ຂ່າວຫຼ້າສຸດ

ກຽມພ້ອມຈັດວາງກຳລັງໃສ່ງານບຸນອອກພັນສາ ແລະ ຊ່ວງເຮືອທ່າວັດຈັນ

811 10 ຕ.ລ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ຜ່ານ​ແຜນ​ປ້ອງ​ກັນ​ໃນ​ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ປະ­ເພ­ນີ ປະຈຳ­ປີ 2019 ທີ່​ທ່າ​ວັດ​ຈັນ ຈັດ​ຂຶ້ນ​ວັນ​ທີ 9 ຕຸ­ລາ 2019 ຢູ່​ຫ້ອງ​ຕຳ­ຫຼວດ ມີ​ທ່ານ ພັທ ຢຸດ​ຕະ​ພົງ ສຸ­ວັນ­ນະ​ສິງ ຮອງ​ຫ້ອງ​ຕຳ­ຫຼວດ ກອງ​ບັນ­ຊາ​ການ​ປ້ອງ​ກັນ​ຄວາມ​ສະ­ຫງົບ ນະ­ຄອນ­ຫຼວງ​ວຽງ​ຈັນ (ປກສ ນວ) ທ່ານ ພັທ ເພັງ​ສະ­ຫວັນ ທຳ​ມາ​ບູນ ຫົວ­ໜ້າ​ພະ​ແນກ​ຈະ­ລາ­ຈອນ ນວ ມີ​ຄະ­ນະ​ບັນ­ຊາ​ແຕ່​ລະ​ພາກ ສ່ວນ ແລະ ພົນ​ຕຳ­ຫຼວດ ເຂົ້າ​ຮ່ວມ.

