ຂ່າວຫຼ້າສຸດ

ຈັດ​ງານ​ສະເຫຼີມ​ສະ​ຫຼອງ​ວັນ​ສະ​ຖາ​ປະ​ນາ ສ​ປ ຈີນ​ຄົບ​ຮອບ 70 ປີ​​

961 02 ຕ.ລ. 2019 ຂ່າວຕ່າງປະເທດ
ຈັດ​ງານ​ສະເຫຼີມ​ສະ​ຫຼອງ​ວັນ​ສະ​ຖາ​ປະ​ນາ ສ​ປ ຈີນ​ຄົບ​ຮອບ 70 ປີ​​

    ແຫຼ່ງ​ຂ່າວ​ຂອງ​ຈີນ​ລາຍ​ງານ​ວ່າ ຕອນ​ຄ່ຳ​ວັນ​ທີ 30 ກັນຍາ​ທີ່​ຜ່ານ​ມາ ງານ​ລ້ຽງ​ສະເຫຼີມສະຫຼອງ​ວັນ​ສະຖາປະນາ ​ສປ ຈີນ​ຄົບຮອບ 70 (1/10/1949 - 1/10/2019) ໄດ້​ຈັດ​ຂຶ້ນ​ຢ່າງ​ຄຶກຄື້ນ​ຢູ່​ຫໍ​ສະພາ​ປະຊາຊົນ​ແຫ່ງ​ຊາດ​ຈີນ ໃນ​ນະຄອນຫຼວງ​ປັກ​ກິ່ງ. ທ່ານ​ສີ​ຈິ້ນ​ຜິງ ເລຂາທິການ​ໃຫຍ່​ສູນ​ກາງ​ພັກ​ກອມ​​ູນິດ​ຈີນ ປະທານ​ປະເທດ​ຈີນ ປະທານ​ຄະນະ​ກຳມະການ​ການ​ທະຫານ​ສູນ​ກາງ​ຈີນ ໄດ້​ເຂົ້າ​ຮ່ວມ​ງານ​ສະເຫຼີມສະຫຼອງ​ດັ່ງກ່າວ ແລະ ກ່າວ​ປາ​ໄສ​ສຳຄັນ ແລະ ມີ​ບຸກຄົນ​ຂອງ​ຈີນ ແລະ ຕ່າງປະເທດ 4000 ກວ່າ​ທ່ານ ໄດ້​ເຕົ້າໂຮມ​ຮ່ວມ​ກັນ​ສະເຫຼີມສະຫຼອງ​ວັນ​ສະຖາປະນາ ​ສປ ຈີນ ຄົບຮອບ 70 ປີ.

   ວັນ​ທີ 1 ຕຸລາ​ນີ້ ພິທີ​ສະເຫຼີມສະຫຼອງ​ວັນ​ສະຖາປະນາ ​ສປ ຈີນ​ຄົບຮອບ 70 ປີ ໄດ້​ຈັດ​ຂຶ້ນ​ຢູ່​ສະໜາມ​ຫຼວງ​ທຽນ​ອານ​ເໝີ້ນ ໃນ​ນະຄອນຫຼວງ​ປັກ​ກິ່ງ. ທ່ານ​ສີ​ຈິ້ນ​ຜິງ ເລຂາທິການ​ໃຫຍ່​ສູນ​ກາງ​ພັກ​ກອມ​ມູ​ນິດ​ຈີນ ປະທານ​ປະເທດ​ຈີນ ປະທານ​ຄະນະ​ກຳມະການ​ການ​ທະຫານ​ສູນ​ກາງ​ຈີນ ໄດ້​ກ່າວ​ປາ​ໄສ​ສຳຄັນ. ຫຼັງ​ຈາກ​ນັ້ນ​ແມ່ນ​ພິທີ​ສວນສະໜາມ​ທີ່​ຍິ່ງ​ໃຫຍ່​ມະໂຫລານ ຊຶ່ງ​ເປັນ​ຄັ້ງ​ທຳ​ອິດ​ທີ່​ກອງທັບ​ຈີນ​ເຂົ້າ​ຮ່ວມ​ການ​ສວນສະໜາມ​ຫຼັງ​ການ​ປະຕິ​ຮູບ ໂດຍ​ມີ​ນາຍ​ແລະ ພົນທະຫານ 15.000 ຄົນ ເຂົ້າ​ຮ່ວມ ທີ່​ເປັນ​ການ​ສວນສະໜາມ​ທີ່​ມີ​ຂະໜາດ​ໃຫຍ່​ທີ່​ສຸດ​ໃນ​ຊຸມ​ປີ​ມໍ່ໆມານີ້. ຫຼັງ​ການ​ສວນສະໜາມ​ແລ້ວ ກໍ​ແມ່ນ​ການ​ແຫ່​ຂະ​ບວນ ທີ່​ມີ​ປະຊາຊົນ​ເຂົ້າ​ຮ່ວມ​ປະມານ 1 ແສນ​ຄົນ.

