ຂ່າວຫຼ້າສຸດ

ລັດ​ຖະ​ບານ​ຈີນ​ສະ​ໜັບ​ສະ​ໜູນ​ອົງ​ການ​ປົກ​ຄອງ​ເຂດ​ບໍ​ລິ​ຫານ​ພິ​ເສດ​ຮົງ​ກົງ​

295 08 ຕ.ລ. 2019 ຂ່າວຕ່າງປະເທດ
ລັດ​ຖະ​ບານ​ຈີນ​ສະ​ໜັບ​ສະ​ໜູນ​ອົງ​ການ​ປົກ​ຄອງ​ເຂດ​ບໍ​ລິ​ຫານ​ພິ​ເສດ​ຮົງ​ກົງ​

    ວັນ​ທີ 4 ຕຸລາ​ນີ້ ທ່ານ​ຢາງ​ກວ່າງ ໂຄສົກ​ຫ້ອງການ​ວຽກ​ງານ​ຮົງ​ກົງ ແລະ ມາ​ກາວ​ຂອງ​ລັດຖະບານ​ຈີນ ໄດ້​ປະກອບ​ຄຳ​ເຫັນ​ກ່ຽວ​ກັບ​ອົງການ​ປົກຄອງ​ເຂດ​ບໍລິຫານ​ພິເສດ​ຮົງ​ກົງ (ຈີນ) ໃນ​ການ​ປະກາດ​ວາງ “ກົດໝາຍ​ຫ້າມ​ໃສ່​ໜ້າ​ກາກ” ໂດຍ​ທ່ານ​ກ່າວ​ວ່າ ການ​ວາງ​ກົດໝາຍ​ສະບັບ​ນີ້​ມີ​ຄວາມ​ຈຳເປັນ​ທີ່​ສຸດ ມີ​ຜົນ​ດີ​ຕໍ່​ການ​ໂຈມ​ຕີ ແລະ ສະກັດ​ກັ້ນ​ອາດຊະຍາ​ກຳ​ໃຊ້​ຄວາມ​ຮຸນ​ແຮງ ແລະ ຟື້້ນ​ຟູ​ຄວາມ​ເປັນ​ລະບຽບ​ຮຽບ​ຮ້ອຍ​ຂອງ​ສັງຄົມ.

    ທ່ານ​ຢາງ​ກວ່າງ ກ່າວ​ວ່າ ການເຄື່ອນໄຫວ​ໃຊ້​ຄວາມ​ຮຸນ​ແຮງ​ໃນ​ຮົງ​ກົງ ໄດ້​ຕໍ່​ເນື່ອງ​ມາ​ເປັນ​ເວລາ 4 ເດືອນ​ປາຍ​ແລ້ວ ແລະ ລະດັບ​ຄວາມ​ຮຸນ​ແຮງ​ໄດ້​ສູງ​ຂຶ້ນ​ເລື້ອຍໆ. ວັນ​ທີ 1 ຕຸລາ​ທີ່​ຜ່ານ​ມາ ເປັນ​ວັນ​ທີ່​ປະຊາຊົນ​ທົ່ວ​ປະເທດ​ຈີນ ສະເຫຼີມສະຫຼອງ​ວັນ​ສະຖາປະນາ ສ ປ ຈີນ​ຄົບຮອບ 70 ປີ​ຢ່າງ​ມ່ວນຊື່ນ ແຕ່​ຝ່າຍ​ຕໍ່ຕ້ານ ແລະ ພວກ​ຫົວ​ຮຸນ​ແຮງ​ຈຳນວນ​ໜຶ່ງ​ໃນ​ຮົງ​ກົງ ພັດ​ເລືອກ​ເອົາ​ມື້​ດັ່ງກ່າວ​ເພື່ອ​ດຳເນີນ​ການ​ແຫ່​ຂະ​ບວນ​ຢ່າງ​ຜິດ​ກົດໝາຍ ແລະ ຕັ້ງໃຈ​ກໍ່​ເຫດການ​ຮຸນ​ແຮງ. ເຂົາເຈົ້າ​ຈູດ​ໄຟ​ຢູ່​ຫຼາຍ​ບ່ອນ ໂຈມ​ຕີ​ອົງການ​ປົກຄອງ ທຳລາຍ​ສິ່ງ​ກໍ່ສ້າງ​ສາທາລະນະ ທຸບ​ຕີ​ຊາວ​ເມືອງ​ຜູ້​ບໍ່​ມີ​ໂທດ​ຫຍັງ. ດັ່ງນັ້ນ ພວກ​ເຮົາ​ກ່າວ​ປະນາມ​ຢ່າງ​ຮຸນ​ແຮງ​ຕໍ່​ການ​ກະທຳ​ທີ່​ໂຫດຮ້າຍ​ປ່າ​ເຖື່ອນ​ແບບ​ນີ້.