    ທ່ານ ພັທ ບຸນ​ມາກ ສູນ​ດາ​ໄລ ຮອງ​ຫົວ­ໜ້າ​ພະ​ແນກ​ຈະ­ລາ­ຈອນ ນວ ໄດ້​ຂຶ້ນ​ລາຍ​ງານ​ແຜນ​ປ້ອງ​ກັນ ງານ​ບຸນ​ອອກ​ພັນ​ສາ​ປະ​ວໍ­ລະ­ນາ ແລະ ບຸນ­ຊ່ວງ­ເຮືອ​ປະ­ເພ­ນີ​ຢູ່​ທ່າ​ວັດ​ຈັນ ທີ່​ຈະ​ຈັດ​ຂຶ້ນ​ວັນ​ທີ 10-14 ຕຸ­ລາ ນີ້​ວ່າ: ເພື່ອ​ຮັບ­ປະ­ກັນ​ຄວາມ​ສະ­ຫງົບ ຄວາມ​ເປັນ​ລະ­ບຽບ​ຮຽບ​ຮ້ອຍ ຄວາມ​ປອດ​ໄພ​ຮອບ­ດ້ານ​ໃຫ້​ແກ່​ການ ນຳ​ພັກ-ລັດ ແລະ ມວນ​ຊົນ ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງ­ປະ­ເທດ​ທີ່​ມາ​ຫຼິ້ນ​ບຸນ​ປະ­ເພ­ນີ​ຂອງ​ລາວ​ເຮົາ​ໃຫ້​ມີ​ຄວາມ​ເບີກ­ບານ​ມ່ວນ­ຊື່ນ​ທີ່​ເຕັມ​ໄປ​ດ້ວຍ​ບັນ­ຍາ­ກາດ​ແຫ່ງ​ຄວາມ​ສະ­ຫງົບ ຄວາມ​ປອດ​ໄພ ທາງ​ດ້ານ​ຊີ­ວິດ ແລະ ຊັບ​ສິນ ສະ­ພາບ​ການ​ສັນ­ຈອນ​ໃນ​ໄລ­ຍະ​ງານ​ບຸນ ຄາດ​ວ່າ​ຈະ​ມີ​ຄວາມ​ແອ​ອັດ​ສັບ­ສົນ​ຢູ່​ບາງ​ຖະ­ໜົນ ເຊັ່ນ: ຖະ­ໜົນ​ສຸ​ພາ­ນຸ​ວົງ ຖະ­ໜົນ​ເສດ​ຖາ​ທິ​ລາດ ຖະ­ໜົນ​ສາມ​ແສນ​ໄທ ຖະ­ໜົນ​ຄູ​ວຽງ ແລະ ອື່ນໆ ນອກ​ນີ້ ອາດ​ຈະ​ມີ​ກຸ່ມ​ຂອງ​ຊາວ​ໜຸ່ມ​ຂັບ​ຂີ່​ລົດ​ເປັນ​ພຶງ​ເປັນ​ແພ ຂັບ​ຂີ່​ຊ່ວງ​ເສັງ​ກັນ ສ້າງ​ຄວາມ​ສັບ­ສົນ​ໃຫ້­ການ​ສັນ­ຈອນ ຜູ້​ທີ່​ໃຊ້​ລົດ​ໃຊ້​ຖະ­ໜົນ​ໄລ­ຍະ​ດັ່ງ­ກ່າວ​ອາດ​ມີ​ການ​ລ່ວງ​ລະ­ເມີດ​ກົດ​ລະ­ບຽບ​ຈະ­ລາ­ຈອນ​ຢ່າງ​ຫຼວງ­ຫຼາຍ ຍ້ອນ​ສະ­ຖານ­ທີ່​ຈອດ​ລົດ​ບໍ່​ພຽງ­ພໍ ນັກ​ຂັບ​ຂີ່​ອາດ​ຈະ​ຈອດ​ລົດ​ຊະ­ຊາຍ ສ້າງ​ຄວາມ​ສັບ­ສົນ ແລະ ແອ​ອັດ​ໃນ​ການ​ສັນ­ຈອນ ຈະ​ພາ­ໃຫ້​ເກີດ​ອຸ­ບັດ­ເຫດ​ຕາມ​ຖະ­ໜົນ ສະ­ນັ້ນ ເພື່ອ​ຮັບ­ປະ­ກັນ​ຄວາມ​ສະ­ຫງົບ ຄວາມ​ເປັນ​ລະ­ບຽບ​ຮຽບ​ຮ້ອຍ ຄວາມ​ປອດ​ໄພ​ຮອບ­ດ້ານ ພວກ​ເຮົາ​ໄດ້​ສຸມ​ໃສ່​ຈຸດ​ປ້ອງ​ກັນ​ທັງ​ໝົດ 70 ຈຸດ ມີ​ກຳ­ລັງ​ເຂົ້າ​ປ້ອງ​ກັນ 255 ຄົນ ພ້ອມ​ທັງ​ພາ­ຫະ­ນະ​ຮັບ​ໃຊ້ ເຊັ່ນ: ລົດ​ກະ­ບະ ລົດ​ສະ­ຫຼາມ ລົດ​ລາກ​ແກ່ ແລະ ລົດ​ໂມ​ໂຕ ລວມ​ທັງ​ໝົດ 12 ຄັນ.

    ນອກ​ນີ້ ສະ­ເພາະ​ຈະ­ລາ­ຈອນ 6 ເມືອງ ຈະ​ໄດ້​ຕັ້ງ​ດ່ານ​ກວດ­ກາ​ຕະ­ຫຼອດ 24 ຊົ່ວ­ໂມງ ຄື: ກອງ​ຈະ­ລາ­ຈອນ​ເມືອງ​ນາ​ຊາຍ​ທອງ ຕັ້ງ​ດ່ານ​ຢູ່​ບ້ານ​ໜອງ​ສະ ເມືອງ​ຫາດ​ຊາຍ​ຟອງ ຕັ້ງ​ດ່ານ​ຢູ່​ໜ້າ​ສວນ​ວັດ ທະ­ນະ​ທຳ ເມືອງ​ໄຊ​ທາ­ນີ ຕັ້ງ​ດ່ານ​ຢູ່​ບ້ານ​ນາ​ທ່າ​ງ່ອນ ເມືອງ​ປາກ​ງື່ມ ຕັ້ງ​ດ່ານ​ຢູ່​ບ້ານ​ສົມ​ສະ­ຫວາດ ເມືອງ​ສັງ​ທອງ ຕັ້ງ​ດ່ານ​ຢູ່​ບ້ານ​ສຳ­ພັນ​ນາ ແລະ ເມືອງ​ໄຊ​ເສດ​ຖາ ກວດ­ກາ​ເສັ້ນ­ທາງ​ວຽງ​ຈະ­ເລີນ.

ຂ່າວທີ່ກ່ຽວຂ້ອງ