ທຸກພາກສ່ວນ ແລະ ຜູ້ທ່ຽວງານບຸນຊ່ວງເຮືອ ໃຫ້ເອົາໃຈໃສ່ຖິ້ມຂີ້ເຫຍື້ອໃສ່ຈຸດທີ່ກຳນົດໄວ້

446 09 ຕ.ລ. 2019 ຂ່າວໜ້າ​ໜຶ່ງ
ທຸກພາກສ່ວນ ແລະ ຜູ້ທ່ຽວງານບຸນຊ່ວງເຮືອ ໃຫ້ເອົາໃຈໃສ່ຖິ້ມຂີ້ເຫຍື້ອໃສ່ຈຸດທີ່ກຳນົດໄວ້

    ເພື່ອ​ເຮັດ​ໃຫ້​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ປະ­ເພ­ນີ ທ່າ​ວັດ​ຈັນ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ທີ່​ຈະ​ຈັດ​ຂຶ້ນ​ວັນ​ທີ 12-13 ຕຸ­ລາ 2019 ເປັນ​ງານ​ບຸນ​ທີ່​ສະ­ອາດ​ຈົບ­ງາມ ປາ­ສະ­ຈາກ​ຂີ້​ເຫຍື້ອ ຕ້ອນ­ຮັບ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ໂດຍ​ສະ­ເພາະ ປີ​ນີ້​ເປັນ​ປີ​ທ່ອງ​ທ່ຽວ​ລາວ-ຈີນ ທັງ​ເປັນ​ການ​ຕ້ອນ­ຮັບ​ກອງ​ປະ­ຊຸມ​ສຸດ​ຍອດ​ການ­ທ່ອງ­ທ່ຽວ​ເຈົ້າ​ຄອງ  5 ນະ­ຄອນ ບັນ­ດາ​ປະ­ເທດ​ລຸ່ມ​ແມ່­ນ້ຳ​ຂອງ ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ໄດ້​ວາງ​ແຜນ​ຢ່າງ​ລະ­ອຽດ​ໃນ​ການ​ຮັກ­ສາ​ຄວາມ​ສະ­ອາດ ທັງ​ຮຽກ­ຮ້ອງ​ໃຫ້​ຊາວ​ຄ້າ­ຂາຍ ລວມ​ທັງ​ຜູ້​ເຂົ້າ​ທ່ຽວ​ງານ​ເອົາ­ໃຈ­ໃສ່​ເກັບ​ມ້ຽນ​ຂີ້​ເຫຍື້ອ ຫຼື ຖິ້ມ​ຂີ້​ເຫຍື້ອ​ໃສ່​ຈຸດ​ທີ່​ກຳ­ນົດ​ໄວ້.

