ຂ່າວຫຼ້າສຸດ

ເຊີນຊວນເຂົ້າຮ່ວມກິດຈະກຳ ບຸນມະໂຫລານສົ່ງເສີມການອ່ານ

537 10 ຕ.ລ. 2019 ຂ່າວໜ້າ​ໜຶ່ງ
ເຊີນຊວນເຂົ້າຮ່ວມກິດຈະກຳ ບຸນມະໂຫລານສົ່ງເສີມການອ່ານ

    ການ​ຖະ­ແຫຼງ​ຂ່າວ​ຈັດ​ງານ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ ນະ­ຄອນ­ຫຼວງ​ວຽງ​ຈັນ (ນວ) ຄັ້ງ​ທີ 2 ຈັດ​ຂຶ້ນ​ວັນ​ທີ 9 ຕຸ­ລາ 2019 ທີ່​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ຖະ­ແຫຼງ​ໂດຍ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ທ່ານ​ຮອງ​ຫົວ­ໜ້າ​ຫ້ອງ​ວ່າ­ການ  ທ່ານ​ຫົວ­ໜ້າ​ຫໍ­ສະ­ໝຸດ ນວ ພ້ອມ​ຄະ­ນະ​ຜູ້​ຈັດ​ງານ​ຈາກ​ບໍ­ລິ­ສັດ ປານ​ຄຳ​ຈຳ­ປາ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ສົມ​ພອນ ສອນ​ດາ­ລາ ກ່າວ​ວ່າ: ການ​ຈັດ​ງານ​ຄັ້ງ​ນີ້​ເພື່ອ​ເປັນ​ການ​ເປີດ​ກວ້າງ​ສົ່ງ­ເສີມ​ການ​ອ່ານ​ໃຫ້​ທົ່ວ​ເຖິງ ເປັນ​ການ​ເປີດ​ໂອ­ກາດ​ໃຫ້​ທຸກ​ຄົນ​ໄດ້​ສຳ­ຜັດ​ກັບ​ປຶ້ມ​ອ່ານ​ນາໆຊາດ​ໃຫ້​ຕ່າງ​ຊາດ​ໄດ້​ສຳ­ຜັດ​ກັບ​ປື້ມ​ອ່ານ​ຂອງ​ລາວ ພ້ອມ​ດຽວ​ກັນ​ຍັງ​ໃຫ້​ທຸກ​ຄົນ​ເຫັນ​ໄດ້​ຄວາມ​ສຳ­ຄັນ​ຂອງ​ການ​ອ່ານ​ເປັນ​ເວ­ທີ​ໃນ​ການ­ສະ­ແດງ​ຄວາມ​ສາ­ມາດ​ຂອງ​ໄວ​ໜຸ່ມ​ເປັນ​ການ​ປຸກ­ລະ­ດົມ​ໃຫ້​ທຸກ​ພາກ­ສ່ວນ​ໃນ​ສັງ­ຄົມ​ມີ​ສ່ວນ​ຮ່ວມ​ໃນ​ການ​ສົ່ງ­ເສີມ​ການ​ອ່ານ ເປັນ​ບ່ອນ​ແບ່ງ­ປັນ​ຄວາມ​ຮູ້ ສົ່ງ­ເສີມ​ນັກ​ພິມ​ພາຍ​ໃນ​ປະ­ເທດ ຕື່ນ​ຕົວ ປັບ­ປຸງ ແລະ ພັດ­ທະ­ນາ​ການ​ຜະ­ລິດ​ປຶ້ມ​ອ່ານ ພິ­ເສດ ເປັນ​ການ​ຮ່ວມ​ສະ­ເຫຼີມ­ສະ­ຫຼອງ​ວັນ​ຄູ​ແຫ່ງ​ຊາດ 7 ຕຸ­ລາ ຄົບ­ຮອບ 25 ປີ ເປີດ​ໂອ­ກາດ​ທຸກ​ຫົວ­ໜ່ວຍ ຄອບ­ຄົວ ໂຮງ­ຮຽນ ສະ​ຖາ​ບັນ​ການ​ສຶກ​ສາ ທັງ​ພາກ​ລັດ ແລະ ເອ­ກະ​ຊົນ ພ້ອມ​ທັງ​ຜູ້​ປົກ­ຄອງ ກໍ​ຄື ປະ­ຊາ­ຊົນ​ທົ່ວ​ໄປ ໄດ້​ມາ​ຊົມ ແລະ ຊື້​ປຶ້ມ​ອ່ານ​ທີ່​ຫຼາຍ​ແບບ​ໃນ​ລາ­ຄາ​ຖືກ ແຕ່​ໄດ້​ຄວາມ​ຮູ້​ຢ່າງ​ຫຼວງ­ຫຼາຍ ເຊິ່ງ​ງານ​ຈັດ​ຂຶ້ນ​ທີ່​ສູນ​ການ​ຄ້າ ວຽງ​ຈັນ​ເຊັນ​ເຕີ ໃນ​ວັນ​ທີ 19-27 ຕຸ­ລາ 2019 ເວ­ລາ 9:00-20:00 ໂມງ.

