ຂ່າວຫຼ້າສຸດ

ແຂ່ງຂັນຊ່ວງເຮືອປະເພນີທີ່ທ່າວັດຈັນ ຈະໄດ້ຈັດຂຶ້ນຢູ່ສອງສະຖານທີ່

471 10 ຕ.ລ. 2019 ວົງຈອນກີລາ

    ພິ­ທີ​ມອບ-ຮັບ​ອຸ­ປະ­ຖຳ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ປະ­ເພ­ນີ ປະ­ຈຳ​ປີ 2019 ທີ່​ທ່າ​ວັດ​ຈັນ ເມືອງ​ຈັນ­ທະ​ບູ​ລີ ນະ­ຄອນ­ຫຼວງ​ວຽງ​ຈັນ ຈາກ​ຫຼາຍ​ຫົວ­ໜ່ວຍ​ທຸ­ລະ​ກິດ ຈັດ​ຂຶ້ນ​ວັນ​ທີ 9 ຕຸ­ລາ 2019 ຢູ່​ປົກ­ຄອງ​ເມືອງ​ຈັນ­ທະ​ບູ​ລີ ກ່າວ​ຮັບ​ໂດຍ​ທ່ານ​ນາງ ບົວ​ລອນ ວົງ​ດາ­ລາ​ແສນ ເຈົ້າ­ເມືອງ​ຈັນ­ທະ​ບູ​ລີ ປະ­ທານ​ຈັດ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ຊ່ວງ​ເຮືອ​ປະ­ຈຳ​ປີ 2019 ທີ່​ທ່າ​ວັດ​ຈັນ ພ້ອມ​ດ້ວຍ​ບັນ­ດາ​ບໍ­ລິ­ສັດ ຫ້າງ​ຮ້ານ ຫົວ​ໝ່ວຍ​ທຸ­ລະ​ກິດ ອ້ອມ​ຂ້າງ ແລະ ສື່​ມວນ​ຊົນ ເຂົ້າ​ຮ່ວມ.

    ບັນ­ດາ​ພາກ­ສ່ວນ​ທີ່​ໃຫ້­ການ​ສະ­ໜັບ­ສະ­ໜູນ​ຄັ້ງ​ນີ້​ປະ­ກອບ​ມີ​ບໍ­ລິ­ສັດ ເບຍ​ລາວ 200 ກວ່າ​ລ້ານ​ກີບ ກ່າວ​ມອບ​ໂດຍ​ທ່ານ ສະ­ຖຽນ ມວນ​ວົງ­ສາ ຜູ້​ຈັດ­ການ​ສະ­ໜັບ­ສະ­ໜູນ ແລະ ກິດ­ຈະ­ກຳ ບໍ­ລິ­ສັດ ເບຍ​ລາວ ຈຳ­ກັດ ບໍ­ລິ­ສັດ ໂຕ​ໂຢ​ຕ້າ​ລາວ​ທາ­ນີ 75 ລ້ານ​ກີບ ບໍ­ລິ­ສັດ ສີ​ສົມ­ບັດ​ເຊົ່າ​ສິນ​ເຊື່ອ ແລະ ຮ້ານ​ຄຳ​ພູ​ວົງ ປະ­ກອບ­ສ່ວນ​ຊຸກ­ຍູ້​ຂັນ​ລາ­ງວັນ​ໝູ­ນວຽນ 20 ລ້ານ​ກີບ ສູນ​ການ​ຄ້າ​ຕະ­ຫຼາດ​ແລງ​ໜອງ​ດ້ວງ 10 ລ້ານ​ກີບ ບໍ­ລິ­ສັດ ຟ້າ​ວັດ­ທະ­ນາ ໂທລະ­ພາບ​ແຫ່ງ​ຊາດ​ລາວ ແລະ ບໍ­ລິ­ສັດ ກອນ​ສິນ​ພັດ­ທະ­ນາ​ອະ​ສັງ​ຫາ​ລິມ​ມະ​ຊັບ ພາກ­ສ່ວນ​ລະ 5 ລ້ານ​ກີບ ຮ້ານ​ວ໋ອດ​ຄຣັບ 4 ລ້ານ​ກວ່າ​ກີບ ບໍ­ລິ­ສັດ ລົງ­ທຶນ​ສາ­ກົນ​ຮ່າ​ໂດ່ ແລະ ບໍ­ລິ­ສັດ ມະ­ນີ​ກຣຸບ ພາກ­ສ່ວນ​ລະ 4 ລ້ານ​ກີບ ລວມ​ມູນ​ຄ່າ​ໃນ​ການ​ມອບ​ຄັ້ງ​ນີ້ 356,93 ລ້ານ​ກີບ ນອກ​ນີ້​ຍັງ​ມີ​ບັນ­ດາ​ພາກ­ສ່ວນ​ຕ່າງໆ​ກໍ​ໃຫ້­ການ​ຊຸກ­ຍູ້​ຕື່ມ​ອີກ ທັງ​ນີ້​ກໍ​ເພື່ອ​ເຮັດ​ໃຫ້​ງານ​ບຸນ​ປະ­ເພ­ນີ​ອັນ​ດີ­ງາມ ມີ​ຄວາມ​ເບີກ­ບານ​ມ່ວນ­ຊື່ນ ແລະ ມີ​ຜົນ­ສຳ­ເລັດ​ຄື​ກັບ​ທຸກ​ປີ­ຜ່ານ­ມາ.