    ໃນ​ກໍລະນີ​ດັ່ງກ່າວ ອົງການ​ປົກຄອງ​ເຂດ​ບໍລິຫານ​ພິເສດ​ຮົງ​ກົງ ໄດ້​ວາງ “ກົດໝາຍ​ຫ້າມ​ໃສ່​ໜ້າ​ກາກ” ແມ່ນ​ຊອບ​ດ້ວຍ​ກົດໝາຍ ສົມ​ເຫດ​ສົມ​ຜົນ ແລະ ຖືກຕ້ອງ​ຕາມ​ສະພາບ​ຕົວ​ຈິງ ທັງ​ມີ​ຄວາມ​ຈຳເປັນ​ທີ່​ສຸດ. ຢູ່​ຫຼາຍ​ປະເທດ ແລະ ເຂດ​ແຄວ້ນ​ໃນ​ໂລກ ລ້ວນ​ແຕ່​ໄດ້​ວາງ​ກົດໝາຍ​ວ່າ​ດ້ວຍ​ການ​ຫ້າມ​ບໍ່​ໃຫ້​ບັງ​ໜ້າ​ເຊັ່ນ​ກັນ ການ​ປະຕິບັດ​ກົດໝາຍ​ດັ່ງກ່າວ​ຢູ່​ຮົງ​ກົງ ຈະ​ບໍ່​ກະທົບ​ຕໍ່​ປະຊາຊົນ​ຮົງ​ກົງ​ໃນ​ການ​ຊົມໃຊ້​ສິດ ແລະ ເສລີພາບ​ຕ່າງໆ ຊຶ່ງ​ລວມ​ທັງ​ການ​ແຫ່​ຂະ​ບວນ ແລະ ຊຸມນຸມ​ຕາມ​ກົດໝາຍ.

     ທ່ານ​ຢາງ​ກວ່າງ ຍັງ​ກ່າວ​ຕື່ມ​ວ່າ ລັດຖະບານ​ສູນ​ກາງຂອງ​ຈີນ ຈະ​ສືບຕໍ່​ປະຕິບັດ​ຕາມ​ທິດ​ທາງ​ນະໂຍບາຍ “ປະເທດ​ດຽວ​ສອງ​ລະບອບ” “ຊາວ​ຮົງ​ກົງ​ປົກຄອງ​ຮົງ​ກົງ” ແລະ ປົກຄອງ​ຕົນ​ເອງ​ໃນ​ລະດັບ​ສູງ​ຢ່າງ​ໝັ້ນ​ໜຽວ​ບໍ່​ປ່ຽນແປງ ສະໜັບສະໜູນ​ທ່ານ ນາງ ແລມ ເຈິງ​ເຢັດ​ງໍ (ນາງ ແຄ​ຣີ ແລມ) ຜູ້​ວ່າການ​ເຂດ​ບໍລິຫານ​ພິເສດ​ຮົງ​ກົງ ໃນ​ການ​ນຳພາ​ອົງການ​ປົກຄອງ​ເຂດ​ພິເສດ​ຮົງ​ກົງ ດຳເນີນ​ການ​ບໍລິຫານ​ຕາມ​ກົດໝາຍ ແລະ ຊອກ​ຄົ້ນ​ຫາ​ວິທີ​ບັງເກີດ​ຜົນ ທີ່​ສາມາດ​ແກ້​ໄຂ​ຄວາມ​ຂັດ​ແຍ່ງ ແລະ ບັນຫາ​ຕ່າງໆ​ທີ່​ເລິກເຊິ່ງ​ຂອງ​ຮົງ​ກົງ ເພື່ອ​ຊຸກຍູ້​ໃຫ້​ສັງຄົມ​ມີ​ສະຖຽນ​ລະ​ພາບ ແລະ ຄວາມ​ກົມກຽວ​ກັນ.

ຂ່າວທີ່ກ່ຽວຂ້ອງ