ອີ​ຣັກ ປະກາດ​ໃຊ້​ດຳລັດ​ວ່າ​ດ້ວຍ​ການ​ປະຕິ​ຮູບ

922 08 ຕ.ລ. 2019 ຂ່າວຕ່າງປະເທດ
ອີ​ຣັກ ປະກາດ​ໃຊ້​ດຳລັດ​ວ່າ​ດ້ວຍ​ການ​ປະຕິ​ຮູບ

     ວັນ​ທີ 6 ຕຸລາ​ນີ້ ຄະນະ​ລັດຖະບານ​ອີ​ຣັກ ພາຍ​ໃຕ້​ການ​ນຳພາ​ຂອງ​ນາຍົກລັດຖະມົນຕີ  ອາ​ເດລ ອັບ​ເດລ ມາ​ດີ ໄດ້​ປະກາດ​ການ​ປະຕິ​ຮູບ​ຫຼາຍ​ລາຍການ ຫຼັງ​ຈາກ​ວາລະ​ປະຊຸມ “ວິສາມັນ” ແກ່ຍາວ​ຕະຫຼອດ​ຄືນ ເພື່ອ​ຮັບ​ມື​ກັບ​ການ​ປະ​ທ້ວງ​ຕໍ່ຕ້ານ​ລັດຖະບານ​ທີ່​ແຜ່​ກວ້າງ​ອອກ ສົ່ງ​ຜົນ​ໃຫ້​ມີ ຜູ້​ເສຍ​ຊີວິດ​ແລ້ວ​ເກືອບ 100 ຄົນ.

    ດຳລັດ ຊຶ່ງ​ລັດຖະບານ​ອີ​ຣັກ ນຳ​ອອກ​ມາ​ປະກາດ​ໃຊ້​ນັ້ນ ປະກອບ​ມີ​ຫຼາຍ​ໂຄງການ​ປະຕິ​ຮູບ ຕາມ​ແຜນການ ໃນ​ຂົງເຂດ​ຕ່າງໆ​ເຊັ່ນ ການ​ແບ່ງປັນ​ທີ່​ດິນ ພັນທະ​ການ​ທະຫານ ແລະ ເພີ່ມ​ລາຍ​ຮັບ ດ້ານ​ສະຫວັດດີ​ການ ໃຫ້​ແກ່​ບັນດາ​ຄອບຄົວ​ທີ່​ມີ​ສະພາບ​ຫຍຸ້ງຍາກ.

    ເພື່ອ​ຮັບ​ມື​ກັບ​ສະພາບ​ຫວ່າງ​ງານ​ທີ່​ຮ້າຍ​ແຮງ​ຢູ່​ໃນ​ໄວ​ໜຸ່ມ​ນັ້ນ ລັດຖະບານ​ອີ​ຣັກ ຢືນຢັນ​ວ່າ ຈະ​ສ້າງ​ບັນດາ​ກຸ່ມ​ຕະຫຼາດ​ຮ່ວມ​ກຸ່ມ​ທີ່​ກວ້າງ​ໃຫຍ່​ຂຶ້ນ​ມາ ແລະ ຍົກ​ສູງ​ຜົນ​ປະໂຫຍດ ໃຫ້​ແກ່​ບັນດາ​ຜູ້​ທີ່ ບໍ່​ມີ​ວຽກ​ເຮັດ​ງານ​ທຳ. ທະນາຄານ​ໂລກ (WB) ໃຫ້​ຮູ້​ວ່າ ອັດຕາ​ສ່ວນ​ຫວ່າງ​ງານ​ໃນ​ໝູ່​ໄວ​ໜຸ່ມ ຢູ່​ໃນ​ອີ​ຣັກ ມີ​ເຖິງ 25%.

