ຫາລືການກຳນົດຍຸດທະສາດດ້ານການເງິນສາທາ

1.576 09 ຕ.ລ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ປຶກ­ສາ​ຫາ­ລື​ເບື້ອງ​ຕົ້ນ​ດ້ານ​ຍຸດ​ທະ​ສາດ​ການ​ເງິນ​ສາ­ທາ­ລະ­ນະ​ສຸກ ຈັດ​ຂຶ້ນ​ວັນ​ທີ 8 ຕຸ­ລາ 2019 ທີ່​ໂຮງ­ແຮມ​ດອນ​ຈັນ​ພຣາ​ເລດ ນະ­ຄອນ­ຫຼວງ​ວຽງ​ຈັນ ໂດຍ​ເປັນ​ປະ­ທານ​ຂອງ​ທ່ານ ສົມ​ພອນ ຜາງ ມະ­ນີ​ໄຊ ຫົວ­ໜ້າ​ກົມ​ການ​ເງິນ ກະ­ຊວງ​ສາ­ທາ­ລະ­ນະ​ສຸກ ມີ​ທ່ານ Chris to pher ຜູ້­ຕາງ­ໜ້າ​ອົງ­ການ​ອະ­ນາ­ໄມ​ໂລກ ພະ​ແນກ​ສາ­ທາ­ລະ­ນະ​ສຸກ​ແຂວງ ນະ­ຄອນ­ຫຼວງ ອົງ­ການ​ຊ່ວຍ­ເຫຼືອ​ເພື່ອ​ການ​ພັດ­ທະ­ນາ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ເພື່ອ​ຄົ້ນ­ຄວ້າ​ປຶກ­ສາ​ຫາ­ລື​ການ​ກຳ­ນົດ​ຍຸດ​ທະ​ສາດ​ດ້ານ​ການ​ເງິນ​ສາ­ທາ­ລະ­ນະ​ສຸກ ແລະ ເປັນ​ທິດ​ທາງ​ທີ່  ເໝາະ​ສົມ​ໃນ​ການ​ຕອບ​ສະ­ໜອງ​ໃຫ້​ແກ່​ການ​ບໍ­ລິ­ການ​ດ້ານ​ວຽກ​ງານ​ດັ່ງ­ກ່າວ​ໃຫ້​ພຽງ­ພໍ ເພື່ອ​ກ້າວ​ໄປ​ເຖິງ​ການ​ບັນ­ລຸ​ຕົວ​ຊີ້​ວັດ​ດ້ານ​ຕ່າງໆ​ຂອງ​ຂະ­ແໜງ​ສາ­ທາ­ລະ­ນະ​ສຸກ ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ນະ­ໂຍ­ບາຍ​ການ​ປົກ​ຄຸມ​ສຸ­ຂະ­ພາບ​ທົ່ວ​ປວງ​ຊົນ (UHC) ປີ 2025 ແລະ ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ 3 (SDG3) ປີ 2030 ຕາມ​ຄວາມ​ມຸ່ງ​ຫວັງ​ຂອງ​ລັດ­ຖະ­ບານ ແລະ ປະ­ຊາ­ຊົນ​ບັນ­ດາ­ເຜົ່າ​ໃຫ້​ມີ​ຜົນ­ສຳ­ເລັດ​ເທື່ອ​ລະ​ກ້າວ.

