ມີ​ຜູ້​ເສຍ​ຊີວິດ 100 ຄົນ ຈາກ​ພາຍຸ​ຝົນ​ຢູ່​ໃນ​ອິນ​ເດຍ

849 02 ຕ.ລ. 2019 ຂ່າວຕ່າງປະເທດ
ມີ​ຜູ້​ເສຍ​ຊີວິດ 100 ຄົນ ຈາກ​ພາຍຸ​ຝົນ​ຢູ່​ໃນ​ອິນ​ເດຍ

   ເຈົ້າ​ໜ້າທີ່​ອິນ​ເດຍ ແຈ້ງ​ໃຫ້​ຮູ້ເມື່ອ​ວັນ​ທີ 30 ກັນຍາ​ທີ່​ຜ່ານ​ມາ ວ່າ​ພາຍຸ​ຝົນ​ເກີດ​ຂຶ້ນ​ຜິດ​ປົກກະຕິ ພາຍ​ໃນ​ເວລາ 3 ວັນ ເມື່ອ​ທ້າຍ​ອາທິດ​ທີ່​ຜ່ານ​ມາ ຢູ່​ໃນ​ເຂດ​ພາກ​ເໜືອ​ອິນ​ເດຍ ໄດ້​ເຮັດ​ໃຫ້​ເກີດ ນ້ຳນອງ ແລະ ນ້ຳ​ຖ້ວມ​ຂັງ​ເປັນ​ບໍລິເວນ​ກວ້າງ ສົ່ງ​ຜົນ​ໃຫ້​ມີ​ຜູ້​ເສຍ​ຊີວິດ​ຢ່າງ​ໜ້ອຍ 100 ຄົນ. ໃນ​ນັ້ນ ຢູ່​ໃນ​ລັດ​ພິຫານ ມີ​ຜູ້​ເສຍ​ຊີວິດ 27 ຄົນ ໃນ​ຂະນະ​ທີ່ຢູ່​ໃນ​ລັດ ອຸດ​ຕາ ປຣາ​ເດ​​ສ ມີ​ຜູ້​ເສຍ​ຊິວິດ​ຫຼາຍ​ເຖິງ 63 ຄົນ ແລະ ສ່ວນ​ທີ່​ຍັງ​ເຫຼືອ​ແມ່ນ​ຢູ່​ໃນ​ທ້ອງຖິ່ນ​ອື່ນໆ.

    ຕາມ​ປົກກະຕິ​ແລ້ວ ລະດູຝົນ​ໃນ​ອິນ​ເດຍ ແກ່ຍາວ​ແຕ່​ເດືອນ​ມິຖຸນາ ຫາ​ທ້າຍ​ເດືອນ​ກັນຍາ. ສະພາບ​ຝົນຕົກ​ໜັກ​ທີ່​ເກີດ​ຂຶ້ນ​ໃນ​ທ້າຍ​ລະດູຝົນ ດັ່ງ​ທີ່​ເກີດ​ຂຶ້ນ​ຄື​ດັ່ງກ່າວ ຖື​ວ່າ​ເປັນ​ເລື່ອງ​ຜິດ​ປົກກະຕິ. ອົງການ​ອຸຕຸນິຍົມ​ຂອງ​ອິນ​ເດຍ ໃຫ້ການ​ພະຍາກອນ​ວ່າ ຝົນ​ຍັງ​ຈະ​ຕົກ​ແກ່ຍາວ​ຢູ່​ໃນ 15 ລັດ ແລະ ລະດູຝົນ​ປີ 2019 ຈະ​ເປັນ​ລະດູຝົນ​ທີ່​ມີ​ຝົນຕົກ​ຫຼາຍ​ທີ່​ສຸດ ນັບ​ແຕ່​ປີ 1917 ເປັນຕົ້ນ​ມາ.

    ຢູ່​ໃນ​ທົ່ວ​ເຂດ​ອາຊີ​ໃຕ້ ໃນ​ເດືອນ​ກໍລະກົດ​ທີ່​ຜ່ານ​ມາ ພາຍຸ​ຝົນ​ໄດ້​ເຮັດ​ໃຫ້​ມີ​ຜູ້​ເສຍ​ຊີວິດ ປະມານ 650 ຄົນ ຢູ່​ໃນ​ອິນ​ເດຍ ບັງ​ກລາ​ເດ​​ສ ແລະ  ປາ​ກິດ​ສະຖານ.

ຂ່າວທີ່ກ່ຽວຂ້ອງ