ຂ່າວຫຼ້າສຸດ

ຫຼາຍຫົວໜ່ວຍທຸລະກິດຂອງລາວ ໄດ້ລາງວັນທຸລະກິດອາຊຽນດີເດັ່ນ

892 09 ຕ.ລ. 2019 ຂ່າວໜ້າ​ໜຶ່ງ
ຫຼາຍຫົວໜ່ວຍທຸລະກິດຂອງລາວ ໄດ້ລາງວັນທຸລະກິດອາຊຽນດີເດັ່ນ

    ວັນ​ທີ 4 ຕຸ­ລາ 2019 ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ (ສຄອຊ) ຈັດ​ພິ­ທີ​ມອບ​ລາ­ງວັນ​ທຸ­ລະ​ກິດ​ອາ​ຊຽນ​ດີ­ເດັ່ນ​ແຫ່ງ ສປປ ລາວ ໃຫ້​ນັກ­ທຸ­ລະ­ກິດ​ລາວ ຂຶ້ນ​ທີ່​ໂຮງ­ແຮມ​ຄຣາວ​ພາ​ຊາ ນະ­ຄອນ­ຫຼວງ​ວຽງ​ຈັນ ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ​ນາງ ເຂັມ​ມະ­ນີ ພົນ​ເສ­ນາ ລັດ­ຖະ­ມົນ­ຕີ​ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ທ່ານ ທະ​ນົງ​ສິນ ກັນ­ລະ­ຍາ ຮອງ​ປະ­ທານ​ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ທ່ານ ເຈັນ​ສ ເພ​ເທີ ລິດ​ເຄັນ​ແຮມ ທູດ​ເຢຍ​ລະ​ມັນ ປະ­ຈຳ​ລາວ ບັນ­ດາ​ທູດ​ປະ­ເທດ​ອາ​ຊຽນ ປະ­ຈຳ​ລາວ ອົງ​ການ­ຈັດ­ຕັ້ງ​ສາ­ກົນ ຄູ່​ຮ່ວມ​ຍຸດ​ທະ​ສາດ ຜູ້​ໃຫ້­ການ​ສະ­ໜັບ­ສະ­ໜູນ ແລະ ນັກ­ທຸ­ລະ­ກິດ ເຂົ້າ​ຮ່ວມ.

    ລາ­ງວັນ​ທຸ­ລະ​ກິດ​ອາ​ຊຽນ​ດີ­ເດັ່ນ​ແຫ່ງ ສປປ ລາວ (ABA Laos) ແນ­ໃສ່​ຫົວ­ໜ່ວຍ​ທຸ­ລະ​ກິດ​ທີ່​ມີ​ຜົນ­ງານ​ໂດດ​ເດັ່ນ​ຂອງ​ລາວ ແລະ ໃຫ້​ຜູ້​ທີ່​ຊະ­ນະ​ລາ­ງວັນ​ເປັນ​ຕົວ​ແທນ ເພື່ອ​ເຜີຍ­ແຜ່​ຄວາມ​ຮັບ​ຮູ້​ຂອງ​ການ​ເຮັດ​ທຸ­ລະ​ກິດ ໃນ​ພາກ​ພື້ນ​ປະ­ຊາ​ຄົມ​ເສດ­ຖະ­ກິດ​ອາ​ຊຽນ ລາ­ງວັນ​ດັ່ງ­ກ່າວ​ນີ້​ເປັນ​ການ​ສ້າງ​ແຮງ​ບັນ­ດານ​ໃຈ ແລະ ເຕົ້າ­ໂຮມ​ເອົາ​ທຸ­ລະ​ກິດ​ລາວ ເພື່ອ​ປະ­ກອບ­ສ່ວນ​ເຂົ້າ​ໃນ​ຂະ​ບວນ​ການ​ເຊື່ອມ​ໂຍງ ປະ­ຊາ​ຄົມ​ເສດ​ຖະ​ກະ​ກິດ​ອາ​ຊຽນ ແລະ ເປັນ​ອົງ​ປະ­ກອບ​ທີ່​ສຳ­ຄັນ​ໃສ່​ຕະ­ຫຼາດ​ອາ​ຊຽນ ລາ­ງວັນ​ທຸ­ລະ​ກິດ​ອາ​ຊຽນ​ດີ­ເດັ່ນ ແຫ່ງ ສປປ ລາວ 2019 (ABA Laos 2019) ຍັງ​ເປັນ​ແຮງ​ຜັກ​ດັນ​ການ​ແຂ່ງ­ຂັນ​ໃນ​ລາວ ໃນ​ທ່າມ­ກາງ​ການ​ຈະ­ເລີນ​ເຕີບ​ໂຕ ແລະ ການ​ພັດ­ທະ­ນາ​ຂອງ​ປະ­ຊາ​ຄົມ​ເສດ­ຖະ­ກິດ​ອາ​ຊຽນ ເຊິ່ງ​ຜູ້​ປະ­ກອບ​ການ​ຂອງ​ລາວ​ທີ່​ຊະ­ນະ​ເລີດ​ໄດ້​ຮັບ​ລາ­ງວັນ​ທຸ­ລະ​ກິດ​ອາ​ຊຽນ​ດີ­ເດັ່ນ​ແຫ່ງ ສປປ ລາວ 2019 (ASEAN Business Awards Laos 2019) ຍັງ​ສາ­ມາດ​ສືບ­ຕໍ່​ເຂົ້າ​ຮ່ວມ​ສະ­ໝັກ​ແຂ່ງ­ຂັນ​ຊີງ​ລາ­ງວັນ​ທຸ­ລະ​ກິດ​ອາ​ຊຽນ​ດີ­ເດັ່ນ 2019 (ASEAN Business Awards 2019) ເຊິ່ງ​ເປັນ​ລາ­ງວັນ​ໃນ​ລະ­ດັບ​ພາກ​ພື້ນ​ທີ່​ຈະ​ໄດ້​ຈັດ​ຂຶ້ນ ແລະ ເປັນ​ເຈົ້າ­ພາບ​ຈັດ​ໂດຍ​ສະ­ພາ​ທີ່​ປຶກ­ສາ​ທຸ­ລະ​ກິດ​ອາ​ຊຽນ (ASEAN-BAC) ແຫ່ງ​ລາ­ຊະ​ອາ­ນາ­ຈັກ​ໄທ ໃນ​ເດືອນ​ພະ­ຈິກ 2019.

