EU ​ແລະ ​ກູ​ບາ ​ເຫັນ​ດີ​ສືບ​ຕໍ່​ເຈລະຈາ​ກ່ຽວ​ກັບ​ສິດທິ​ມະນຸດ

343 08 ຕ.ລ. 2019 ຂ່າວຕ່າງປະເທດ
EU ​ແລະ ​ກູ​ບາ ​ເຫັນ​ດີ​ສືບ​ຕໍ່​ເຈລະຈາ​ກ່ຽວ​ກັບ​ສິດທິ​ມະນຸດ

    ກະຊວງ​ການ​ຕ່າງປະເທດ​ກູ​ບາ ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 5 ຕຸລາ​ນີ້​ວ່າ ຜູ້​ແທນ​ຂອງ​ລັດຖະບານ​ກູ​ບາ  ແລະ ສະຫະພາບ​ເອີ​ຣົບ (EU) ໄດ້​ດຳເນີນ​ການ​ປຶກສາ​ຫາລື​ຮອບ​ທີ 9 ກ່ຽວ​ກັບ​ບັນຫາ​ສິດທິ​ມະນຸດ ໂດຍ​ຈັດ​ຂຶ້ນ​ທີ່​ນະຄອນຫຼວງ ບຣຸກ​ແຊນ (ປະເທດ​ແບນ​ຊິກ) ທີ່​ນອນ​ຢູ່​ໃນ​ຂອບ​ຂອງ​ຂໍ້​ຕົກລົງ​ການ​ເຈລະຈາ​ທາງ​ດ້ານ​ການເມືອງ ແລະ ການ​ຮ່ວມ​ມື ຊຶ່ງ​ຖື​ວ່າ​ເປັນ​ເອກະສານ​ການ​ຫັນ​ການ​ພົວພັນ​ລະ​ກວ່າງ​ສອງ​ຝ່າຍ​ສູ່​ຄວາມ​ເປັນ​ປົກກະຕິ.

    ການ​ປຶກສາ​ຫາລື​ຮອບ​ນີ້ ມີ​ຂຶ້ນ​ພາຍ​ໃຕ້​ການ​ເປັນ​ປະທານ​ຂອງ​ທ່ານ ໂຣ​ໂດນ​ຟໍ ໂຣດ​ຣີ​ເກດ ຫົວໜ້າ​ກົມ​ບັນດາ​ບັນຫາ​ຫຼາຍ​ຝ່າຍ ແລະ ກົດໝາຍ​ສາກົນ ກະຊວງ​ການ​ຕ່າງປະເທດ​ກູ​ບາ ແລະ ທ່ານ ເອ​ອາ​ມອນ ກີ​​ລ​ມໍ ຜູ້​ແທນ​ພິເສດ​ຂອງ EU ກ່ຽວ​ກັບ​ສິດທິ​ມະນຸດ.

    ກະຊວງ​ການ​ຕ່າງປະເທດ​ກູ​ບາ ຊີ້​ແຈງ​ວ່າ ສອງ​ຝ່າຍ​ໄດ້​ປຶກສາ​ຫາລື ຢູ່​ໃນ​ບັນຍາກາດ ຂອງ​ຄວາມ​ເຄົາລົບ​ນັບຖື ແລະ ສ້າງສັນ ກ່ຽວ​ກັບ​ສິດທິ​ພົນ​ລະ​ເຮືອນ ແລະ ການເມືອງ ສິດທິ​ທາງ​ດ້ານ​ການເມືອງ ສັງຄົມ ແລະ ວັດທະນະທຳ ກໍ​ຄື​ການ​ຮ່ວມ​ມື​ແບບ​ສອງ​ຝ່າຍ ຢູ່​ໃນ​ບັນດາ ເວທີ​ປາ​ໄສ​ແບບ​ຫຼາຍ​ຝ່າຍ ກ່ຽວ​ກັບ​ສິດທິ​ມະນຸດ.

    ສອງ​ຝ່າຍ​ໄດ້​ເຫັນ​ດີ​ເປັນ​ເອກະສັນ​ກັນ​ວ່າ ຍັງ​ມີ​ສິ່ງ​ແຕກ​ຕ່າງ​ກ່ຽວ​ກັບ​ທັດສະນະ ແລະ ວິທີ​ການ ເຂົ້າ​ເຖິງ​ໃນ​ບາງ​ບັນຫາ ແຕ່​ພ້ອມ​ກັນ​ນັ້ນ​ກໍ​ຢືນຢັນ​ເຖິງ​ຄວາມ​ພ້ອມ​ໃນ​ການ​ເຈລະຈາ ໂດຍ​ອີງໃສ່ ພື້ນຖານ​ການ​ເຄົາລົບ​ສິດທິ​ສະເໝີພາບ ກ່ຽວ​ກັບ​ອຳນາດ​ອະທິປະ​ໄຕ ເອກະລາດ ຄວາມ​ຖືກຕ້ອງ ຕາມ​ກົດໝາຍ ແລະ ບໍ່​ແຊກ​ແຊງ​ເຂົ້າ​ໃນ​ວຽກ​ງານ​ພາຍ​ໃນ​ຂອງ​ຝ່າຍ​ຕ່າງໆ.

ຂ່າວທີ່ກ່ຽວຂ້ອງ