ຂ່າວຫຼ້າສຸດ

ສະແດງສິລະປະ-ວັດທະນະທຳຊາວໜຸ່ມເດີນທະເລ

532 08 ຕ.ລ. 2019 ຂ່າວໜ້າ​ໜຶ່ງ
ສະແດງສິລະປະ-ວັດທະນະທຳຊາວໜຸ່ມເດີນທະເລ

   ງານ​ສະ­ແດງ​ສິ­ລະ​ປະ-ວັດ­ທະ­ນະ­ທຳ​ຂອງ​ຄະ­ນະ​ຊາວ​ໜຸ່ມ​ລາວ ໂຄງ­ການ​ຊາວ​ໜຸ່ມ​ລາວ​ເດີນ​ທະ­ເລ ອາ​ຊຽນ-ຍີ່­ປຸ່ນ ຄັ້ງ​ທີ 46 ປະ­ຈຳ​ປີ 2019 ຈັດ​ຂຶ້ນ​ວັນ​ທີ 5 ຕຸ­ລາ 2019 ທີ່​ຫໍ​ວັດ­ທະ­ນະ­ທຳ​ແຫ່ງ​ຊາດ ມີ​ທ່ານ​ນາງ ສູນ​ທອນ ໄຊ​ຍະ​ຈັກ ຫົວ­ໜ້າ​ຄະ­ນະ​ພົວ­ພັນ​ຕ່າງ­ປະ­ເທດ​ສູນ​ກາງ​ພັກ ທ່ານ​ນາງ ວິ­ລະ​ວອນ ພັນ­ທະ​ວົງ ຮອງ​ເລ­ຂາ​ຄະ­ນະ​ບໍ­ລິ­ຫານ​ງານ​ສູນ​ກາງ​ຊາວ​ໜຸ່ມ​ປະ­ຊາ­ຊົນ​ປະ­ຕິ­ວັດ​ລາວ ບັນ­ດາ​ຮອງ​ລັດ­ຖະ­ມົນ­ຕີ ທູ­ຕາ­ນຸ­ທູດ ແຂກ​ຖືກ​ເຊີນ ແລະ ສະ­ມາ­ຊິກ​ຊາວ​ໜຸ່ມ​ຈາກ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ໂຄງ­ການ​ຊາວ​ໜຸ່ມ​ເດີນ​ທະ­ເລ​ອາ​ຊຽນ-ຍີ່­ປຸ່ນ​ໂດຍ​ໄດ້​ຮັບ​ການ​ສະ­ໜັບ­ສະ­ໜູນ ແລະ ຊ່ວຍ­ເຫຼືອ​ຈາກ​ລັດ­ຖະ­ບານ​ຍີ່­ປຸ່ນ ໂດຍ​ມີ​ຈຸດ­ປະ­ສົງ​ເພື່ອ​ໃຫ້​ໂຄງ­ການ​ດັ່ງ­ກ່າວ​ເປັນ​ເວ­ທີ​ໃຫ້​ຊາວ​ໜຸ່ມ​ຈາກ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ແລະ ຊາວ​ໜຸ່ມ​ປະ­ເທດ​ຍີ່­ປຸ່ນ ໄດ້​ມີ​ການ​ເສີມ​ສ້າງ​ມິດ­ຕະ­ພາບ ສາຍ​ພົວ­ພັນ​ການ​ຮ່ວມ​ມື ຄວາມ​ເຂົ້າ­ໃຈ​ອັນ​ດີ ເຊິ່ງ​ກັນ ແລະ ກັນ ໂດຍ​ຜ່ານ​ການ​ເຮັດ​ກິດ­ຈະ­ກຳ​ແລກ­ປ່ຽນ​ທາງ​ດ້ານ​ວັດ­ທະ­ນະ­ທຳ ແລະ ການ​ສົນ­ທະ­ນາ​ໃນ​ຫົວ­ຂໍ້​ຕ່າງໆ​ທີ່​ຕິດ​ພັນ​ກັບ​ການ​ພັດ­ທະ­ນາ​ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ແລະ ການ​ສຶກ​ສາ​ຂອງ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ແລະ ຍີ່­ປຸ່ນ ໂຄງ­ການ​ນີ້​ໄດ້​ຮັບ​ການ­ຈັດ­ຕັ້ງ​ປະ­ຕິ­ບັດ​ປີ 1974 ສຳ­ລັບ​ປີ​ນີ້ ຄົບ­ຮອບ 46 ປີ.

