ຂ່າວຫຼ້າສຸດ

ໄວປາກເສຍສິນ ໄວຕີນຕົກກົກໄມ້

1.591 04 ຕ.ລ. 2019 ນານາສາລະ

    ຄົນ​ບູ­ຮານ​ຈະ​ມີ​ຄຳ​ສອນ​ໄວ້​ໃຫ້​ພວກ​ເຮົາ​ໄດ້​ຄິດ ພິ­ຈາ­ລະ­ນາ​ເລື່ອງ​ການ​ໃຊ້​ຄຳ​ເວົ້າ​ໃຫ້​ຮອບ​ຄອບ ເພາະ​ຖ້າ​ເວົ້າ​ອອກ​ໄປ​ແລ້ວ ເຮົາ​ບໍ່​ສາ­ມາດ​ເອົາ​ຄືນ​ໄດ້ ຂະ­ນະ​ດຽວ​ກັນ​ຍັງ​ມີ​ຄຳ​ສອນ​ໄວ້​ອີ​ກວ່າ ປາກ​ເປັນ​ເອກ ເລກ​ເປັນ​ໂທ ເຊິ່ງ​ຄຳ​ເວົ້າ​ທີ່​ອອກ​ຈາກ​ປາກ​ຈະ​ຖືກ​ໃຈ​ຄົນ​ຟັງ ຫຼື ເວົ້າ​ໃຫ້​ເກີດ​ປະ­ໂຫຍດ​ແກ່​ຊາດ​ບ້ານ​ເມືອງ​ນັ້ນ ຍິ່ງ​ຕ້ອງ​ໄດ້​ຄິດ​ໄຕ່­ຕອງ ບໍ່​ແມ່ນ​ເວົ້າ​ຕາມ​ອາ­ລົມ ຫຼື ເວົ້າ​ຕາມ­ໃຈ ເພາະ​ບ້ານ​ເມືອງ​ໃດ​ກໍ​ຍ່ອມ​ມີ​ລະ­ບຽບ​ກົດ­ໝາຍ ແລະ ກະ­ຕິ​ກາ...

    ອີງ​ຕາມ​ການ​ຟັງ​ຂ່າວ​ໂທລະ­ພາບ​ຊ່ອງ ປກສ ຜ່ານ​ມາ ໄດ້​ລາຍ​ງານ​ຂ່າວ​ເລື່ອງ​ນາງ ໝວຍ ທີ່​ຖືກ​ເຈົ້າ​ໜ້າ­ທີ່​ກັກ​ຕົວ ເພາະ​ມີ​ຂໍ້​ຫາ​ໂຄ­ສະ­ນາ​ຕ້ານ​ນະ­ໂຍ­ບາຍ​ຂອງ​ລັດ ເຊິ່ງ​ກ່ຽວ­ຂ້ອງ​ເລື່ອງ​ການ​ຊ່ວຍ​ໄພ​ນ້ຳ​ຖ້ວມ​ໄລ­ຍະ​ຮຸນ​ແຮງ​ຫຼາຍ​ອາ­ທິດ​ຜ່ານ​ມາ ນາງ ໝວຍ ເຄີຍ​ລົງ​ໂຄ­ສະ­ນາ​ຜິດ​ແນວ­ທາງ ເມື່ອ​ຄັ້ງ​ກ່ອນ​ປີ 2018 ເຈົ້າ​ໜ້າ­ທີ່​ກໍ​ເຄີຍ​ກ່າວ​ຕັກ­ເຕືອນ​ຜູ້­ກ່ຽວ ເຊິ່ງ​ຢ່າ​ລືມ​ວ່າ ຜູ້​ໃດ​ກໍ​ຕາມ​ຫາກ​ຖືກ​ເຈົ້າ​ໜ້າ­ທີ່​ລັດ​ເຄີຍ​ຕັກ­ເຕືອນ​ແລ້ວ​ນັ້ນ ເຮົາ​ກໍ​ຄວນ​ປັບ­ປຸງ​ຕົນ​ເອງ ຫັກ​ຫ້າມ​ໃຈ​ຕົນ​ເອງ​ວ່າ​ອັນ​ໃດ​ຄວນ​ເວົ້າ ຫຼື ບໍ່​ຄວນ​ເວົ້າ !.

