​ຍິງ​ໄກ  800​ກມ ນັບ​ວ່າ​ເພີ່ມ​ຂຶ້ນ​ກວ່າ 300​ກມ ເມື່ອ​ທຽບໃສ່​ລູກ​ສອນ​ໄຟ P-800 Onik ໃນ​ເມື່ອ​ກ່ອນ (NATO ກຳນົດ​ຊື່ວ່າ SS-N-26 Strobile). ນອກຈາກ​ນັ້ນແລ້ວ ລູກ​ສອນ​ໄຟ Onik-M ທີ່​ໄດ້​ຮັບ​ການ​ດັດແກ້ ກໍ​ໄດ້​ຮັບ​ການ​ເພີ່ມ​ທະວີ​ລະດັບ​ຄວາມ​ຊັດ​ເຈນ ລະດັບ​ສູງ ຄວາມ​ສາມາດ ຕ້ານ​ກັບ​ການ​ລົບ​ກວນ​ຢ່າງ​ແຮງ ແລະ ຫົວ​ກະ​ສູນ​ທີ່​ມີ​ຫຼາຍ​ໜ້າທີ່.

    ສຳນັກ​ຂ່າວສານ TASS ຂອງ​ຣັດ​ເຊຍ ອ້າງ​ຕາມ​ແຫຼ່ງ​ຂ່າວ​ຈາກ​ກະຊວງ​ປ້ອງ​ກັນ​ປະເທດ ຣັດ​ເຊຍ ໃຫ້​ຮູ້​ວ່າ ກາ​ນົດ​ລອງ​ດັ່ງກ່າວ ມີ​ຂຶ້ນ​ເມື່ອ​ວັນ​ທີ 26 ກັນຍາ​ທີ່​ຜ່ານ​ມາ ໂດຍ​ມີ​ຂຶ້ນ ຢູ່​ເລິກ​ເຂົ້າ​ໄປ​ໃນ​ແຜ່ນດິນ​ໃຫຍ່ ໃນ​ເຂດ ຈູ​ໂຄດ​ກາ. ລູກ​ສອນ​ໄຟ​ໄໝ່​ທີ່​ຍິງ​ທົດ​ລອງ​ນັ້ນ ໄດ້​ຍິງ​ຖືກ​ເປົ້າ​ຈຳລອງ​ຢູ່​ເທິງ​ກຳປັ່ນ​ລອຍ​ເທິງ​ໜ້ານ້ຳ​ລຳ​ໜຶ່ງ ທີ່ຢູ່​ໃນ​ໄລຍະ​ໄກ 350​ກມ.

ຂ່າວທີ່ກ່ຽວຂ້ອງ