    ທ່ານ ສົມ​ພອນ ຜາງ​ມະ­ນີ​ໄຊ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້​ໄດ້​ສືບ​ເນື່ອງ​ຈາກ​ກອງ​ປະ­ຊຸມ​ທີ່​ຜ່ານ​ມາ​ໃນ​ເດືອນ​ກໍ­ລະ­ກົດ 2019 ເຊິ່ງ​ຜົນ​ການ​ປະ­ຊຸມ​ຍັງ​ໄດ້​ຢັ້ງ­ຢືນ​ໃຫ້​ເຫັນ​ວ່າ ການ​ລົງ­ທຶນ​ໃສ່​ວຽກ​ງານ​ສາ­ທາ­ລະ­ນະ​ສຸກ​ໃນ​ປັດ­ຈຸ­ບັນ​ຍັງ​ຕ່ຳ​ຢູ່​ລະ­ດັບ 2,8% ຂອງ GDP  ມາດ­ຕະ­ຖານ WHO ແມ່ນ 4-5% ການ​ຕອບ​ສະ  ໜອງ​ງົບ­ປະ­ມານ​ຍັງ​ບໍ່​ໄດ້​ເຖິງ 9% ຂອງ​ລາຍ​ຈ່າຍ​ທັງ​ໝົດ ແລະ ລາຍ​ຈ່າຍ​ງົບ­ປະ­ມານ​ພາກ​ລັດ​ໃຫ້​ຂະ­ແໜງ ການ​ມີ​ພຽງ​ແຕ່ 44 ໂດ​ລາ​ສະ­ຫະ­ລັດ ຫຼື ປະ­ມານ 340.000 ກີບ​ຕໍ່​ຫົວ​ຄົນ (ມາດ­ຕະ­ຖານ​ສາ­ກົນ​ໃນ​ປະ­ເທດ​ທີ່​ມີ​ລາຍ​ຮັບ​ຕ່ຳ​ແມ່ນ 86 ໂດ​ລາ ຫຼື ປະ­ມານ 660.000 ກີບ​ຕໍ່​ຄົນ) ເຊິ່ງ​ຂໍ້​ສະ­ເໜີ​ແນະ​ຈາກ​ກອງ​ປະ­ຊຸມ​ເຫັນ​ວ່າ​ແຜນ​ປະ­ຕິ​ຮູບ​ດ້ານ​ການ​ເງິນ ແລະ ການ​ກຳ­ນົດ​ຍຸດ​ທະ​ສາດ​ດ້ານ​ການ​ເງິນ​ສາ­ທາ­ລະ­ນະ​ສຸກ​ຈະ​ເປັນ​ກຸນ­ແຈ​ສຳ­ຄັນ ເພື່ອ​ເປີດ​ຊ່ອງ​ທາງ​ດ້ານ​ການ​ເງິນ​ໃຫ້​ຂະ­ແໜງ​ສາ­ທາ­ລະ­ນະ​ສຸກ ໄດ້​ມີ​ເງິນ​ພຽງ­ພໍ​ຕາມ​ຄວາມ​ຕ້ອງ­ການ​ພັດ­ທະ­ນາ​ວຽກ​ງານ ບົນ​ພື້ນ­ຖານ​ການ​ຄິດ­ໄລ່​ຕາມ​ຄວາມ​ເໝາະ​ສົມ​ກັບ​ຄວາມ​ອາດ​ສາ­ມາດ​ທີ່ ຈະ​ເປັນ​ໄປ​ໄດ້​ໃນ​ການ​ຕອບ​ສະ­ໜອງ​ງົບ­ປະ­ມານ​ຂອງ​ລັດ ແລະ ການ​ໄດ້​ມາ​ຈາກ​ແຫຼ່ງ​ອື່ນໆ​ທີ່​ສາ­ມາດ​ນຳ​ມາ­ສູ່​ພາກ​ລາຍ​ຈ່າຍ​ໃນ​ສ່ວນ​ນີ້​ໄດ້ ອີກ​ດ້ານ​ໜຶ່ງ ກໍ​ຍັງ​ເປັນ​ການ​ຄົ້ນ­ຄວ້າ ແລະ ກະ­ກຽມ​ກົນ​ໄກ​ການ​ປັບ­ປຸງ​ການ­ຈັດ­ຕັ້ງ​ປະ­ຕິ­ບັດ​ລະ­ບົບ​ປະ­ກັນ​ສຸ­ຂະ­ພາບ ໃຫ້​ມີ​ຄວາມ​ເໝາະ​ສົມ​ທີ່​ສາ­ມາດ​ຈັດ​ຕັ້ງ​ປະ­ຕິ­ບັດ​ໄດ້ ແລະ ມີ​ຄວາມ​ຍືນ​ຍົງ ພ້ອມ​ທັງ​ເປັນ​ການ​ຄົ້ນ­ຄວ້າ​ກົນ​ໄກ​ການ​ສົ່ງ­ເສີມ ແລະ ການ​ຮ່ວມ​ມື​ກັບ​ພາກ​ເອ­ກະ​ຊົນ ການ​ຫັນ​ໂຮງ­ໝໍ​ສາ­ມາດ​ກຸ້ມ​ຕົນ​ເອງ​ທາງ​ດ້ານ​ການ​ເງິນ​ເທື່ອ​ລະ​ກ້າວ ເພື່ອ​ໃຫ້​ມີ​ທາງ​ອອກ ແລະ ຊ່ວຍ​ແບ່ງ​ເບົາ​ພາ­ລະ​ແບກ​ຫາບ​ຂອງ​ລັດ ຖະ​ບານ​ໃນ­ຕໍ່­ໜ້າ​ອີກ​ດ້ວຍ.

ຂ່າວທີ່ກ່ຽວຂ້ອງ