    ໃນ​ຂະນະ​ດຽວ​ກັນ ວັນ​ທີ 30 ກັນຍາ ຊຶ່ງ​ເປັນ​ວັນ​ລະນຶກ​ເຖິງ​ວິລະ​ຊົນ​ຜູ້​ເສຍ​ສະລະ​ຊີວິດ ເພື່ອ​ການ​ປະຕິວັດ​ຕາມ​ກົດໝາຍ​ຂອງ​ຈີນ ແລະ ໃນ​ຕອນ​ເຊົ້າ​ວັນ​ດຽວ​ກັນ ພິທີ​ວາງ​ພວງມາລາ​ເພື່ອ​ລະນຶກ​ເຖິງ​ວິລະ​ຊົນ​ຜູ້​ເສຍ​ສະລະ​ຊີວິດ​ເພື່ອ​ການ​ປະຕິວັດ ໄດ້​ຈັດ​ຂຶ້ນ​ຢູ່​ທີ່​ສະໜາມ​ຫຼວງ​ທຽນ​ອານ​ເມີນ ໃນ​ນະຄອນຫຼວງ​ປັກ​ກິ່ງ ໂດຍ​ມີ ທ່ານ​ສີ​ຈິ້ນ​ຜິງ ພ້ອມ​ກັບ​ຜູ້ນຳ​ພັກ-ລັດ​ຈີນ​ທ່ານ​ອື່ນໆ ແລະ ຜູ້ຕາງໜ້າ​ປະຊາຊົນ​ໃນ​ວົງ​ການ​ຕ່າງໆ​ຂອງ​ນະຄອນຫຼວງ​ປັກ​ກິງ ຈຳນວນ 4.000 ກວ່າ​ທ່ານ​ໄດ້​ເຂົ້າ​ຮ່ວມ​ພິທີ​ດັ່ງກ່າວ ເພື່ອ​ໄວ້ອາໄລ​ເຖິງ​ດວງ​ວິນ​ຍານ ຂອງ​ວິລະ​ຊົນ​ຜູ້​ເສຍ​ສະລະ​ຊີວິດ​ເພື່ອ​ການ​ປະຕິວັດ ແລະ ສະແດງ​ຄວາມ​ເຄົາລົບ​ນັບຖື ແລະ ປະເທດ​ຊາດ​ຈາລຶກ​ບຸນຄຸນ​ຕໍ່​ວິລະ​ຊົນ​ທັງຫຼາຍ.

    ອີງ​ຕາມ​ສະຖິຕິ​ທີ່​ຍັງ​ບໍ່​ຄົບ​ຖ້ວນ ມີ​ວິລະ​ຊົນ​ປະມານ  20 ລ້ານ​ຄົນ ໄດ້​ເສຍ​ສະລະ​ຊີວິດ​ເພື່ອ​ຄວາມ​ເປັນ​ເອກະລາດ​ແຫ່ງ​ຊາດ ເພື່ອ​ປົດ​ປ່ອຍ​ປະຊາຊົນ ເພື່ອ​ຄວາມ​ຮັ່ງມີ​ເຂັ້ມແຂງ​ຂອງ​ປະເທດ​ຊາດ ແລະ ຄວາມ​ຢູ່​ເຢັນ​ເປັນ​ສຸກ​ຂອງ​ປະຊາຊົນ​ຈີນ. ສະນັ້ນ ເມື່ອ​ເດືອນ​ສິງຫາ​ປີ 2014 ຈີນ​ຈຶ່ງ​ໄດ້​ກຳນົດ​ໃຫ້​ວັນ​ທີ 30 ກັນຍາ​ຂອງ​ທຸກໆ​ປີ ເປັນ​ວັນ​ລະນຶກ​ເຖິງ​ວິລະ​ຊົນ​ຜູ້​ເສຍ​ສະລະ​ຊີວິດ​ເພື່ອ​ການ​ປະຕິວັດ ຕາມ​ກົດໝາຍ.

ກ່ອນ​ພິທີ​ວາງ​ພວງມາລາ​ດັ່ງກ່າວ​ປີ​ນີ້ ທ່ານ​ສີ​ຈິ້ນ​ຜິງ ພ້ອມ​ດ້ວຍ​ການ​ນຳ​ພັກ-ລັດ​ຂອງ​ຈີນ​ທ່ານ​ອື່ນໆ ໄດ້​ເດີນທາງ​ໄປ​ຫໍ​ລະນຶກ​ຂອງ​ທ່ານ​ປະທານ​ເໝົາ​ເຈີ​ຕົງ ເພື່ອ​ສະແດງ​ຄວາມ​ເຄົາລົບ​ຕໍ່​ສະຫາຍ               ເໝົາ​ເຈີ​ຕົງ ທີ່​ເປັນ​ຜູ້​ໃຫ້​ກຳເນີດ​ກອງທັບ​ປົດ​ປ່ອຍ​ປະຊາຊົນ​ຈີນ ແລະ ສາທາລະນະ​ລັດ​ປະຊາຊົນ​ຈີນ ແລະ ໄວ້ອາໄລ​ເຖິງ​ດວງ​ວິນ​ຍານ​ຂອງ​ສະຫາຍ​ເໝົາ​ເຈີ​ຕົງ ແລະ ນັກ​ປະຕິວັດ​ອາ​ວູ​ໂສ​ທ່ານ​ອື່ນໆ.

ຂ່າວທີ່ກ່ຽວຂ້ອງ