   ປີ 2019 ຊາວ​ໜຸ່ມ​ລາວ​ໄດ້​ເປັນ​ສ່ວນ​ໜຶ່ງ​ໃນ​ການ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ອາ​ຊຽນ​ຄົບ­ຮອບ 52 ປີ ແລະ ການ​ເຂົ້າ​ຮ່ວມ​ໂຄງ­ການ​ຊາວ​ໜຸ່ມ​ເດີນ​ທະ­ເລ​ອາ​ຊຽນ-ຍີ່­ປຸ່ນ​ຂອງ​ລາວ ຄັ້ງ​ທີ 22 ນັບ​ແຕ່​ປີ 1998 ເປັນ­ຕົ້ນ​ມາ ສະ­ນັ້ນ​ເພື່ອ​ເປັນ​ການ​ສະ­ເຫຼີມ­ສະ­ຫຼອງ​ວັນ​ສຳ­ຄັນ​ດັ່ງ­ກ່າວ ສູນ​ກາງ​ຊາວ​ໜຸ່ມ ໄດ້​ຄັດ​ເລືອກ​ໃຫ້​ຊາວ​ໜຸ່ມ​ລາວ 28 ຄົນ​ເພື່ອ​ເປັນ​ຕົວ​ແທນ​ເຂົ້າ​ຮ່ວມ​ໃນ​ໂຄງ­ການ​ດັ່ງ­ກ່າວ​ຕາມ​ການ​ເຊື້ອ​ເຊີນ ໂດຍ​ມີ​ຫົວ­ໜ້າ​ຄະ­ນະ​ຊາວ​ໜຸ່ມ ແລະ ຜູ້­ນຳ​ພາ​ກິດ­ຈະ­ກຳ​ເທິງ​ເຮືອ ລວມ​ທັງ​ໝົດ 30 ຄົນ ເຊິ່ງ​ຈະ​ໃຊ້​ເວ­ລາ​ດຳ­ເນີນ​ໂຄງ­ການ​ເປັນ​ເວ­ລາ 51 ວັນ ແລະ ຢ້ຽມ­ຢາມ 5 ປະ­ເທດ ຄື: ຍີ່­ປຸ່ນ ຫວຽດ­ນາມ ສິງ­ກະ­ໂປ ມຽນ​ມາ ແລະ ມາ​ເລ​ເຊຍ.

   ກິດ­ຈະ­ກຳ​ຈັດ​ຂຶ້ນ​ພາຍ​ໃຕ້​ຫົວ­ຂໍ້: “ໜຶ່ງ​ແຮງ​ສູ່​ການ​ປ່ຽນ­ແປງ​ທີ່​ຍິ່ງ​ໃຫຍ່” ເຊິ່ງ​ລວມ​ມີ 2 ຮູບ​ແບບ ຄື: ການ​ລົງ­ມື​ອະ­ນາ­ໄມ​ດ້ວຍ​ການ​ເກັບ​ຂີ້​ເຫຍື້ອ ໂດຍ​ມີ​ການ​ຮ່ວມ​ມື​ກັບ​ຫຼາຍ​ພາກ­ສ່ວນ​ທີ່​ກ່ຽວ­ຂ້ອງ ເຊັ່ນ: ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ ຫ້ອງ­ການ​ຊາວ​ໜຸ່ມ​ເມືອງ ອຳ­ນາດ​ການ​ປົກ­ຄອງ​ບ້ານ ຫ້ອງ­ການ​ມໍ­ລະ­ດົກ​ພະ​ທາດ­ຫຼວງ ແລະ ການ​ກະ­ຈາຍ​ຂໍ້​ມູນ​ຂ່າວ­ສານ​ຜ່ານ social media ໃນ​ຮູບ​ແບບ​ຂອງ​ຮູບ​ພາບ​ປະ­ກອບ​ຂໍ້­ຄວາມ​ວິ​ດີ​ໂອ ແລະ ການ​ຂຽນ​ບົດ​ຄວາມ​ຜ່ານ​ເພ​ຈ Facebook: Lao ParticipatingYouth of the 46th SSEAYP 2019 ທີ່​ເປັນ​ຊ່ອງ​ທາງ​ໃນ​ການ​ເຂົ້າ​ເຖິງ​ກຸ່ມ​ຄົນ​ສ່ວນ​ໃຫຍ່​ໃນ​ປັດ­ຈຸ­ບັນ

   ໃນ​ໂອ­ກາດ​ນີ້ ຜູ້​ເຂົ້າ​ຮ່ວມ​ແມ່ນ​ໄດ້​ຮັບ​ຊົມ​ການ­ສະ­ແດງ​ສິ­ລະ​ປະ-ວັດ­ທະ­ນະ­ທຳ ແລະ ວິ​ດີ​ໂອ​ຂອງ​ຄະ­ນະ​ຊາວ​ໜຸ່ມ​ລາວ ໂຄງ­ການ​ຊາວ​ໜຸ່ມ​ເດີນ​ທະ­ເລ​ອາ​ຊຽນ-ຍີ່­ປຸ່ນ ພ້ອມ​ນັ້ນ ຍັງ​ໄດ້​ມອບ​ສັນ­ຍະ­ລັກ SSEAYP ອີກ​ດ້ວຍ.

ຂ່າວທີ່ກ່ຽວຂ້ອງ