ສ ອາ​ເມ​ຣິ​ກາ ​ແລະ ​ຍີ່ປຸ່ນ ລົງ​ນາມ​ຂໍ້​ຕົກລົງ​ການ​ຄ້າ​​ແບບ​ສອງ​ຝ່າຍ

772 09 ຕ.ລ. 2019 ຂ່າວຕ່າງປະເທດ
ສ ອາ​ເມ​ຣິ​ກາ ​ແລະ  ​ຍີ່ປຸ່ນ ລົງ​ນາມ​ຂໍ້​ຕົກລົງ​ການ​ຄ້າ​​ແບບ​ສອງ​ຝ່າຍ

    ສຳນັກ​ຂ່າວສານ​ກຽວ​ໂດ ຂອງ​ຍີ່ປຸ່ນ ລາຍ​ງານ​ວ່າ ເມື່ອ​ວັນ​ທີ 7 ຕຸລາ​ນີ້ ຍີ່ປຸ່ນ ແລະ  ສ ອາ​ເມ​ຣິ​ກາ ໄດ້​ລົງ​ນາມ​ຂໍ້​ຕົກລົງ​ການ​ຄ້າ​ແບບ​ສອງ​ຝ່າຍ ຊຶ່ງ​ໄດ້​ຮັບ​ການ​ຫວັງ​ວ່າ​ຈະ​ນຳ​ເອົາ​ບັນດາ​ກະສິກອນ​ອາ​ເມ​ຣິ​ກັນ ກັບ​ຄືນ​ສູ່​ຄວາມ​ກ້ຳ​ເກິ່ງ ກັບ​ບັນດາ​ຄູ່​ແຂ່ງ​ສາກົນ ໂດຍ​ຜ່ານ​ນະໂຍບາຍ​ຫຼຸດ​ພາສີ ສຳລັບ​ບັນດາ​ຜະລິດ​ຕະ​ພັນ​ກະສິກຳ.

   ປະທານາທິບໍດີ ໂດ​ນາ​​ລ ທຣຳ ຜູ້ນຳ ສ ອາ​ເມ​ຣິ​ກາ ກ່າວ​ຢືນຢັນ​ກ່ອນ​ພິທີ​ລົງ​ນາມ​ຂໍ້​ຕົກລົງ​ການ​ຄ້າ ລະຫວ່າງ​ທ່ານ ຊິນ​ຊູ​ເກ ຊູ​ກີ​ຢາ​ມາ ເອກ​ອັກ​ຄະ​ລັດ​ຖະ​ທູດ​ຍີ່ປຸ່ນ ປະຈຳ ສ ອາ​ເມ​ຣິ​ກາ ແລະ ທ່ານ ໂຣ​ເບີດ ໄລ​ທີ​ເຊີ ຜູ້​ແທນ​ການ​ຄ້າ​ຂອງ ສ ອາ​ເມ​ຣິ​ກາ ຢູ່​ທີ່​ທຳ​ນຽບ​ຂາວ​ວ່າ  ຂໍ້​ຕົກລົງ​ນີ້​ຈະ​ກາຍເປັນ “ປັດ​ໄຈ​ເຮັດ​ໃຫ້​ເກີດ​ການ​ປ່ຽນແປງ​ໃຫ້​ແກ່​ບັນດາ​ກະສິກອນ ແລະ ບັນດາ​ເຈົ້າ​ຂອງ​ຟາມ​ສັດລ້ຽງ​ຂອງ​ພວກ​ເຮົາ” ນຳ​ມາ​ໃຫ້​ເຂົາເຈົ້າ​ຊຶ່ງ “ສິດ​ການ​ເຂົ້າ​ຫາ​ທີ່​ໄດ້​ຮັບ​ການ​ຍົກ​ສູງ​ຫຼາຍ​ພໍ​ສົມຄວນ ກັບ​ຕະຫຼາດ​ຕ່າງປະເທດ​ຕົ້ນຕໍ​ແຫ່ງ​ໜຶ່ງ.”

    ຢູ່​ໃນ​ການ​ພົບ​ປະ​ຢູ່​ນອກ​ກອງ​ປະຊຸມ ຂອງ​ສະມັດຊາ​ໃຫຍ່​ສະຫະ​ປະຊາ​ຊາດ ທີ່​ນະຄອນ​ນີວ​ຢອກ (ສ ອາ​ເມ​ຣິ​ກາ) ເມື່ອ​ວັນ​ທີ 25 ກັນຍາ​ທີ່​ຜ່ານ​ມາ ນາຍົກລັດຖະມົນຕີ​ຍີ່ປຸ່ນ ຊິນ​ໂຊ ອາ​ເບ ແລະ ປະທານາທິບໍດີ ທຣຳ ໄດ້​ແຈ້ງ​ໃຫ້​ຮູ້​ວ່າ ສອງ​ປະເທດ​ໄດ້​ບັນລຸ​ຂໍ້​ຕົກລົງ​ການ​ຄ້າ​ແບບ​ສອງ​ຝ່າຍ ເພື່ອ​ການ​ຫຼຸດ​ພາສີ​ສຳລັບ​ສິນຄ້າ​ກະສິກຳ ແລະ ອຸດສາຫະກຳ.

