ເງິນ​ເຟີ້​ຢູ່​ໃນ Eurozone ​ໄດ້​ຕົກລົງ​ສູ່​ລະດັບ​ຕ່ຳ​ກວ່າ 1%

541 04 ຕ.ລ. 2019 ຂ່າວຕ່າງປະເທດ
ເງິນ​ເຟີ້​ຢູ່​ໃນ Eurozone ​ໄດ້​ຕົກລົງ​ສູ່​ລະດັບ​ຕ່ຳ​ກວ່າ 1%

    ພຽງ​ບໍ່ພໍ​ເທົ່າ​ໃດ​ອາທິດ ຫຼັງ​ຈາກ​ທີ່​ທະນາຄານ​ກາງ​ເອີຣົບ (ECB) ປະກາດ​ມາດ​ຕະການ​ໂຍະຍານ​ດ້ານ​ເງິນຕາ ​ເພື່ອ​ຊ່ວຍ​ເຫຼືອ​ພື້ນຖານ​ເສດຖະກິດ​ແລ້ວ ຕົວ​ເລກ​ທີ່​ນຳ​ອອກ​ມາ​ເປີດ​ເຜີຍ​ໂດຍ​ອົງການ​ສະຖິຕິ​ເອີຣົບ (Eurostat) ​ເມື່ອ​ວັນ​ທີ 1 ຕຸລາ​ນີ້ ຊີ້​ໃຫ້​ເຫັນ​ວ່າ ອັດຕາ​ສ່ວນ​ເງິນ​ເຟີ້ ຢູ່​ໃນ​ເຂດ​ໃຊ້​ເງິນ​ເອີ​ໂຣ (Eurozone) ​ໄດ້​ຕົກລົງ​ສູ່​ລະດັບ​ຕ່ຳ​ກວ່າ 1% ພາຍ​ໃນ​ເດືອນ​ກັນຍາ​ທີ່​ຜ່ານ​ມາ.

    Eurostat ​ໃຫ້​ຮູ້​ວ່າ ລາຄາ​ບໍລິ​ໂພ​ກຢູ່​ໃນ Eurozone ​ໃນ​ເດືອນ​ກັນຍາ​ປີ​ນີ້ ​ເພີ່ມ​ຂຶ້ນ​ພຽງ 0,9% ​ເມື່ອ​ທຽບ​ໃສ່ 1% ​ໃນ​ເດືອນ​ສິງຫາ. ນີ້​ເປັນ​ລະດັບ​ເພີ່ມ​ຂຶ້ນ​ທີ່​ຕ່່ຳສຸດ ນັບ​ແຕ່​ເດືອນ​ພະຈິກ ປີ 2016 ​ເປັນ​ຕົ້ນ​ມາ ​ແລະ ​ຫ່າງ​ໄກ​ຈາກ​ຄາດໝາຍລຸ່ມ 2% ທີ່ ECB ວາງ​ອອກ​ມາ. ​ໃນ​ຂະນະ​ດຽວ​ກັນ ​ເງິນ​ເຟີ້​ທີ່​ເປັນ​ແກນ​ກາງ (ບໍ່​ຄິດ​ໄລ່​ບັນດາ​ສິນຄ້າ​ທີ່​ຜັນ​ຜວນ​ໄດ້​ງ່າຍ ​ເຊັ່ນ​ພະລັງງານ ​ແລະ ​ອາຫານ) ​ແມ່ນ​ຢູ່​ທີ່ 1%. 

    ເງິນ​​ເຟີ້​ຂອງ Eurozone ຫຼຸດ​ລົງ​ທ່າມກາງ​ທີ່​ສົງຄາມ​ການ​ຄ້າ​ລະຫວ່າງ ສ ອາ​ເມ​ຣິກາ ກັບ​ຈີນ ພວມ​ເປັນ​ຜົນ​ກະທົບ​ຫຼາຍ​ພໍ​ສົມຄວນ ຕໍ່​ພື້ນຖານ​ເສດຖະກິດ​ທົ່ວ​ໂລກ ​ໂດຍ​ສະ​ເພາະ​ກໍ​ແມ່ນ​ບັນດາ​ປະ​ເທດ​ມະຫາ​ອຳນາດ​ດ້ານ​ກາ​ນສົ່ງອອກ​ສິນຄ້າດັ່ງ​ເຢຍລະ​ມັນ ຊຶ່ງ​ເປັນ​ບ່ອນ​ປະດິດ​ສ້າງ​ທີ່​ສຳຄັນ​ ພວມ​ຕ່າວ​ຫົວ​ລົງ.

    ກ່ອນ​ໜ້ານັ້ນ ​ໃນ​ການ​ປະຊຸມ​ເມື່ອ​ເດືອນ​ກັນຍາ​ທີ່​ຜ່ານ​ມາ ສະພາ​ຜູ້​ວ່າການ​ຂອງ ECB ​ໄດ້​ເຫັນ​ດີ​ກັບ​ບ້ວງ​ມາດ​ຕະການ​ໂຍະຍານ​ດ້ານ​ເງິນຕາ ​ເພື່ອ​ຊ່ວຍ​ເຫຼືອ​ພື້ນຖານ​ເສດຖະກິດ  Eurozone ​ໃຫ້​ຜ່ານ​ຜ່າ​ການ​ກະທົບ​ຈາກ​ພາຍ​ນອກ. ​ໃນ​ນັ້ນ ECB ​ໄດ້​ຕົກລົງ​ຫຼຸດ​ອັດຕາ​ດອກ​ເບ້ຍ​ເງິນ​ຝາກ ຈາກ -0,4% ລົງ​ສູ່​ລະດັບ​ຕ່ຳ​ເປັນ​ປະຫວັດ​ການ​ທີ່ -0,5% ພ້ອມ​ກັນ​ນັ້ນ​ກໍ​ກັບ​ສູ່​ການ​ເຄື່ອນ​ໄຫວ​ຂອງ​ໂຄງການ​ຈັດ​ຊື້​ພັນທະບັດ ​ໃນ​ຂອບ​ຂະໜາດ 20 ຕື້​ເອີ​ໂຣ/​ເດືອນ ນັບ​ແຕ່​ເດືອນ​ພະຈິກ ປີ 2019 ​ເປັນ​ຕົ້ນ​ໄປ ​ເພື່ອ​ຊ່ວຍ​ເຫຼືອ​ຄວາມ​ເຕີບ​ໂຕ​ເສດຖະກິດ​ຂອງ Eurozone ​ແລະ ​ສະກັດ​ກັ້ນ​ການ​ຄາດ​ຄະ​ເນ​ ທີ່​ເຕັມ​ໄປ​ດ້ວຍຄວາມ​ກັງວົນກ່ຽວ​ກັບ​ເງິນ​ເຟີ້.

ຂ່າວທີ່ກ່ຽວຂ້ອງ