ມາ​ເລ​ເຊຍ ປັບ​ໃໝ​ບັນດາ​ບຸກຄົນ ​ແລະ ​ ອົງການ​ໃນ​ກໍລະນີ​ຫຍຸ້ງ​ເຫຍືອງ​ຂອງ​ກອງ​ທຶນ 1MDB

805 09 ຕ.ລ. 2019 ຂ່າວຕ່າງປະເທດ
ມາ​ເລ​ເຊຍ ປັບ​ໃໝ​ບັນດາ​ບຸກຄົນ ​ແລະ ​ ອົງການ​ໃນ​ກໍລະນີ​ຫຍຸ້ງ​ເຫຍືອງ​ຂອງ​ກອງ​ທຶນ 1MDB

    ທ່ານ ລາ​ທີ​ຟາ ໂກ​ຢາ ຫົວໜ້າ​ຄະນະ​ກຳມະການ​ຕ້ານ​ການ​ສໍ້​ລາດ​ບັງ​ຫຼວງ​ຂອງ​ມາ​ເລ​ເຊຍ (MACC) ກ່າວ​ຕໍ່​ຜູ້​ສື່​ຂ່າວ ເມື່ອ​ວັນ​ທີ 7 ຕຸລາ​ນີ້​ວ່າ ເຈົ້າ​ໜ້າທີ່​ມາ​ເລ​ເຊຍ ໄດ້​ມີ​ການ​ປັບ​ໃໝ​ອອກ​ມາ ສຳລັບ 80 ບຸກຄົນ ແລະ ອົງການ ທີ່​ຖືກ​ກ່າວ​ຫາ​ວ່າ​ໄດ້​ຮັບ​ເງິນ​ຈາກ ກອງ​ທຶນ​ການ​ລົງທຶນ​ແຫ່ງ​ລັດ​ມາ​ເລ​ເຊຍ (1MDB).

   ກອງ​ທຶນ 1MDB ໄດ້​ຮັບ​ການ​ສ້າງຕັ້ງ​ເມື່ອ​ປີ 2009 ໂດຍ​ອະດີດ​ນາຍົກລັດຖະມົນຕີ​ມາ​ເລ​ເຊຍ ນາ​ຈິບ ຣາ​ຊັກ ເພື່ອ​ຮັບ​ໃຊ້​ໃຫ້​ແກ່​ເປົ້າ​ໝາຍ​ການ​ພັດທະນາ​ເສດຖະກິດ-ສັງຄົມ. ບັນດາ​ນັກ​ສືບສວນ​ສອບ​ສວນ​ຂອງ​ມາ​ເລ​ເຊຍ ແລະ  ສ ອາ​ເມ​ຣິ​ກາ ເຫັນ​ວ່າ​ກອງ​ທຶນ​ດັ່ງກ່າວ​ໄດ້​ສູນຫາຍ​ເງິນ​ໄປ​ປະມານ 4,5 ຕື້​ໂດ​ລາ​ສະຫະລັດ ໃນ​ຂະນະ​ທີ່​ມີ​ປະມານ 1 ຕື້​ໂດ​ລາ​ສະຫະລັດ ໄດ້​ຝາກ​ເຂົ້າ​ໃນ​ບັນຊີ​ການ​ເງິນ​ສ່ວນ​ຕົວ​ຂອງ​ທ່ານ ນາ​ຈິບ ຣາ​ຊັກ.

     ທ່ານ ລາ​ທີ​ຟາ ໂກ​ຢາ ເວົ້າ​ວ່າ MACC ພວມ​ສຸມ​ໃສ່​ການ​ນຳ​ເອົາ​ເງິນ​ຄືນ​ມາ 420 ລ້ານ​ຣິງ​ກິດ (ເທົ່າ​ກັບ 100 ລ້ານ​ໂດ​ລາ​ສະຫະລັດ) ຈາກ​ບັນດາ​ບຸກຄົນ ແລະ ອົງການ ທີ່​ຖືກ​ກ່າວ​ຫາ​ວ່າ​ໄດ້​ຮັບ​ເງິນ​ຈາກ​ກອງ​ທຶນ​ດັ່ງກ່າວ ໂດຍ​ຜ່ານ​ບັນດາ​ບັນຊີ​ການ​ຟອກ​ເງິນ ທີ່​ກ່ຽວຂ້ອງ​ກັບ​ທ່ານ ນາ​ຈິບ ຣາ​ຊັກ ໃນ​ຈຳນວນ​ນັ້ນ​ມີ​ທ່ານ ນາ​ຊີ ຣາ​ຊັກ ອະດີດ​ຜູ້ອຳນວຍການ​ທະນາຄານ CIMB ຂອງ​ມາ​ເລ​ເຊຍ ທັງ​ເປັນ​ອ້າຍ​ຂອງ​ທ່ານ ນາ​ຈິບ ຣາ​ຊັກ. ທ່ານ ລາ​ທີ​ຟາ ໂກ​ຢາ ໃຫ້​ຮູ້​ວ່າ MACC ໄດ້​ສົ່ງ​ຄຳ​ແຈ້ງ​ເຕືອນ​ໄປ​ຍັງ​ບັນດາ​ບຸກຄົນ ແລະ ອົງການ​ທີ່​ຖືກ​ກ່າວ​ຫາ ແລະ ສະເໜີ​ໃຫ້​ເຂົາເຈົ້າ​ຈ່າຍ​ຄ່າ​ປັບ​ໃໝ ໂດຍ​ທີ່​ບຸກຄົນ ແລະ ອົງການ​ເຫຼົ່ານັ້ນ ອາດ​ຈະ​ຖືກ​ປັບ​ໃໝ​ທົບ 2,5 ເທົ່າ​ຂອງ​ຈຳນວນ​ເງິນ​ທີ່​ໄດ້​ຮັບ​ໄປ.

    ຢູ່​ໃນ​ກໍລະນີ​ຫຍຸ້ງ​ເຫຍືອງ​ດັ່ງກ່າວ ທ່ານ ນາ​ຈິບ ຣາ​ຊັກ ຕ້ອງ​ໄດ້​ປະ​ເຊີນ​ກັບ​ການ​ກ່າວ​ຫາ 42 ເລື່ອງ ກ່ຽວ​ກັບ​ການ​ຟອກ​ເງິນ ແລະ ຮັບ​ສິນ​ບົນ ໃນ​ຂະນະ​ທີ່​ທ່ານ ນາ​ຈິບ ຣາ​ຊັກ ໄດ້​ຢືນຢັນ​ຕະຫຼອດ​ມາ​ວ່າ​ທ່ານ​ບໍ່​ມີ​ໂທດ​ກຳ ພ້ອມ​ທັງ​ເວົ້າ​ວ່າການ​ກ່າວ​ຫາ​ເຂົາ ແມ່ນ​ເພື່ອ​ເປົ້າ​ໝາຍ​ທາງ​ການເມືອງ.

ຂ່າວທີ່ກ່ຽວຂ້ອງ