    ເຫດ­ການ​ຕົວ­ຢ່າງ​ທີ່​ເກີດ​ຂຶ້ນ​ເຖິງ​ແມ່ນ​ວ່າ ສັງ­ຄົມ​ໄດ້​ໃຫ້​ຄວາມ​ສົນ­ໃຈ​ສູງ ແຕ່​ຊັ່ງ­ຊາ​ເບິ່ງ​ຫາງ​ສຽງ​ກໍ​ປາ­ກົດ​ວ່າ ບໍ່​ຄ່ອຍ​ມີ​ໃຜ​ເຫັນ​ດີ​ນຳ​ຜູ້­ກ່ຽວ ເພາະ​ຕົກ​ຢູ່​ໃນ​ກົດ­ໝາຍ​ອາ­ຍາ ມາດ­ຕາ 117 ບົດ­ຮຽນ​ດັ່ງ­ກ່າວ​ນີ້ ມັນ​ໄດ້​ສະ­ທ້ອນ​ສອນ​ໃຫ້​ສັງ­ຄົມ ຕ້ອງ​ໄດ້​ສຶກ​ສາ ຮຽນ​ຮູ້​ລະ­ບຽບ​ກົດ­ໝາຍ​ຂອງ​ບ້ານ​ເມືອງ ພ້ອມ​ນີ້​ກໍ​ຍັງ​ເປັນ​ແວ່ນ​ແຍງ​ໃຫ້​ແກ່​ຜູ້​ທີ່​ຫຼິ້ນ​ເຟດ​ບຸກ ຫຼື ເຈົ້າ​ຂອງ page ຕ່າງໆ​ທີ່​ຢາກ​ດັງ ຢາກ​ມີ​ຊື່​ສຽງ ແຕ່​ບໍ່​ເຄີຍ​ສຶກ​ສາ​ກົດ­ໝາຍ ແລະ ນະ­ໂຍ­ບາຍ​ຂອງ​ພັກ-ລັດ ໃຫ້​ເຂົ້າ­ໃຈ​ຢ່າງ​ຈະ­ແຈ້ງ.

    ພວກ​ເຮົາ​ບໍ່​ຄວນ​ລືມ​ວ່າ ໄພ​ນ້ຳ​ຖ້ວມ​ທີ່​ເກີດ​ຂຶ້ນ ບັນ­ດາ​ເຈົ້າ​ໜ້າ­ທີ່​ທະ­ຫານ ກໍ​ແມ່ນ​ໄດ້​ສຸມ​ໃສ່​ຊ່ວຍ­ເຫຼືອ​ປະ­ຊາ­ຊົນ​ໃຫ້​ພົ້ນ​ອອກ​ຈາກ​ໄພ­ພິ­ບັດ ເຊິ່ງ​ບ່ອນ​ໃດ​ກູ້​ໄພ ຫຼື ການ​ຊ່ວຍ­ເຫຼືອ​ຂອງ​ສັງ­ຄົມ​ເຂົ້າ​ບໍ່​ເຖິງ ກໍ​ແມ່ນ​ອ້າຍ​ນ້ອງ​ທະ­ຫານ​ໄດ້​ເຂົ້າ​ໄປ​ຊ່ວຍ­ເຫຼືອ​ແນ່­ນອນ ການ​ລາຍ​ງານ​ຂ່າວ​ອາດ​ບໍ່​ວ່ອງ­ໄວ​ທັນ­ໃຈ ແຕ່​ທຸກ​ການ­ຈັດ­ຕັ້ງ​ກໍ​ໄດ້​ເອົາ­ໃຈ­ໃສ່​ຊ່ວຍ­ເຫຼືອ​ຈົນ​ສຸດ​ຄວາມ​ສາ­ມາດ.

    ສະ­ຫຼຸບ​ວ່າ: ການ​ຈະ​ເວົ້າ​ວ່າ​ສິ່ງ​ໃດ​ອອກ​ມາ​ທາງ​ສື່​ອອນ​ລາຍ​ນັ້ນ ແຕ່­ລະ­ຄົນ​ຄວນ​ລະ­ວັງ​ຄິດ​ໃຫ້​ຮອບ​ຄອບ ໄຈ້​ແຍ​ກວ່າ​ມັນ​ເປັນ​ບັນ­ຫາ​ແບບ​ໃດ ເພາະ​ທຸກ​ສັງ­ຄົມ​ຢູ່​ຮ່ວມ​ກັນ​ກໍ​ຕ້ອງ​ໄດ້​ເຄົາ­ລົບ​ກົດ­ໝາຍ.

ຂ່າວທີ່ກ່ຽວຂ້ອງ