    ສຳ­ລັບ​ກິດ­ຈະ­ກຳ​ມີ​ການ​ແຂ່ງ­ຂັນ​ເພື່ອ​ລະ­ນຶກ​ເຖິງ​ບຸນ­ຄຸນ​ຂອງ​ຄູ ຜູ້​ຊະ­ນະ​ເລີດ​ຈະ​ໄດ້​ຮັບ​ລາ­ງວັນ​ໜ່ວຍ​ໂລກ​ອັດ​ສະ​ລິ​ຍະ ມູນ​ຄ່າ 1.500.000 ກີບ ເຊິ່ງ​ມີ 10 ລາຍ­ການ​ແຂ່ງ­ຂັນ ຄື: ແຂ່ງ­ຂັນ​ບົດ​ຄວາມ​ຄູ​ໃນ​ດວງ​ໃຈ ເປັນ​ພາ­ສາ​ລາວ ແລະ ພາ­ສາ​ອັງ­ກິດ ແຂ່ງ­ຂັນ​ເວົ້າ​ຄູ​ຜູ້​ທຳ​ອິດ​ຂອງ​ຂ້ອຍ (ເປັນ​ພາ­ສາ​ລາວ ແລະ ອັງ­ກິດ) ແຂ່ງ­ຂັນ​ຮູບ ເງົາ​ເລື່ອງ­ສັ້ນ​ສຸດ​ຍອດ​ອາ­ຈານ​ໃນ​ດວງ​ໃຈ ແຂ່ງ­ຂັນ​ຮູບ​ຖ່າຍ​ຄູ​ຂອງ​ຂ້ອຍ ການ​ຖາມ-ຕອບ​ຫົວ­ຂໍ້​ອາ​ຊຽນ ການ​ເລົ່າ​ນິ­ທານ ແຂ່ງ­ຂັນ​ສິ­ລະ​ປະ ແຂ່ງ­ຂັນ​ຮ້ານ​ວາງ­ສະ­ແດງ​ດີ­ເດັ່ນ​ຈາກ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ ແລະ ແຂ່ງ­ຂັນ​ຫຼິ້ນ​ເກມ​ຕ່າງໆ.    

    ໂອ­ກາດ​ນີ້ ຂໍ​ເຊີນ­ຊວນ​ພະ­ນັກ­ງານ ຄູ-ອາ­ຈານ ນັກ­ຮຽນ-ນັກ​ສຶກ​ສາ ປັນ­ຍາ​ຊົນ​ທຸກ​ທົ່ວ​ໜ້າ ແລະ ປະ­ຊາ­ຊົນ ນວ ແລະ ແຂວງ​ໃກ້​ຄຽງ ຈົ່ງ​ພ້ອມ​ກັນ​ເຂົ້າ​ຮ່ວມ​ຊົມ ແລະ ຮ່ວມ​ກິດ­ຈະ­ກຳ​ຄັ້ງ​ນີ້.

ຂ່າວທີ່ກ່ຽວຂ້ອງ