    ສຳ­ລັບ​ການ​ແຂ່ງ­ຂັນ​ຊ່ວງ​ເຮືອ​ປະ­ເພ­ນີ​ປະ­ຈຳ​ປີ 2019 ທີ່​ທ່າ​ວັດ​ຈັນ ເມືອງ​ຈັນ­ທະ​ບູ​ລີ ຈະ​ຈັດ​ຂຶ້ນ​ໃນ​ວັນ​ທີ 13-14 ຕຸ­ລາ 2019 ວັນ​ທີ 13 ຕຸ­ລາ 2019 ຈະ​ເປັນ​ການ​ແຂ່ງ­ຂັນ​ຊ່ວງ​ເຮືອ​ນ້ອຍ (ເຮືອ​ກີ­ລາ 12 ສີ­ພາຍ) ຢູ່​ຫາດ​ດອນ​ຈັນ ເມືອງ​ຈັນ­ທະ​ບູ​ລີ ແລະ ວັນ​ທີ 14 ຕຸ­ລາ 2019 ແຂ່ງ­ຂັນ​ຊ່ວງ​ເຮືອ​ປະ­ເພດ 55 ສີ­ພາຍ ເຮືອ​ປະ­ເພ­ນີ​ຍິງ-ຊາຍ ແລະ ເຮືອ​ສູດ​ຊາຍ ຢູ່​ແຄມ​ຂອງ​ບໍ­ລິ­ເວນ​ໂຮງ­ແຮມ​ແລນ​ມາກ​ຄື​ກັບ​ປີ 2018 ເນື່ອງ​ຈາກ​ຢູ່​ຫາດ​ດອນ​ຈັນ​ນ້ຳ​ບົກ​ແຫ້ງ ບໍ່​ສາ­ມາດ​ແຂ່ງ­ຂັນ​ເຮືອ​ປະ­ເພດ​ໃຫຍ່​ໄດ້ ດັ່ງ­ນັ້ນ ຈຶ່ງ​ຍ້າຍ​ສະ­ຖານ­ທີ່​ຈຸດ​ທີ່​ມີ​ນ້ຳ​ຫຼາຍ​ເພື່ອ​ສະ­ດວກ​ໃນ​ການ​ແຂ່ງ­ຂັນ ແລະ ມີ​ຄວາມ​ຮັບ­ປະ­ກັນ.

ຂ່າວທີ່ກ່ຽວຂ້ອງ