    ທ່ານ ບຸນ​ຈັນ ແກ້ວ​ສີ​ທຳ​ມະ ຫົວ­ໜ້າ​ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ ໄດ້​ໃຫ້​ສຳ­ພາດ​ກ່ຽວ​ກັບ​ແຜນ­ການ​ເກັບ​ມ້ຽນ​ຂີ້​ເຫຍື້ອ​ໃນ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ທ່າ​ວັດ​ຈັນ ປະ­ຈຳ​ປີ 2019 ໃນ​ວັນ​ທີ 7 ຕຸ­ລາ 2019 ວ່າ: ວັນ​ທີ 25 ກັນ­ຍາ 2019 ຫ້ອງ­ການ ຄບຕ ໄດ້​ເອີ້ນ​ຜູ້​ປະ­ກອບ​ການ ໂດຍ​ສະ­ເພາະ ຜູ້​ສຳ​ປະ­ທານ​ຂາຍ​ສິນ­ຄ້າ​ຢູ່​ຕາມ​ເສັ້ນ­ທາງ​ແຄມ​ຂອງ ພ້ອມ​ທັງ​ຜູ້​ປະ­ກອບ​ການ​ຢູ່​ສວນ​ເຈົ້າ​ອະ­ນຸ­ວົງ ແລະ ບັນ­ດາ​ຜູ້​ປະ­ກອບ​ການ​ອື່ນໆ​ມາ​ຮ່ວມ​ປະ­ຊຸມ​ປຶກ­ສາ​ຫາ­ລື ກ່ຽວ​ກັບ​ການ​ເກັບ​ມ້ຽນ​ຂີ້​ເຫຍື້ອ ເຊິ່ງ​ກອງ​ປະ­ຊຸມ​ໄດ້​ແບ່ງ​ຄວາມ​ຮັບ­ຜິດ­ຊອບ​ກັນ​ຢ່າງ​ຈະ­ແຈ້ງ ໃນ​ການ​ຮັກ­ສາ​ຄວາມ​ສະ­ອາດ​ພາຍ​ໃນ​ງານ​ບຸນ ສຳ­ລັບ​ການ​ເກັບ​ມ້ຽນ​ຂີ້​ເຫຍື້ອ​ຢູ່​ສວນ​ເຈົ້າ​ອະ­ນຸ­ວົງ ໄດ້​ແບ່ງ​ຄວາມ​ຮັບ­ຜິດ­ຊອບ​ໃຫ້​ຜູ້​ສຳ​ປະ­ທານ​ໃນ​ການ​ເກັບ​ມ້ຽນ​ຂີ້​ເຫຍື້ອ​ເປັນ​ຜູ້​ຮັບ­ຜິດ­ຊອບ ສະ­ເພາະ​ຊາວ​ຄ້າ­ຂາຍ​ທີ່​ມາ​ຂາຍ­ເຄື່ອງ​ຢູ່​ຕາມ​ຈຸດ​ຕ່າງໆ​ໃນ​ປີ​ນີ້ ​ໄດ້​ມາ​ເຮັດ​ສັນ­ຍາ​ເກັບ​ມ້ຽນ​ຂີ້​ເຫຍື້ອ​ກັບ​ຫ້ອງ­ການ ຄບຕ ເປັນ​ທີ່​ຮຽບ​ຮ້ອຍ ພ້ອມ​ທັງ​ໄດ້​ແນະ­ນຳ​ໃຫ້​ບັນ­ດາ​ຮ້ານ​ມີ​ຖັງ​ເກັບ​ມ້ຽນ​ຂີ້​ເຫຍື້ອ​ໃນ​ແຕ່​ລະ​ຮ້ານ ນອກ​ນັ້ນ ໄດ້​ຈັດ​ແບ່ງ​ການ​ເກັບ​ມ້ຽນ ແລະ ຂົນ­ສົ່ງ​ຂີ້​ເຫຍື້ອ ແລະ ການ​ຮັກ­ສາ​ຄວາມ​ສະ­ອາດ​ໃຫ້ ຄບຕ ເມືອງ​ທີ່​ກ່ຽວ­ຂ້ອງ​ຮັບ­ຜິດ­ຊອບ​ເປັນ​ແຕ່​ລະ​ຈຸດ.

    ສຳ­ລັບ​ການ​ເກັບ​ມ້ຽນ​ຂີ້​ເຫຍື້ອ​ນັ້ນ ຈະ​ໄດ້​ດຳ­ເນີນ​ການ​ຂົນ­ສົ່ງ​ຂີ້​ເຫຍື້ອ​ໄປ​ທີ່​ສະ­ໜາມ​ຂີ້​ເຫຍື້ອ​ໃນ​ທຸກ​ວັນ ນອກ​ນັ້ນ​ຈະ​ວາງ​ຖັງ​ໃສ່​ຂີ້​ເຫຍື້ອ​ຫຼາຍ​ຮ້ອຍ​ຖັງ​ໄວ້​ແຕ່​ລະ​ຈຸດ​ເພື່ອ​ຮອງ​ຮັບ​ການ​ຖິ້ມ​ຂີ້​ເຫຍື້ອ​ຂອງ​ມວນ​ຊົນ ເພື່ອ​ໃຫ້​ຮັກ­ສາ​ໄດ້​ຄວາມ​ສະ­ອາດ ສ່ວນ​ກຳ­ລັງ​ແຮງ​ງານ​ໄດ້​ມີ​ກຽມ­ພ້ອມ​ຢ່າງ​ພຽງ­ພໍ​ໃນ​ການ​ຮັບ​ໃຊ້ ເວົ້າ​ລວມ​ແລ້ວ ມາ​ຮອດ​ປັດ­ຈຸ­ບັນ​ໄດ້​ສຳ­ເລັດ​ການ​ວາງ​ແຜນ​ແບ່ງ​ຄວາມ​ຮັບ­ຜິດ­ຊອບ​ຢ່າງ​ຈະ­ແຈ້ງ​ໃຫ້​ພາກ­ສ່ວນ​ກ່ຽວ­ຂ້ອງ​ເພື່ອ​ຮັບ­ປະ­ກັນ​ໃຫ້​ງານ​ບຸນ​ມີ​ຄວາມ​ສະ­ອາດ​ຈົບ­ງາມ.

