ຂ່າວຫຼ້າສຸດ

ອາຊຽນ-ຍີ່ປຸ່ນ ຮ່ວມພັດທະນາຢ່າງມີສະຖຽນລະພາບ ແລະ ຍືນຍົງ

839 08 ຕ.ລ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ Symposium ຈັດ​ຂຶ້ນ​ວັນ​ທີ 4 ຕຸ­ລາ 2019 ຢູ່​ໂຮງ­ແຮມ​ດອນ​ຈັນ​ພລາ​ເລດ ນະຄອນ​ຫຼວງ​ວຽງ​ຈັນ ມີ​ທ່ານ ພອນ​ແກ້ວ ຈັນ­ທະ​ມາ­ລີ ຕາງ­ໜ້າ​ສະ­ມາ­ຄົມ​ມິດ­ຕະ­ພາບ​ລາວ-ຍີ່­ປຸ່ນ ທ່ານ Keizo Takewaka ເອກ​ອັກ­ຄະ­ລາ­ຊະ­ທູດ​ຍີ່­ປຸ່ນ ປະ­ຈຳ​ລາວ ພ້ອມ​ດ້ວຍ​ຕົວ​ແທນ​ອົງ​ກອນ​ຈາກ​ປະ­ເທດ​ຍີ່­ປຸ່ນ ປະ­ຈຳ​ລາວ ຕາງ­ໜ້າ​ອະ­ດີດ​ນັກ​ສຶກ​ສາ​ທີ່​ຈົບ​ການ​ສຶກ​ສາ​ຈາກ​ປະ­ເທດ​ຍີ່­ປຸ່ນ​ຂອງ​ບັນ­ດາ​ປະ­ເທດ​ອາ​ຊຽນ ແລະ ລາວ ເຂົ້າ​ຮ່ວມ.

    ທ່ານ ພອນ​ແກ້ວ ຈັນ­ທະ​ມາ­ລີ ກ່າວ​ວ່າ: ການ​ພັດ­ທະ­ນາ​ພາກ​ພື້ນ ແລະ ສາ­ກົນ ແມ່ນ​ໜ້າ­ທີ່​ຄວາມ​ຮັບ­ຜິດ­ຊອບ​ຂອງ​ໝົດ​ທຸກ​ຄົນ​ທີ່​ຈະ​ຕ້ອງ​ໄດ້​ພະ­ຍາ­ຍາມ​ຮ່ວມ​ມື​ກັນ​ເຮັດ​ໃຫ້​ພວກ​ເຮົາ​ຕ້ອງ​ໄດ້​ພັດ­ທະ­ນາ​ຢ່າງ​ມີ​ສະ­ຖຽນ​ລະ​ພາບ ແລະ ຍືນ​ຍົງ ເຖິງ​ວ່າ​ປະ­ເທດ​ພວກ​ເຮົາ​ອາດ​ຈະ​ມີ​ຄວາມ​ແຕກ​ຕ່າງ​ກັນ​ທາງ​ດ້ານ​ວັດ­ທະ­ນະ­ທຳ ຮີດ­ຄອງ​ປະ­ເພ­ນີ ພາ­ສາ ແລະ ລະ­ດັບ​ການ​ພັດ­ທະ­ນາ​ກໍ​ຕາມ ແຕ່​ສິ່ງ​ໜຶ່ງ​ທີ່​ຄື​ກັນ​ນັ້ນ ຄວາມ​ມຸ່ງ​ມາດ​ປາ­ຖະ­ໜາ​ທີ່​ຢາກ​ມີ​ສັນ­ຕິ­ພາບ ຢາກ​ພັດ­ທະ­ນາ​ໃຫ້​ພວກ​ເຮົາ​ກ້າວ​ໄປ​ພ້ອມ­ພຽງ​ກັນ ປະ­ເທດ​ລາວ​ເປັນ​ປະ­ເທດ​ທີ່​ມີ​ທີ່​ຕັ້ງ​ພູມ​ສາດ​ຢູ່​ໃນ​ກາງ​ພາກ​ພື້ນ​ດິນ​ຂອງ​ອາ​ຊຽນ ມີ​ອາ­ນາ­ເຂດ ແລະ ມີ​ເງື່ອນ­ໄຂ​ອັນ​ດີ​ທີ່​ເຊື່ອມ​ຕໍ່​ທັງ​ອາ​ຊຽນ ແລະ ເຊື່ອມ​ຕໍ່​ຂຶ້ນ​ເໜືອ​ຜ່ານ​ຈີນ​ໄປ​ຫາ​ເກົາ­ຫຼີ ແລະ ຍີ່­ປຸ່ນ ລັດ­ຖະ­ບານ ແລະ ປະ­ຊາ­ຊົນ​ລາວ​ມີ​ຄວາມ​ຕັ້ງ­ໃຈ ແລະ ມີ​ຄວາມ​ພະ­ຍາ­ຍາມ​ສູງ​ທີ່​ຢາກ​ໃຫ້​ປະ­ເທດ​ຂອງ​ຕົນ​ເປັນ​ຈຸດ​ເຊື່ອມ​ຕໍ່​ທີ່​ດີ ຈຸດ​ປະ­ສານ​ງານ​ທີ່​ມີ​ຄວາມ​ໝັ້ນ­ຄົງ​ຂອງ​ພາກ​ພື້ນ ທີ່​ເຮັດ​ໃຫ້​ເກີດ​ຄວາມ​ວັດ­ທະ­ນາ​ຖາ­ວອນ​ຮ່ວມ​ກັນ ແນ່­ນອນ​ການ​ພັດ­ທະ­ນາ​ຕ້ອງ​ມີ​ຫຼາຍ​ຮູບ​ການ ຫຼາຍ​ວິ­ທີ ບໍ່​ວ່າ​ຈະ​ເປັນ​ຂະ​ບວນ​ການ​ອາ​ຊຽນ ອາ​ຊຽນ​ບວກ​ຍີ່­ປຸ່ນ ແລະ ອາ​ຊຽນ​ບວກ​ອື່ນໆ ໜຶ່ງ​ໃນ​ນັ້ນ ການ​ຮ່ວມ​ມື​ໂດຍ​ຜ່ານ​ຂະ​ບວນ ASJA/ ASCOJA ແມ່ນ​ໜຶ່ງ​ໃນ​ການ­ເຄື່ອນ­ໄຫວ​ທີ່​ມີ​ຄວາມ​ສຳ­ຄັນ​ທີ່​ຈະ​ປະ­ກອບ­ສ່ວນ​ອັນ​ສຳ­ຄັນ​ໃນ​ການ​ເສີມ​ສ້າງ​ເຮັດ​ໃຫ້​ພາກ​ພື້ນ​ໄດ້​ຮັບ​ການ​ພັດ­ທະ­ນາ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