    ຂໍ້​ຕົກລົງ​ດັ່ງກ່າວ​ລະບຸ​ວ່າ ຍີ່ປຸ່ນ​ຈະ​ຫຼຸດ​ພາສີ​ນຳ​ເຂົ້າ​ໃນ​ມູນ​ຄ່າ 7 ຕື້​ໂດ​ລາ​ສະຫະລັດ ສຳລັບ ສິນຄ້າ​ກະສິກຳ​ຂອງ ສ ອາ​ເມ​ຣິ​ກາ ໃນ​ນັ້ນ​ມີ​ເຂົ້າ​ເບຼ ເຂົ້າ​ຝ້າງ ຊີ້ນ​ງົວ ແລະ ຊີ້ນ​ໝູ. ທາງ​ດ້ານ ສ ອາ​ເມ​ຣິ​ກາ ຈະ​ຫຼຸດ​ພາສີ​ນຳ​ເຂົ້າ​ໃນ​ມູນ​ຄ່າ 40 ລ້ານ​ໂດ​ລາ​ສະຫະລັດ ກັບ​ສິນຄ້າ​ກະສິກຳ​ຂອງ​ຍີ່ປຸ່ນ ແລະ ໂຍະຍານ​ຂີດ​ກຳນົດ​ການ​ນຳ​ເຂົ້າ ໂດຍ​ຍົກເວັ້ນ​ພາສີ​ສຳລັບ​ຊີ້ນ​ງົວ​ຂອງ​ປະເທດ​ນີ້. ເຖິງ​ວ່າ​ຂໍ້​ຕົກລົງ​ນັ້ນ​ບໍ່​ໄດ້​ເວົ້າ​ເຖິງ​ຂົງເຂດ​ລົດຍົນ​ກໍ​ຕາມ ແຕ່​ນາຍົກລັດຖະມົນຕີ ອາ​ເບ ເວົ້າ​ວ່າ​ໄດ້​ຮັບ​ຄຳ​ສັນຍາ​ອີກ​ເທື່ອ​ໜຶ່ງ​ຈາກ​ປະທານາທິບໍດີ​ທຣຳ  ກ່ຽວ​ກັບ​ການ​ທີ່​ວ່າ ສ ອາ​ເມ​ຣິ​ກາ ຈະ​ບໍ່​ເກັບ​ພາສີ​ສູງ​ຂຶ້ນ​ອີກ ສຳລັບ​ລົດຍົນ​ທີ່​ນຳ​ເຂົ້າ​ຈາກ​ຍີ່ປຸ່ນ.

    ຖະແຫຼງການ​ທີ່​ມີ​ອອກ​ມາ​ຫຼັງ​ການ​ເຈລະຈາ​ລະຫວ່າງ​ຜູ້ນຳ​ທັງ​ສອງ ໃຫ້​ຮູ້​ວ່າ ສອງ​ປະເທດ​ຈະ​ພະຍາຍາມ ເພື່ອ​ຊອກ​ຫາ​ວິທີ​ການ​ແກ້​ໄຂ​ໂດຍ​ໄວ​ໃຫ້​ແກ່​ບັນຫາ​ອື່ນໆ ທີ່​ພົວພັນ​ເຖິງ​ພາສີ​ຂາ​ເຂົ້າ-ຂາ​ອອກ. ສ ອາ​ເມ​ຣິ​ກາ ແລະ ຍີ່ປຸ່ນ ພວມ​ພະຍາຍາມ​ເຮັດ​ສຳເລັດ​ເອກະສານ​ຂອງ​ສັນຍາ ໂດຍ​ຝ່າຍ ສ ອາ​ເມ​ຣິ​ກາ ຫວັງ​ວ່າ​ຈະ​ນຳ​ເອົາ​ຂໍ້​ຕົກລົງ​ດັ່ງກ່າວ ເຂົ້າ​ສູ່​ການ​ປະຕິບັດ ນັບ​ແຕ່​ວັນ​ທີ 1 ມັງກອນ ປີ 2020 ເປັນຕົ້ນ​ໄປ.

ຂ່າວທີ່ກ່ຽວຂ້ອງ