    ທ່ານ ບຸນ​ຈັນ ແກ້ວ​ສີ​ທຳ​ມະ ຍັງ​ກ່າວ​ຕື່ມ​ວ່າ: ເພື່ອ​ເຮັດ​ໃຫ້​ງານ​ບຸນ​ຮັກ­ສາ​ໄດ້​ຄວາມ​ສະ­ອາດ​ຈົບ­ງາມ ນອກ­ຈາກ​ພາກ­ສ່ວນ​ກ່ຽວ­ຂ້ອງ​ເອົາ­ໃຈ­ໃສ່​ເກັບ​ມ້ຽນ ແລະ ອະ­ນາ­ໄມ​ພາຍ​ໃນ​ງານ​ບຸນ​ແລ້ວ ກໍ​ຂໍ​ຮຽກ­ຮ້ອງ​ມາ​ຍັງ​ຊາວ​ຄ້າ­ຂາຍ ແລະ ຜູ້​ປະ­ກອບ​ການ​ຕ້ອງ​ພ້ອມ​ກັນ​ເອົາ­ໃຈ­ໃສ່​ຖິ້ມ​ຂີ້​ເຫຍື້ອ​ໃນ​ບ່ອນ​ທີ່​ກຳ­ນົດ ເພື່ອ​ຮັບ­ປະ­ກັນ​ບໍ່​ໃຫ້​ມີ​ຂີ້​ເຫຍື້ອ​ຖິ້ມ​ຊະ­ຊາຍ​ຢັງ​ຢາຍ​ພາຍ​ໃນ​ງານ ກໍ່​ຄວາມ​ບໍ່​ຈົບ­ງາມ ທັງ​ເປັນ​ການ​ອຳ­ນວຍ​ຄວາມ​ສະ­ດວກ​ໃຫ້​ກັບ​ພະ­ນັກ­ງານ​ຂົນ­ສົ່ງ​ຂີ້​ເຫຍື້ອ​ນຳ­ໄປ​ເກັບ​ມ້ຽນ​ຢູ່​ສະ­ໜາມ​ຂີ້​ເຫຍື້ອ​ນຳ​ອີກ ເວົ້າ​ລວມ​ແລ້ວ ຖ້າ​ທຸກ​ຄົນ​ຮ່ວມ​ກັນ​ໃນ​ການ​ຮັກ­ສາ​ຄວາມ​ສະ­ອາດ​ໃນ​ງານ​ບຸນ ຈະ​ເຮັດ​ໃຫ້​ງານ​ບຸນ​ປາ­ສະ­ຈາກ​ຂີ້​ເຫຍື້ອ ເກີດ​ຄວາມ​ຈົບ­ງາມ ຕ້ອນ­ຮັບ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ ທັງ​ເປັນ​ການ​ປະ­ກອບ­ສ່ວນ​ສ້າງ​ນະ­ຄອນ­ຫຼວງ​ວຽງ​ຈັນ​ໃຫ້​ເປັນ​ເມືອງ​ສີ­ຂຽວ ໜ້າ​ຢູ່ ແລະ ຍືນ​ຍົງ.

ຂ່າວທີ່ກ່ຽວຂ້ອງ