    ຄະນະ​ກຳມະການ​ສິດທິ​ມະນຸດ​ຂອງ​ອີ​ຣັກ ແຈ້ງ​ໃຫ້​ຮູ້ເມື່ອ​ວັນ​ທີ 5 ຕຸລາ​ນີ້​ວ່າ ນັບ​ແຕ່​ການ​ປະ​ທ້ວງ​ເລີ່ມ​ເກີດ​ຂຶ້ນ​ເມື່ອ​ວັນ​ທີ 1 ຕຸລາ ເປັນຕົ້ນ​ມາ ຈຳນວນ​ຜູ້​ເສຍ​ຊີວິດ ຢູ່​ໃນ​ນະຄອນຫຼວງ​ແບກ​ແດດ ແລະ ນະຄອນ​ຕ່າງໆ ຢູ່​ທາງ​ພາກ​ໃຕ້​ອີ​ຣັກ ໄດ້​ຂຶ້ນ​ເຖິງ 99 ຄົນ ແລະ ມີ​ຜູ້​ໄດ້​ຮັບ​ບາດເຈັບ​ອີກ ເກືອບ 4.000 ຄົນ.

    ຈາກ​ສະພາບ​ຄວາມ​ເປັນ​ຈິງ​ທີ່​ຫຍຸ້ງຍາກ​ຢູ່​ໃນ​ອີ​ຣັກ​ນັ້ນ ຜູ້​ປະ​ທ້ວງ​ທີ່​ສ່ວນ​ໃຫຍ່​ເປັນ​ຊາວ​ໜຸ່ມ ໄດ້​ພາກັນ​ລົງ​ສູ່​ທ້ອງ​ຖະໜົນ ເພື່ອ​ສະເໜີ​ໃຫ້​ທາງ​ການ ປະຕິ​ຮູບ​ເສດຖະກິດ ແກ້​ໄຂ​ວຽກ​ເຮັດ​ງານ​ທຳ ແລະ ແກ້​ໄຂ​ການ​ບໍລິການ​ອັນ​ເປັນ​ພື້ນຖານ​ຂອງ​ພາກ​ລັດ ເຊັ່ນ​ໄຟຟ້າ ນ້ຳ​ປະປາ ແລະ ຢຸດຕິ​ການ​ສໍ້​ລາດ ບັງ​ຫຼວງ.

    ການ​ປະ​ທ້ວງ​ໄດ້​ກາຍເປັນ​ການ​ໃຊ້​ຄວາມ​ຮຸນ​ແຮງ ສົ່ງ​ຜົນ​ໃຫ້​ທາງ​ການ​ອີ​ຣັກ ປະກາດ​ໃຊ້​ຄຳ ສັ່ງ​ຫ້າມ​ສັນຈອນ ຢູ່​ໃນ​ນະຄອນຫຼວງ​ແບກ​ແດດ ແລະ ງົດ​ການ​ສະໜອງ​ການ​ບໍລິການ ອິນ​ເຕີ​ເນັດ ຢູ່​ໃນ​ເກືອບ​ທຸກໆ​ທ້ອງຖິ່ນ. ມາ​ໃນ​ວັນ​ທີ 5 ຕຸລາ​ນີ້ ລັດຖະບານ​ອີ​ຣັກ ໄດ້​ຍົກເລີກ​ຄຳ​ສັ່ງ​ຫ້າມ​ສັນຈອນ ທີ່​ມີ​ຜົນ​ບັງຄັບ​ໃຊ້​ໃນ​ເວລາ​ກາງເວັນ ຢູ່​ໃນ​ນະຄອນຫຼວງ​ແບກ​ແດດ ແຕ່​ຍັງ​ຄົງ​ປິດ​ລ້ອມ​ບັນດາ​ເສັ້ນທາງ ທີ່​ມຸ່ງ​ໄປ​ສູ່​ສະໜາມ​ຫຼວງ ຍ້ອນ​ກັງວົນ​ວ່າ​ຈະ​ເກີດ​ເຫດການ​ຮຸນ​ແຮງ​ຈາກ​ຜູ້​ປະ​ທ້ວງ.

ຂ່າວທີ່ກ່ຽວຂ້ອງ