    ສຳ­ລັບ​ລາ­ງວັນ​ດີ­ເດັ່ນ​ອາ​ຊຽນ​ປະ­ຈຳ​ປີ 2019 ໄດ້​ຈັດ​ເປັນ 4 ປະ­ເພດ ປະ­ກອບ​ມີ: 18 ລາ­ງວັນ​ຈາກ16 ຫົວ­ໜ່ວຍ​ທຸ­ລະ​ກິດ ຄື: ລາ­ງວັນ​ຂະ­ແໜງ​ບຸ­ລິ­ມະ­ສິດ​ດີ­ເດັ່ນ ມີ​ກຸ່ມ​ບໍ­ລິ­ສັດ ດາວ­ເຮືອງ ຈຳ­ກັດ ບໍ­ລິ­ສັດ ພູ​ວົງ​ລາວ​ດີ​ເທວ​ໂຄ​ໂພ​ເລ​ເຊີນ ຈຳ­ກັດ (ຂະ­ແໜງ­ການ​ອາ­ຫານ ແລະ ເຄື່ອງ​ດື່ມ) ບໍ­ລິ­ສັດ Events for good sole ຈຳ­ກັດ ວິ​ສາ​ຫະ​ກິດ​ສ່ວນ​ບຸກ­ຄົນ​ພາ­ສາ​ຜ້າ (ຂະ­ແໜງ​ຫັດ­ຖະ­ກຳ​ດີ­ເດັ່ນ) ບໍ­ລິ­ສັດ ກຸ່ມ​ໄຊ​ຍະ​ວົງ ຈຳ­ກັດ​ຜູ້​ດຽວ ລາ­ງວັນ​ທຸ­ລະ​ກິດ​ຂະ­ໜາດ​ນ້ອຍ-ຂະ­ໜາດ​ກາງ​ດີ­ເດັ່ນ ມີ​ວິ​ສາ​ຫະ​ກິດ​ສ່ວນ​ບຸກ­ຄົນ​ພາ­ສາ​ຜ້າ (ຂະ­ແໜງ­ການ​ຈ້າງ​ງານ​ດີ­ເດັ່ນ) ໂຮງ­ຮຽນ​ນາໆຊາດ​ປັນ­ຍາ​ທິບ ບໍ­ລິ­ສັດ ພູ​ວົງ​ລາວ​ດີ​ເທວ ໂຄ​ໂພ​ເລ​ເຊີນ ຈຳ­ກັດ (ທາງ​ດ້ານ​ນະ​ວັດ­ຕະ​ກຳ) ໂຮງ­ງານ​ຜະ­ລິດ​ນ້ຳ​ດື່ມ ແລະ ນ້ຳ­ກ້ອນ​ໂລ­ມາ​ຄຳ ລາ­ງວັນ​ພິ­ເສດ ແລະ ລາ­ງວັນ​ໃໝ່ ( New Business Award ) ປະ­ກອບ​ມີ​ບໍ­ລິ­ສັດ ຄຳ​ມະ­ນີ​ເຈ​ເນີ​ຣອນ​ເຊີ​ວິ​ສ ບໍ­ລິ­ສັດ​ປາກ​ຊ່ອງ​ພັດ­ທະ­ນາ​ຂາ​ອອກ-ຂາ​ເຂົ້າ​ຈຳ­ກັດ​ຜູ້​ດຽວ ບໍ­ລິ­ສັດ Savan Pacifica DeveloPment ຈຳ­ກັດ ບໍ­ລິ­ສັດ​ທ່ອງ​ທ່ຽວ​ເອັກ​ໂຊ​ລາວ ຈຳ­ກັດ ຟາມ​ລ້ຽງ​ຄວາຍ​ນົມ​ນາ­ຊ່າວ ຈຳ­ກັດ ໂຮງ­ແຮມ​ແມ່​ຂອງ​ພາ​ຣາ​ໄກສ໌ຣີ​ສອດ ບໍ­ລິ­ສັດ ໃສ​ທິ​ລາດ​ກຣຸບ ຈຳ­ກັດ ແຫຼ່ງ​ທ່ອງ​ທ່ຽວ​ນຳ​ຕົກ​ຕາດ​ຮ້ອຍ​ຄົວ ແລະ ໂຮງ­ງານ​ອຸດ­ສາ­ຫະ­ກຳ​ໂຕ​ໂຢ​ລາວ ຈຳ­ກັດ​ຜູ້​ດຽວ.

ຂ່າວທີ່ກ່ຽວຂ້ອງ